ລາຍລະອຽດຂ່າວ
ຮົງ​ກົງ ກວາດ​ແຊ໋ມຣັກບີ້ ຢູ-20 ທີ​ມຍິງ-ຊາຍ ລາຍການ ຊີງ​ແຊ໋ມອາຊີ 2019 ສ່ວນ​ລາວ​ທັງ 2 ຮຸ່ນໄດ້​ທີສຸດທ້າຍ
ຂຽນເມື່ອ: 26/08/2019 14:08 | ໂດຍ: ເພຣເມັກເກີ | ອ່ານ: 21 ຄັ້ງ

          ທັບ​ນັກ​ກິລາຣັກບີ້​ທີ​ມຊາດ​ຮົງ​ກົງ ທັງ​ປະ​ເພດ​ທີ​ມຍິງ ​ແລະ ທີ​ມຊາຍ ປະກາດ​ຄວາມ​ຍິງ​ໃຫຍ່​ໃນ​ໃນ​ຂົງ​ເຂດ​ອາຊີ ດ້ວຍ​ການຄອງ​ຕຳ​ແໜ່​ງແຊ໋ມການ​ແຂ່ງຂັນ​ກິລາຣັກບີ້ 7 ຄົນ  ປະ​ເພດ​ທີ​ມຍິງ ​ແລະ ທີ​ມຊາຍ ຮຸ່ນ​ອາຍຸ​ບໍ່​ເກີນ 20 ປີ ຫຼື ຢູ-20 ລາຍການ ດິວິ​ຊັ່ນ 1 ຊີງ​ແຊ໋ມອາຊີ ປຸະຈຳປີ 2019 ທີ່​ສປປ ລາວ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 24-25 ສິງຫາ​ ຜ່ານ​ມາ ທີ່​ສະໜາມກິລາ​ເຈົ້າ​ອານຸວົງ ນະຄອນຫຼວງ​ວຽງ​ຈັນ. ຂະນະ​ທີ່ ທັບ​ນັກ​ກິລາຣັກບີ້ທີ​ມ ຍິງ ​ແລະ ທີ​ມຊາຍ​ທີ​ມຊາດ​ລາວ ​​ໄດ້​ທີສຸດທ້າຍ.  ​ ​

​          ການ​ແຂ່ງຂັນກິລາຣັກບີ້ ຢູ-20 ປີ ທີ​ມຍິງ-ທີ​ມຊາຍ ຊີງ​ແຊ໋ມອາຊີ 2019 ​ໂດຍສປປ ລາວ ຮັບ​ກຽດ​ເປັນ​ເຈົ້າພາບ ຈັດ​ຂຶ້ນ ​ລະຫວ່າງ​ວັນ​ທີ 24-25 ສິງຫາ ຜ່ານ​ມາ ທີ່​ສະໜາມກິລາ​ເຈົ້າ​ອານຸວົງ ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ທ່ານ ນາງ ພູ​ໄຊ ​ແພງ​ພົງ ຮອງ​ຫົວໜ້າ​ກົມ​ກິລາ​ລະ​ດັບ​ສູງ ​ແລະ ທ່ານ ວິຣະຢຸດ ຣາຕິ​ກຸ​ນ ປະທານ​ສະຫະພັນ​ກິລາຣັກບີ້​ແຫ່ງ​ຊາດ​ລາວ, ຜູ້ຕາງໜ້າ​ສະຫະພັນ​ກິລາຣັກບີ້​ອາຊີ, ຜູ້​ອຳນວຍ​ການ​ໂຄງການ ຊ່ວຍ​ເຫຼືອ​ພັດທະນາ​ກິລາຣັກບີ້​ເຍົາວະ​ຊົນ ຈາກ​ລັດຖະບານ​ ອົດ​ສະຕາລີ ຫຼື ອອສ​ເຕຣ​ເລຍ ​ຜູ້​ໃຫ້ການ​ສະໜັບສະໜູນ, ຄະນະ​ນຳ, ຄູ​ຝຶກ ​ແລະ ນັກ​ກິລາ​ປະ​ເທດ​ຕ່າງໆ, ຄະນະ​ບໍລິຫານ​ງານ​ສະຫະພັນ​ກິລາຣັກບີ້​ແຫ່ງ​ຊາດ​ລາວ ພ້ອມ​ດ້ວຍພະນັກງານ​ທີ່​ກ່ຽວຂ້ອງ, ກອງ​ເຊຍ ​ແລະ ສື່​ມວນ​ຊົນ​ບາງ​ຂະ​ແໜງ​ການ​ເຂົ້າ​ຮ່ວມຢ່າງ​ຫຼວງ​ຫຼາຍ.

          ການ​ແຂ່ງຂັນຣັກຊີງ ຢູ-20 ປີ ຍິງ-ຊາຍ ປະ​ເພດ 7 ຄົນ ຊີງ​ແຊ໋ມອາຊີ ​​ໄດ້​ຮັບການ​ສະໜັບສະໜູນ​ຫຼັກ 10 ພັນ​ໂດ​ລາ​ສະຫະລັດ ຈາກໂຄງການຊ່ວຍ​ເຫຼືອ​ພັດທະນາ​ກິລາຣັກບີ້​ເຍົາວະ​ຊົນ ລັດຖະບານ ອົດ​ສະ​ຕາ​ລີ ລາຍການ​ດັ່ງກ່າວ ​ມີ 9 ປະ​ເທດ​ເຂົ້າ​ຮ່ວມ​ຊີງ​ໄຊ ປະກອບ​ມີ ​ໃຕ້​ຫວັນ, ຮົງ​ກົງ, ອິນ​ເດຍ, ມາ​ເລ​ເຊຍ, ​ໄທ, ສິງກະ​ໂປ, ສ ​ເກົາຫຼີ​, ອຸ​ເບ​ກີ​ດສະຖານ ​ແລະ ສປປ ລາວ, ​ໃນ​ນັ້ນ ປະ​ເພດ​ທີ​ມຊາຍ ​ມີ 8 ທີ​ມ ​ແບ່ງ​ອອກ​ເປັນ 2 ກຸ່ມ ຄັດ​ເອົາ​ທີ​ມ ທີ່​ມີ​ຄະ​ແນນ​ດີ​ທີ່​ສຸດ ຈຳນວນ 4 ທີ​ມ ຂຶ້ນ​ໄປ​ຫຼິ້ນ​ໃນ​ດິວິ​ຊັ່ນ l ​ແລະ ທີ​ມທີ່​ເສຍ ລົງ​ໄປ​ຫຼິ້ນ​ໃນ​ດິວິ​ຊັ່ນ ll ສຳລັບກຸ່ມ ​ເອ ມີ ໃຕ້​ຫວັນ, ຮົງ​ກົງ ​ແລະ ອຸ​ເບ​ກີ​ດສະຖານ ສ່ວນ ກຸ່ມ ບີ ມີ  ໄທ, ສິງກະ​ໂປ, ສ ​ເກົາຫຼີ​ ​ແລະ ສປປ ລາວ

      ຂະນະ​ທີ່​ປະ​ເພດ​ທີ​ມຍິງ ມີ 5 ທີ​ມ ປະກອບ​ມີ ໄທ, ສິງກະ​ໂປ, ຮົງ​ກົງ, ອິນ​ເດຍ ​ແລະ ສປປ ລາວ ຈັດ​ເປັນ​ກຸ່ມ​ດຽວ ຄັດ​ເອົາ​ທີີມທີ່​ມີ​ຄະ​ແນນ​ດີ​ອັນ​ດັບ​ທີ 1-2 ​ໄປ​ຊີງ​ຊະນະ​ເລີດ ​​ໃນ​ຂັນ​ດິວິ​ຊັ່ນ l ແລະ 3 ​ທີ​ມທີ່​​ເສຍ​ລົງ​ໄປ​ຫຼິ້ນ​ໃນ​ດິວິ​ຊັ່ນ ll ຜ່ານ​ການ​ແຂ່ງຂັນ​ຜົນ​ປະກົດ​ວ່າ: ປະ​ເພດ​ທີ​ມຊາຍ ດິວິ​ຊັ່ນ l ​ແຊ໋ມຕົກ​ເປັນ​ຂອງ ຮົງ​ກົງ ສ່ວນ​​ແຊ໋ມທີ​ມຍິງ ​ກໍແມ່ນຮົງ​ກົງ ​ໄດ້​ຄອງ​ແຊ໋ມ​ເຊັ່ນ​ກັນ ຂະນະ​ທີ່​ຂັນ​ດິວິ​ຊັ່ນ ll ​ແຊ໋ມ​ທີ​ມຊາຍ ​ແມ່ນ ມາ​ເລ​ເຊຍ ​ແລະ ​​ແຊ໋ມທີ​ມຍິງແມ່ນອິນ​ເດຍ.

 

 ​ໂດຍ ສົງການ

ສະໜັບສະໜູນຂ່າວໂດຍ:



ຂ່າວລ່າສຸດ