ລາຍລະອຽດຂ່າວ
ໂຄ້ງສຸດທ້າຍ ເຕະບານສາຍ ກ ສຸດມັນ ແຊ້ມຍັງບໍ່ແນ່ວ່າຈະແມ່ນໃຜ ແລະອັນດັບ 3 ຫາ 8  ໃຜພາດມີສິດຖືກປ່ຽນອັນດັບ
ຂຽນເມື່ອ: 26/08/2019 16:08 | ໂດຍ: ເພຣເມັກເກີ | ອ່ານ: 279 ຄັ້ງ

      ການແຂ່ງຂັນບານເຕະ ສາຍ ກ ຫຼື Commando Lao Division 1 ຮອດອາທິດຜ່ານມາກໍ່ເດີນທາງມາເຖິງນັດທີ 16 ກັນແລ້ວ, ໄຮໄລຂອງການແຂ່ງຂັນອາທິດຜ່ານມາກໍ່ຄົງໜີບໍ່ພົ້ນ ການມາບຽດຍາດຕຳແໜ່ງແຊ້ມຂອງທີມ ກະຊວງປ້ອງກັນຄວາມສະຫງົບ(ປກສ) ທີ່ສາມາດພິກກັບມາເອົາຊະນະ ທີມນະຄອນຫຼວງໄປໄດ້ແບບສຸດມັນ 3-2 ຫຼັງຈາກໃນຕົ້ນເກມ ຖືກ ນະຄອນຫຼວງ ອອກນຳໄປກ່ອນຕັ້ງແຕ່ 15 ນາທີທຳອິດ 2 ປະຕູເຮັດໃຫ້ ປກສເກັບ 3 ແຕ້ມສຳຄັນລວມຜົນ 16 ນັດ ປກສ ມີ 41 ຄະແນນເທົ່າກັບ ທີມຊ້າງນ້ອຍ ທີມອັນດັບ 1 ຂອງຕາຕະລາງທີ່ພາດທ່າ ເສຍໃຫ້ ທີມກອງທັບ 1-4 ແຕ່ຊ້າງນ້ອຍມີປະຕູໄດ້ເສຍທີ່ດີກວ່າຍັງຮັກສາອັນດັບ 1 ໄວ້ຄືເກົ່າ.

      ສ່ວນຜົນຄູ່ອື່ນໆ ໃນອາທິດນີ້ໃນວັນເສົາວັນທີ 24/08/2019 ມຊ FC ຊະນະ Quest United 5-1, ແຂວງວຽງຈັນ ເສຍໃຫ້ ວຽງຈັນ FT 0-1, ແລະ Trinity FC ກໍ່ຊະນະເປັນນັດທຳອິດຂອງລະດູການ ໂດຍເອົາຊະນທີມ KPS ໄປດ້ວຍສະກໍ 3-1 ເຮັດໃຫ້ Trinity ເຂ່ຍ KPS ໄປຢູ່ ອັນດັບສຸດທ້າຍ ຂອງຕາຕະລາງ.

      ສຳລັບຜົນການແຂ່ງຂັນໃນວັນທີ 25/08/2019 ສະໂມສອນ ນະຄອນຫຼວງ ເສຍໃຫ້ ປກສ 2-3, Master 7 ຊະນະ Bear lao Academy 3-1 ແລະ ຊ້າງນ້ອຍ ເສຍໃຫ້ ກອງທັບ 1-4. ສົ່ງຜົນໃຫ້ ອັນດັບ 3 ຕົກເປັນ ທີມກອງທັບ ມີ 31 ຄະແນນ, ອັນດັບ 4 ເປັນ ນະຄອນຫຼວງ ມີ 30 ຄະແນນ, ອັນດັບ 5 ເປັນ ມຊ FC ມີ 26 ຄະແນນ, ອັນດັບ 6 ເປັນທີມ ວຽງຈັນ FT 25 ຄະແນນ, ອັນດັບ 7 ເປັນທີມ Master 7 ມີ 20 ຄະແນນ ແລະ ອັນດັບ 8 ເປັນທີມ Bear lao Academy ມີ 19 ຄະແນນ. ການແຂ່ງຂັນລະດູການນີ້ຍັງເຫຼືອ 6 ນັດເຮັດໃຫ້ ທຸກທີມຈະຕ້ອງຂັບຂ້ຽວກັນຢ່າງເຕັມທີ່ຖ້າທີມໃດພາດກໍ່ມີສິດຖືກປ່ຽນອັນດັບທີ ທັນທີ. ເຊິ່ງການແຂ່ງຂັນໃນປີນີ້ເຫັນວ່າແຟນບານເຕະລາວ ບໍ່ຄວນພາດເພາະມີຄວາມສູສີ ແລະໜ້າຕິດຕາມເປັນຢ່າງຍິງ.

 

ຂ່າວໂດຍ: ນັກຂ່າວເງົາ

ພາບຈາກ: ສຕລ

 

 

 

ສະໜັບສະໜູນຂ່າວໂດຍ:



ຂ່າວລ່າສຸດ