ລາຍລະອຽດຂ່າວ
Kazuo ແລະ Rafael ເບິ້ນຄົນລະ 2 ປະຕູ ຊ່ວຍໃຫ້ລາວໂຕໂຢຕ້າ ຊະນະ ປກສ 4-0 ສະຫຼອງແຊ້ມສະໄໝທີ 3
ຂຽນເມື່ອ: 14/09/2019 18:09 | ໂດຍ: ເພຣເມັກເກີ | ອ່ານ: 131 ຄັ້ງ

       ການແຂ່ງຂັນບານເຕະແປ໋ບຊີ ລາວພຣີເມຍລີກດຳເນີນມາຮອດນັດປິດລະດູການໃນຕອນແລງຂອງມື້ນີ້ ໂດຍນັດປິດສະໜາມເປັນການພົບກັນລະຫວ່າງ ລາວໂຕໂຢຕ້າ ທີ່ຄອງແຊ້ມໄປກ່ອນໜ້ານີ້ແລ້ວພົບ ກັບ ປກສ ຮອງແຊ້ມເກົ່າ, ນັດນີ້ມີຄວາມມໝາຍສຳຄັນທັງຕໍ່ກັບສະໂມສອນ ລາວໂຕໂຢຕ້າ ແລະ ຕົວນັກເຕະຂອງ ລາວໂຕໂຢຕ້າທີ່ກຳລັງລຸ້ນດາວຊັນໂວກໍ່ຄື Kazuo Homma(ນັກເຕະຊາວຍິປຸ່ນ) ທີ່ຍິງໄປແລ້ວ 12 ປະຕູ ແລະ Rafael de sa Rodrigues(ນັກເຕະຊາວເບຣຊິນ) ທີ່ຍິງໄດ້ 11 ປະຕູ ທັງ 2 ມີປະຕູສະສົມຕາມຫຼັງ ແກ້ວວຽງເພັດ ລິດທິເດດ ຂອງ Master 7 ທີ່ຍິງໄດ້ 14 ປະຕູ.

       ເກມໃນນັດນີ້ ເປັນທາງລາວໂຕໂຢຕ້າ ເປີດເກມເຂົ້າໃສ່ ປກສ ແລະມາໄດ້ປະຕູຂຶ້ນນຳຈາກຈັງວະທີ່ Kazuo Homma ຫຼຸດເຂົ້າໄປໃນກອບເຂດໂທດແປບານໜີມືຜູ້ຮັກສາປະຕູ ເຂົ້າໄປແບບງ່າຍດາຍຕັ້ງແຕ່ນາທີ ທີ 11, ເຮັດໃຫ້ ລາວໂຕໂຢຕາຂຶນນຳ 1-0 ຈາກນັ້ນ ລາວໂຕໂຢຕ້າຍັງເດີນເກມເຂົ້າໃສ່ຢ່າງຕໍ່ເນື່ອງແລະມາໄດ້ ຈຸດໂທດຈາກຈັງວະທີ່ຜູ້ຫຼິ້ນຂອງ ປກສ ສະກັດ Rafael ໃນກອບເຂດໂທດ ແລະເປັນ Rafael ທີ່ລຸກຂຶ້ນມາສັງຫານປະຕູເຂົ້າໄປເຮັດໃຫ້ ລາວໂຕໂຢຕ້າ ຂຶ້ນນໍາ 2-0 ໃນນາທີໆ 18, ຈາກນັ້ນທັງ 2 ທີມບໍ່ສາມາເພີ່ມສະກໍໃຫ້ທີມຕົນເອງໄດ້ຈົບເຄິ່ງເວລາທີ່ 1 ລາວໂຕໂຢຕ້າ ອອກນຳ 2-0

      ກັບເຂົ້າສູ່ເຄິ່ງເວລາທີ 2​ ເກມຍັງຄົງເປັນຂອງ ລາວໂຕໂຢຕ້າ ທີ່ສາມາດຄອງບານໄດ້ຫຼາຍກວ່າ ແລະເປີດເກມບຸກເຂົ້າໃສ່ ຢ່າງຕໍ່ເນື່ອງ, ມາເຖິງນາທີ ທີ 54 ສະຖານະການຂອງ ປກສ ຕ້ອງພົບວິກິດເຂົ້າໄປອີກເມື່ອ ພະເສົາ ສີໂນນະລາວໂດດສຽບ 2 ຂາເຂົ້າໃສ່  Rafael ກໍາມະການຈົກໃບໃດໃຫ້ທັນທີ ຫຼັງຈາກນັ້ນ 2 ນາທີ ລາວໂຕໂຢຕ້າ ໄດ້ຈັງວະໂຕ້ກັບ ແລະເປັນ Kazuo Homma ຫຼຸດເຂົ້າໄປໃນກອບເຂດໂທດແລ້ວຫັກລົບກອງຫຼັງ ປກສ 1 ຈັງວະກ່ອນຍິງແສກໜ້າ ຜູ້ຮັກສາປະຕູເຂົ້າໄປ ລາວໂຕໂຢຕ້າ ອອກນຳ 3-0 ຈາກນັ້ນ ລາວໂຕໂຢຕ້າ ກໍ່ຍັງມີອີກຫຼາຍຈັງວະແຕ່ກໍ່ພາດໂອກາດໄປຢ່າງໜ້າເສຍດາຍ ຈົນມາຮອດ ນາທີ ທີ 81 Kazuo Homma ໂຊຄວາມໃຈກວ້າງໂດຍຫຼຸດເຂົ້າໄປໃນກອບເຂດໂທດ ກ່ອນທີ່ຈະຈ່າຍບານໃຫ້ Rafael ຍິງເຂົ້າໄປຢ່າງສວຍງາມ ລາວໂຕໂຢຕ້າ ໜີຫ່າງອອກໄປ 4-0 ຫຼັງຈາກນັ້ນລາວໂຕໂຢຕ້າກໍ່ຍັງມີຫຼາຍຈັງວະທີ່ຈະເພີ່ມປະຕູແຕ່ບໍ່ສຳເລັດຈົບເກມ ລາວໂຕໂຢຕ້າສະຫຼອງແຊ້ມສະໄໝທີ່ 4 ແລະ ເປັນສະໄໝທີ 3 ຕິດຕໍ່ກັນ, ພ້ອມທັງການເປັນດາວຊັນໂວຮ່ວມລະຫວ່າງ Kazuo Homma ແລະແກ້ວວຽງເພັດ ລິດທິເດດ.

ໂດຍ: ນັກຂ່າວເງົາ

ພາບ Kazuo Homma ຈາກ: ລາວໂຕໂຢຕ້າ

ສະໜັບສະໜູນຂ່າວໂດຍ: