ລາຍລະອຽດຂ່າວ
ທີມຊາດລາວພ້ອມເຕັມທີ່ ນັດເປີດສະໜາມ ພົບ ຍິປຸ່ນໃນລາຍການ AFC U-16 CHAMPIONSHIP 2020 U16 ທີ່ນະຄອນຫຼວງວຽງຈັນ
ຂຽນເມື່ອ: 17/09/2019 15:09 | ໂດຍ: ເພຣເມັກເກີ | ອ່ານ: 77 ຄັ້ງ

      ພິທີຖະແຫຼງຂ່າວການແຂ່ງຂັນ ບານເຕະເຍົາວະຊຸນຮຸ້ນບໍ່ເກີນ 16 ປີ ຮອບຄັດເລືອກ ກຸ່ມ J ທີ່ຈະຈັດຂຶ້ນໃນລະຫວ່າງວັນທີ 18-22/09/2019 ທີ່ນະຄອນຫຼວງວຽງຈັນ ໄດ້ມີຂຶ້ນໃນຕອນບ່າຍຂອງວັນທີ  17/09/2019 ທີ່ ໂຮງແຮມແລນມາກ, ໂດຍມີບັນດາ ຄູຝຶກຂອງທັງ 4 ປະເທດປະກອບດ້ວຍ: ລາວ(ເຈົ້າພາບ), ຍິປຸ່ນ(ແຊ້ມເກົ່າ), ມາເລເຊຍ ແລະ ກຳປູເຈຍ ພ້ອມດ້ວຍສື່ມວນຊົນສາຍກິລາເຂົ້າຮ່ວມຢ່າງພ້ອມພຽງ.

      ໃນການຖະແຫຼງຂ່າວໃນຄັ້ງນີ້ ທ່ານ Selvaraj S/O Vengadasalam ຄູຝຶກທີມຊາດລາວຊາວສິງກະໂປ ກ່າວດ້ວຍຄວາມໝັ້ນໃຈວ່າການແຂ່ງຂັນນັດເປີດສະໜາມີທີຈະພົບກັບ ທີມຊາດຍິປຸ່ນ ເປັນເກມທີ່ໜັກທີ່ສຸດສຳລັບພວກເຮົາແຕ່ກໍ່ເປັນໂອກາດທີ່ດີທີ່ພວກເຮົາຈະສະແດງສັກກະຍະພາບຂອງນັກເຕະຂອງພວກເຮົາ ແລະສະແດງໃຫ້ເຫັນເຖິງຄວາມທຸ້ມເທຂອງນັກກິລາພວກເຮົາ ພວກເຮົາຈະບໍ່ປ່ອຍໃຫ້ຍິປຸ່ນຄອງບານເປີດເກມໃສ່ພວກເຮົາໄດ້ງ່າຍໆເຖິງວ່າຜົນຂອງການແຂ່ງຂັນຈະອອກມາແນວໃດກໍ່ຕາມ ນັກເຕະຂອງພວກເຮົາຈະທຸ້ມເທຢ່າງເຕັມທີ່.

       ສ່ວນຄູຝຶກຂອງມາເລເຊຍ ທ່ານ P. Maniam ກ່າວວ່າການຕ້ອນຮັບຂອງ ສະພັນບານເຕະລາວແມ່ນເຮັດໄດ້ດີຫຼາຍ, ພວກເຮົາມີຄວາມສຸກຕັ້ງແຕ່ມື້ເດີນທາງມາຮອດລາວ, ເຖິງແມ່ນວ່າທີມເຮົາຫາກໍ່ເປັນແຊ້ມ  U16 AFF ທີ່ ສສ ຫວຽດນາມ ແຕ່ສຳລັບລາຍການນີ້ມັນແຕກຕ່າງຈາກລາຍການທີ່ຜ່ານມາເພາະ ພວກເຮົາຈະຕ້ອງພົບກັບຄູ່ຕໍ່ສູ້ທີ່ແຂ່ງແກ່ນ ແລະ ຄູ່ຕໍ່ສູ້ທີ່ຮູ້ຈຸດອ່ອນ ແລະຈຸດແຂ່ງຂອງພວກເຮົາຫຼາຍຂຶ້ນ. ສະນັ້ນ, ພວກເຮົາຈະສຸມໃສ່ການແຂ່ງຂັນນັດຕໍ່ນັດ ແລະພວກເຮົາຄາດຫວັງວ່າພວກເຮົາຈະສາມາດຜ່ານເຂົ້າໄປຫຼິ້ນໃນຮອບຕໍ່ໄປໄດ້

       ສຳລັບຄູຝຶກຂອງທີມຊາດຍິປຸ່ນ ທ່ານ Yoshiro Moriyama ກ່າວວ່າ ການເດີນທາງມາແຂ່ງຂັນໃນຄັ້ງນີ້ ເຖິງແມ່ນຍິປຸ່ນເຄີຍເປັນແຊ້ມລາຍການນີ້ກໍ່ຕາມ ແຕ່ວ່ານັກເຕະໃນຊຸດນີ້ລ້ວນແຕ່ເປັນນັກເຕະໃໝ່ ທີ່ບໍ່ເຄີຍໄດ້ແຂ່ງຂັນລະດັບນາໆຊາດມາກ່ອນ, ເຊິ່ງພວກເຮົາເອງກໍ່ບໍ່ຢ້ານກັບສິ່ງທີ່ຜິດພາດທີ່ຈະເກີດຂຶ້ນແຕ່ເມື່ອພົບກັບສິ່ງທີ່ຜິດພາດແລ້ວເຮົາຕ້ອງເອົາມາເປັນບົດຮຽນແລະແກ້ໄຂມັນເຊິ່ງເຮົາຕັ້ງຄວາມຫວັງວ່າ ເຮົາຈະສາມາດສ້າງປະສົບການໃຫ້ນັກກິລາ ທີ່ຈະເປັນອານາຄົດຂອງຊາດໃນຕໍ່ໜ້າ ພ້ອມທັງຈະຜ່ານເຂົ້າໄປຫຼິ້ນໃນຮອບຕໍ່ໄປ, ເຖິງແມ່ນວ່າພວກເຮົາເອງ ບໍ່ທັນຄຸ້ນເຄີຍກັບລະບົບການຫຼິ້ນຂອງບັນດານັກເຕະອາຊຽນ ແລະ ສະພາບອາກາດ ຂອງລາວ ເຊິ່ງເປັນສິ່ງທ້າທາຍສຳຄັນຂອງພວກເຮົາເພາະພວກເຮົາຕ້ອງໄດ້ລົງແຂ່ງຂັນລະຫວ່າງ 15:30 ໃນທຸກໆ ເກມກໍ່ຕາມ ພວກເຮົາຈະຜ່ານເຂົ້າຮອບໄປໃຫ້ໄດ້

      ທາງດ້ານ ທ່ານ Inoue Kazunori ຄູຝຶກທີມຊາດກຳປູເຈຍຊາວຍິປຸ່ນ ໄດ້ກ່າວວ່າທີມພວກເຮົາກຽມຕົວມາເປັນເວລາ 5 ເດືອນກວ່າ ແລະໃນລາຍການ AFF ທີ່ຜ່ານມາເຖິງແມ່ນວ່າ ຜົນຂອງການພົບກັບລາວແລະມາເລເຊຍ ພວກເຮົາຈະເສຍແຕ່ນັບແຕ່ມື້ນັ້ນມາທີມພວກເຮົາໄດ້ພັດທະນາຂຶ້ນຫຼາຍ, ແລະເປົ້າໝາຍສຳຄັນຂອງພວກເຮົາທີ່ເດີນທາງມາກໍ່ຄືການເກັບໄຊຊະນະໃນແຕ່ລະນັດ ແລະພວກເຮົາຫວັງວ່າຈະສ້າງຄວາມປະຫຼາດໃຈໃຫ້ແຟນບານໄດ້ເຫັນ.

       ສຳລັບຕາຕະລາງ ການແຂ່ງຂັນບານເຕະ ຊາຍຊີງແຊ້ມອາຊີ ຮຸ່ນອາຍຸ 16 ປິ ຮອບຄັດເລືອກ 2020 ຫລື AFC U-16 CHAMPIONSHIP 2020, Qualifiers ກຸ່ມ J ຂອງທີມຊາດລາວມີດັ່ງນີ້:

- ວັນທີ 18 ກັນຍາ 2019 ເວລາ 15:00 ທີມຊາດຍີ່ປຸ່ນ ພົບ ທີມຊາດລາວ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16.
- ວັນທີ 20 ກັນຍາ 2019 ເວລາ 18:30 ທີມຊາດລາວ ພົບ ທີມຊາດມາເລເຊຍ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16.
- ວັນທີ 22 ກັນຍາ 2019 ເວລາ 18:30 ທີມຊາດລາວ ພົບ ທີມຊາດກຳປູເຈຍ ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16.

ແຟນບານທີ່ສົນໃຈສາມາດຕິດຕາມຊົມການຖ່າຍທອດສົດທຸກໆນັດແມ່ນຜ່ານ MYCUJOO (ທາງ online)
ແລະ ເຂົ້າຊົມຟຣີ ໄດ້ທີ່ສະໜາມກິລາແຫ່ງຊາດຫຼັກ 16

ຂ່າວໂດຍ: ໃຈລາສີ

ພາບໂດຍ: ດີ້ ສະເລີ ແລະ ສຕລ

 

ສະໜັບສະໜູນຂ່າວໂດຍ: