ລາຍລະອຽດຂ່າວ
U-11 ວຽງຈັນ ​​ແລະ ດີ​ເຄ ກອດ​ຄໍ​ກັນ​ທະລຸ​ເຂົ້າ​​ຮອບ​ຊີງ​ຊະນະ​ເລີດ ເຕະ​ບານ​ເຍົາ​ວະ​ຊົນ ຊີງ​ຂັນ​ປະ​ທານ​ສະ​ຫະ​ພັນບານ​ເຕະ ນວ
ຂຽນເມື່ອ: 16/09/2019 11:09 | ໂດຍ: ເພຣເມັກເກີ | ອ່ານ: 140 ຄັ້ງ

      ​​ສະ​ໂມ​ສອນ ​ວຽງ​ຈັນ ​ອາຄາ​ເດ​ມີ້ ​ເອັບ​ທີ ​ແລະ ສະ​ໂມ​ສອນ ດີ​ເຄ ​ເອັບ​ຊີ ສ້າງ​ຜົນງານ​ໄດ້​ຢ່າງ​ໂດດ​ເດັ່ນ ກອດ​ຄໍ​ກັນ ຜ່ານ​ເຂົ້າ​ຮອບ​ຊີງ​ຊະນະ​ເລີດ​ ເຊິ່ງຈະ​ຈັດ​ຂຶ້ນ ​ໃນ​ວັນ​ທີ 21 ກັນຍາ​ນີ້ ໃນການ​ແຂ່ງຂັນ​ເຕະ​ບານເຍົາ​ວະ​ຊົນ ປະ​ເພດ​ທີມ 11 ຄົນ ກໍຄື ຮຸ່ນ​ອາ​ຍຸບໍ່​ເກີນ 11 ປີ, 13 ປີ ແລະ 16 ປີ ຊີງ​ຂັນ​ປະ​ທານ​ສະ​ຫະ​ພັ​ນ​ບານ​ເຕະ ນະ​ຄອນ​ຫຼວງວຽງ​ຈັນ ປະ​ຈຳ​ປີ 2019 ເພື່ອ​ເປັນ​ການ​ເປີດ​ໂອ​ກາດ​​ໃຫ້​ນັກ​ກິ​ລາ​​ເຕະ​ບານຮຸ່ນ​ສືບ​ທອດຈາກ​ສະ​ໂມ​ສອນ​ອ້ອມ​ຂ້າງ 9 ຕົວ​ເມືອງ ທົ່ວ​ນະ​ຄອນ​ຫຼວງວຽງ​ຈັນ ​ໄດ້​ມີ​ໂອ​ກາດຫຼິ້ນ​ກິ​ລາ​ດັ່ງ​ກ່າວ​ເພື່ອພັດ​ທະ​ນາຕົນ​ເອງ​ກ້າວ​ສູ່​​ການເປັນ​ນັກ​ເຕະ​ອາ​ຊີບ ກໍ​ຄື ຕິດ​ທີມ​ຊາດ​ໃນ​ອະ​ນາ​ຄົດ.

      ການ​ແຂ່ງຂັນ​ເຕະ​ບານເຍົາ​ວະ​ຊົນ ປະ​ເພດ​ທີມ 11 ຄົນ ກໍຄື ຢູ-11 ປີ, ຢູ-13 ປີ ແລະ ຢູ-16 ປີ ຊີງ​ຂັນ​ປະ​ທານ​ສະ​ຫະ​ພັ​ນ​ບານ​ເຕະ ນະ​ຄອນ​ຫຼວງວຽງ​ຈັນ ປະ​ຈຳ​ປີ 2019 ອາທິດ​ທີ 2 ​ໃນ​ຮອບ​ຮອງ​ຊະນະ​ເລີດ ​ໄດ້​ສື​ບຕໍ່​ຈັດຂຶ້ນ ​ເມື່ອລະຫວ່າງ​​ວັນ​ທີ 14-15 ກັນຍາ ຜ່ານ​ມາ ທີ່​ສະໜາມກິລາ​ເຈົ້າ​ອານຸວົງ ​ເມືອງ​ຈັນທະ​ບູລີ ນະຄອນຫຼວງວຽງ​ຈັນ ​ໂດຍ​ມີ​ບັນດາ​ກອງ​ເຊຍ​ຈາກ​ສະ​ໂມ​ສອນ​ຕ່າງໆ​ເຂົ້າ​ຮ່ວມ​ຊົມ ​ແລະ ​ເຊຍ​ຫຼາຍ​ຮ້ອຍ​ຄົນ ສຳລັບ ຢູ-11 ​ແລະ ຢູ-13 ປີ ​ແບ່ງ​ເດີ່ນ​ໃຫຍ່ ອອກ​ເປັນ 2 ສະໜາມ ຄື ສະໜາມ 1 ​ແລະ ສະໜາມ 2 ​ແຂ່ງຂັນ ສ່ວນ ຢູ-16 ປີ ​ແຂ່ງຂັນ​ເດີ່ນ​ໃຫຍ່.

      ສຳລັບການ​ແຂ່ງຂັນ​ ​ໃນຕອນ​ເຊົ້າ​ວັນ​ທີ 14 ກັນຍາ 2019 ​​ແຂ່ງຂັນ 2 ຮຸ່ນ ​ໃນ​ຮອບ​ຮອງ​ຊະນະ​ເລີດ ​ເປັນ​ການ​ພົບ​ກັນ​ລະຫວ່າງ ຄູ່​ທີ 1 ຢູ-11 ສະ​ໂມ​ສອນ ວຽງ​ຈັນ ​ເອັບ​ທີ ພົບ​ກັບ ​ເຈົ້າ​ຖິ່ນ ນະຄອນຫຼວງ​ວຽງ​ຈັນ ​ແລະ ຄູ່​ທີ 2 ສະ​ໂມ​ສອນ ປະສານ​ໃຈ ພົບ​ກັບ ລ໋ອບ ສະ​ເຕດ້ຽມ ສ່ວນ ຢູ-13 ຄູ່​ທີ 1 ສະ​ໂມ​ສອນ ວຽງ​ຈັນ ​ເອັບ​ທີ ພົບ​ກັບ ສະ​ໂມ​ສອນ ທຣາມຟໍ​ເມ​ເຊິ​ນ ​ແລະ ຄູ່​ທີ 2 ສະ​ໂມ​ສອນ ດີ​ເຄ ພົບ​ກັບ ສະ​ໂມ​ສອນ​ຈິ​ງ​ໃຈ ຜ່າ​ນການ​ແຂ່ງຂັນ ຜົນ​ປະກົດ​ວ່າ: ຢູ-11 ວຽງ​ຈັນ ​ເອັບ​ທີ ສາມາດ​ໄລ່​ຖະຫຼົ່ມ​ເອົາ​ຊະນະ ​ເຈົ້າ​ຖິ່ນ ຂາດ​ຮອຍ 11-1 ປະຕູ ຜ່ານ​ເຂົ້າ​ຮອບ​ຊີງ​ຊະນະ​ເລີດ ພົບ​ກັບ ປະສານ​ໃຈ ທີ່​ເອົາຊະນະ ລ໋ອບ ສະ​ເຕດ້ຽມ ​ໄປ​ແບບຫວຸດ​ຫວິດ 2-1 ປະຕູ ສ່ວນ ຢູ-13 ວຽງ​ຈັນ ​ເອັບ​ທີ ​ຖະຫຼົ່ມ​ເອົາ​ຊະນະ ທຣາມຟໍ​ເມ​ເຊິ​ນ 8-1 ປະຕູ ​ຜ່ານ​ເຂົ້າ​ຮອບ​ຊີງ​ຊະນະ​ເລີດ ພົບ​ກັບ ດີ​ເຄ ທີ່​ເອົາ​ຊະນະ ຈິງ​ໃຈ 6-0 ປະຕູ ຂະນະ​ທີ່ ຢູ-16 ຮອບ​ຮອງ​ຊະນະ​ເລີດ ດີ​ເຄ ຖະຫຼົ່ມ​ເອົາ​ຊະນະ ຈິງ​ໃຈ 3-0 ປະຕູ ຜ່ານ​ເຂົ້າ​ຮອບ​ຊີງ​ຊະນະ​ເລີດ ພົບ​ກັບ ທະ​ເວັນ​ຕີ​ຊິກ ທີ່ພີ​ກ​ແຊງ​ຊະນະ ວຽງ​ຈັນ ​ເອັບ​ທີ 2-1 ປະຕູ ​ໂດຍນັດຊີງ​ຊະນະ​ເລີດ​ທັງ 3 ຮຸ່ນ​ດັ່ງກ່າວ ຈະສືບ​ຕໍ່​ຈັດ​​ຂຶ້ນ​ໃນ​ວັນ​ທີ 21 ກັນຍາ 2019 ໝົດ​ມື້ຈຶ່ງ​ຈະ​ສຳ​ເລັດ.         

      ລາຍການ​ດັ່ງກ່າວ ມີ 10 ສະ​ໂມ​ສອນ ​ເຂົ້າ​ຮ່ວມ​ແຂ່ງຂັນ ປະກອບ​ມີ ສະ​ໂມ​ສອນ ວຽງ​ຈັນ ອາຄາ​ເດ​ມີ້ ​ເອັບ​ທີ, ສະ​ໂມ​ສອນ ນະຄອນຫຼວງ​, ສະ​ໂມ​ສອນ ຈິງ​ໃຈ, ສະ​ໂມ​ສອນ ທະ​ເວັນ​ຕີ​ຊິກ ຢູ​ໄນ​ເຕັດ, ສະ​ໂມ​ສອນ ຕາ​ເວັນ, ສະ​ໂມ​ສອນ ລ໋ອບ ສະ​ເຕດ້ຽມ​, ສະ​ໂມ​ສອນ ​ດີ​ເຄ, ສະ​ໂມ​ສອນ ​ໄກ່ປ່າ, ສະ​ໂມ​ສອນ ປະສານ​ໃຈ ​ແລະ ສະ​ໂມ​ສອນ​ທຣາມຟໍ​ເມ​ເຊິ​ນ, ​ໃນ​ນັ້ນ ກໍ​ມີ​ບາງ​ສະ​ໂມ​ສອນ ສົ່ງທີ​ມ​ເຂົ້າ​ຮ່ວມ ຮຸ່ນ​ລະ 6 ພາກສ່ວນ ​ແຕ່ລະ​ຮຸ່ນຈັດ​ແບ່ງ​ອອກ​ເປັນ 2 ກຸ່ມ ​ແຕ່​ລະ​ກຸ່ມ ​ແຂ່ງຂັນ​ພົບ​ກັນໝົດ​ຄັດ​ເອົາ​ທີ 1-2 ຜ່ານ​ເຂົ້າ​ຮອບ​ຕໍ່​ໄປ ​ໃຊ້​ເວລາ 3 ອາທິດ ລະຫວ່າງ ວັນ​ທີ 7-21 ກັນຍາ 2019 ຈຶ່ງ​ສຳ​ເລັດ ການ​ແຂ່ງ​ຂັນໄດ້​ຮັບ​ການ​ສະ​ໜັບ​ສະ​ໜູນຫຼັກຈາກ​ບໍລິສັດ FBT, ສູນ​ຈຳ​ໜ່າຍ​ເຄື່ອງ​ກິ​ລາ​ຄົບ​ວົງ​ຈອນ ສະ​ເຕ​ດ້ຽມ​ສະ​ປອດ, ບໍລິສັດ ເອັສພີ ທີ່ປືກສາ-ກວດສອບບັນຊີ ແລະ ທີ່ປືກສາການລົງທຶນ ຈຳກັດ ​ແລະ ບໍລິສັດ ວິສາຫະກິດສ່ວນບຸກຄົນ ເອັສທີທີ ບໍລິຫານເຄື່ອງໃຫ້ເຊົ່າ ໃນ​ນັ້ນ ທັງ 3 ຮຸ່ນ​ດັ່ງກ່າວ ຈະ​ໄດ້​ຮັບ​ຂັນ​​ແຊ໋ມ ລາງວັນ​ກຽດ​ຕິ​ຍົດ​ຂອງ​ປະ​ທານ​ສະ​ຫະ​ພັນ​ບານ​ເຕະ ນະ​ຄອນ​ຫຼວງວຽງ​ຈັນ ຮຸ່ນ​ລະ 1 ໜ່ວຍ ພ້ອມ​ຫຼຽນຄຳ ສ່ວນ​ອັນ​ດັບ​ທີ 2 ​ແລະ ທີ 3 ຈະ​ໄດ້​ຮັບ​ຫຼຽນ​ເງິນ ​ແລະ ຫຼຽນ​ທອງ ​ຄ້ອງຄໍ.

ຂ່າວໂດຍ: ສົງ​ການ    

ພາບໂດຍ:​ດີ້ ສະເລີ

ສະໜັບສະໜູນຂ່າວໂດຍ: