ລາຍລະອຽດຂ່າວ
ທັບ​ນັກ​ກິລາ​ດຶງ​ເຊືອກ​ລາວ ຄວ້າ​ທີ 3 ​ແລະ ທີ 4 ລາຍການ ຊີງ​ແຊ໋ມອາຊີ ຄັ້ງ​ທີ XlV
ຂຽນເມື່ອ: 17/09/2019 16:09 | ໂດຍ: ເພຣເມັກເກີ | ອ່ານ: 132 ຄັ້ງ

      ທັບ​ນັກກິລາດຶງເຊືອກທີມຊາດລາວ ປະເພດທີ​ມຍິງ-ຊາຍ ສ້າງຜົນງານ ​ແລະ ກຽດ​ຊື່​ສຽງ​​ໃຫ້​ແກ່​ປະ​ເທດ​ຊາດ ​ໄດ້​ອີກ​ຄັ້ງ ດ້ວຍ​ການ​ຄວ້າ​ອັນ​ດັບ​ທີ 3 ​ແລະ ທີ 4 ຈາກ 10 ປະ​ເທດ​ໃນ​ຂົງ​ເຂດ​ອາຊີ ​ເຂົ້າ​ຮ່ວມການແຂ່ງຂັນກີລາດຶງເຊືອກ ຊີງແຊ໋ມອາຊີ ຄັ້ງທີ XlV ຫຼື 14 th Asian Tug of War Indoor Championship 2019 ຈັດ​ຂຶ້ນ​ທີ່ແຂວງນະຄອນສີອາຢຸດທະຍາ ປະເທດໄທ ຮັບ​ກຽດ​ເປັນ​ເຈົ້າພາບ ລະຫວ່າງວັນທີ 13-16 ກັນຍາ ຜ່ານ​ມາ.

      ການແຂ່ງຂັນລາຍການ​ດັ່ງກ່າວມີນັກ​ກິລາ​ຈາກ 10 ປະເທດໃນ​ຂົງ​ເຂດ​ອາຊີ​ເຂົ້າ​ຮ່ວມຊີງ​ໄຊ ປະກອບ​ມີ ບຣູໄນ, ໃຕ້ຫວັນ, ກໍາປູເຈຍ, ລາວ, ມຽນມາ, ມາເກົາ, ເນປານ, ສີລັງກາ, ອິນເດຍ ແລະ ເຈົ້າພາບ ​ໄທ, ໃນນັ້ນ ທີມຊາຍ ມີ 9 ຄະນະ ແລະ ທີມຍິງ ມີ 6 ຄະນະ ເຊິ່ງທັງ 2 ປະເພດ ແມ່ນແຂ່ງຂັນແບບພົບກັນໝົດ ແລ້ວຄັດເອົາທີມທີ່ມີຄະແນນດີທີ່ສຸດ (ທີມອັນດັບທີ 1-4 ຜ່ານເຂົ້າໄປຫຼິ້ນໃນຮອບຮອງຊະນະເລີດ ຫຼື ຮອບ 4 ທີມສຸດທ້າຍ)​ ສະ​ເພາະ​ທັບ​ນັກ​ກິລາ​ດຶງ​ເຊືອກ​ທີ​ມຊາດ​ລາວ ສົ່ງ​ເຂົ້າ​ຮ່ວມ​ແຂ່ງຂັນຄົບ 2 ລາຍການ​ດັ່ງກ່າວ.

      ຜ່ານການແຂ່ງຂັນຜົນປາກົດວ່າ: ປະເພດຊາຍ (ນັກກິລາຈໍານວນ 8 ຄົນ ນໍ້າໜັກບໍ່ເກີນ 600 ກິໂລກຣາມ)​ ທີມຊາດລາວ ລົງແຂ່ງຂັນຮອບຄັດເລືອກ 8 ຄັ້ງ ສາມາດ​ເອົາ​ຊະນະ ​ໄດ້​ເຖີງ 4 ຄັ້ງ, ສະ​ເໝີ 2 ຄັ້ງ ​ແລະ ​ເສຍ 2 ຄັ້ງ ​ໂດຍ​ສະ​ເພາະ​ໃນນັດທໍາອິດ ກໍ​ເອົາຊະນະ ກໍາປູເຈຍ, ນັດທີສອງ ຊະນະ ມຽນມາ, ນັດທີສາມ ຊະນະ ເນປານ, ນັດທີສີ່ ເສຍໃຫ້ ໃຕ້ຫວັນ, ນັດທີຫ້າ ຊະນະ ສີລັງກາ, ນັດທີຫົກ ສະເໝີ ມາເກົາ, ນັດທີເຈັດ ສະເໝີ ບຣູໄນ ແລະ ນັດສຸດທ້າຍ ເສຍໃຫ້ ໄທ ແຕ່ກໍຍັງຜ່ານເຂົ້າຮອບຮອງຊະນະເລີດ.​

      ກ່ອນ​ໃນຮອບ 4 ທີມສຸດ​ທ້າຍ ທີມຊາດລາວ ​ໂຄຈອນ​​ໄດ້​ລ້າງ​ຕາ ໃຕ້ຫວັນ ທີມອັນດັບ 1 ຂອງໂລກ ອີກ​ຄັ້ງ ແຕ່ໜ້າ​ເສຍ​ດ່າ​ຍ ບໍ່ສາມາດຜ່ານທີມແຊ໋ມໂລກໄປໄດ້ ຈື່ງເຮັດໃຫ້ເຂົ້າໄປຊີງອັນດັບ 3 ກັບ ທີມມາເກົາ ແລະ ເປັນທີມຊາດລາວ ສາມາດເອົາຊະນະ ມາເກົາ ໄດ້ອັນດັບ 3 ໄປຄອງ ສ່ວນອັນດັບ 1 ກໍ​ເປັນ​ໄປຕາມ​ຄາດ​ຕົກ​ເປັນ​ຂອງ ທີ​ມໃຕ້ຫວັນ ແລະ ອັນດັບ 2 ​ແມ່ນເຈົ້າພາບ ​ໄທ ສ່ວນປະເພດຍິງ (ນັກກິລາຈໍານວນ 8 ຄົນ ນໍ້າໜັກບໍ່ເກີນ 500 ກິໂລກຣາມ)​ ທີມຊາດລາວ ລົງແຂ່ງຂັນໃນຮອບຄັດເລືອກ 4 ຄັ້ງ ສາມາດ​ເອົາ​ຊະນະ​​ໄດ້ 2 ຄັ້ງ, ສະ​ເໝີ 1 ຄັ້ງ ​ແລະ ​ເສຍ 1 ຄັ້ງ ​ໂດຍນັດທໍາອິດ ຊະນະ ອິນເດຍ, ນັດທີສອງ ຊະນະ ກໍາປູເຈຍ, ນັດທີສາມ ສະເໝີ ສີລັງກາ ແລະ ນັດສຸດທ້າຍ ເສຍໃຫ້ ໄທ ໄດ້ຜ່ານເຂົ້າຮອບ 4 ທີມສຸດທ້າຍ ເຊັ່ນດຽວກັນ ​ແຕ່​ໜ້າ​ເສຍ​ດ່າ​ຍ​ໃນຮອບ 4 ທີມສຸດທ້າຍ ທີມສາວລາວ ເສຍໃຫ້ກັບ ທີມຊາດໄທ ໄດ້ເຂົ້າໄປຊີງອັນດັບ 3 ກັບທີມຊາດສີລັງກາ ແລະ ເປັນທີມສີລັງກາ ເຮັດໄດ້ດີກວ່າ ເອົາຊະນະ ສາວລາວໄປໄດ້ ເຮັດໃຫ້ ສາວລາວ ໄດ້ອັນດັບ 4 ສ່ວນອັນດັບ 1 ໃຕ້ຫວັນ ແລະ ອັນດັບ 2 ໄທ ເຈົ້າພາບ.

      ຢ່າງ​ໃດ​ກໍ​ຕາມ, ​ໃນ​ການ​ແຂ່ງຂັນ​ລາຍການ​ນີ້ ທາງຝ່າຍຈັດການແຂ່ງຂັນ ກໍຍັງໄດ້ຈັດອັນດັບໃນລະດັບປະເທດອາຊຽນ ອີກ​ດ້ວຍ, ​ໃນ​ນັ້ນ ທັບ​ນັກ​ກິລາ​ດຶງ​ເຊືອກ​ທີ​ມຊາດ​ລາວ ​ທັງ​ຍິງ ​ແລະ ຊາຍ ຖືກ​ຈັດ​ອັນ​ດັບ​ທີ 2 ຂອງ​ອາ​ຊຽນ ​ໂດຍປະ​ເພດ​ທີ​ມຊາຍ ອັນດັບ 1 ຕົກ​ເປັນ​ຂອງ ໄທ, ອັນດັບ 2 ​ແມ່ນສປປ ລາວ ແລະ ອັນດັບ 3 ບຣູໄນ ສ່ວນປະເພດທີ​ມຍິງ ອັນດັບ 1 ໄທ, ອັນດັບ 2 ສປປ ລາວ ແລະ ອັນດັບ 3 ກໍາປູເຈຍ.​

​ໂດຍ ສົງການ

 

ສະໜັບສະໜູນຂ່າວໂດຍ: