ລາຍລະອຽດຂ່າວ
ກະຕໍ້ຄູ່ຍິງລາວລົງປະເດີມສະຫນາມ ເອົາຊະນະ ມາເລເຊຍ ຂາດຮອຍ ສ່ວນຄູ່ຊາຍພິກສະຖານະການແຊງຊະນະ ມຽນມາ
ຂຽນເມື່ອ: 26/08/2019 14:08 | ໂດຍ: ເພຣເມັກເກີ | ອ່ານ: 83 ຄັ້ງ

      ການປ້ອງກັນແຊ້ມໂລກ ຂອງທີມກະຕໍ້ ຄູ່ຊາຍຂອງລາວ ທີ່ລົງແຂ່ງຂັນກິລາກະຕໍ້ຊິງແຊ້ມໂລກ ລາຍການ King’s Cup Sepaktakraw World Championship 2019 ຄັ້ງທີ 34 ທີ່ປະເທດໄທ. ການຊິງຂັນເຈົ້າຊີວິດໄທ ໄດ້ໄຂຂຶ້ນເປັນທາງການ ທີ່ສູນການຄ້າ ແຟຊັ່ນໄອແລນ, ນະຄອນຫລວງບາງກອກ ປະເທດໄທ ເລີ່ມຕົ້ນວັນທີ 25 ສິງຫາ 2019 ໂດຍມີ 31 ປະເທດ ແລະ ເຂດແຄວ້ນເຂົ້າຮ່ວມ. ກະຕໍ້ທີມຄູ່ຊາຍຂອງລາວເຮົາໃນຖານະແຊ້ມເກົ່າ ລົງແຂ່ງນັດທຳອິດຂອງສາຍ A ພົບກັບຄູ່ປັບເກົ່າ ມຽນມາ ເຊັດທີ 1 ເປັນມຽນມາຊະນະກ່ອນແບບວຸດວຸດ 21-19 ເຂົ້າສູ່ເຊັດທີ 2 ລາວເຮົາເອົາຊະນະຄືນວຸດວິດເຊັ່ນກັນ 21-19 ເຮັດໃຫ້ຕ້ອງມາດວນກັນທີ່ເຊັດຕັດສິນ ແລະ ເປັນທີມຊາດລາວ ມີເກມບຸກ ແລະ ເກມຮັບໄດ້ດີກວ່າ ໃນທ້າຍໆເຊັດ ສາມາດແຊງຊະນະ ມຽນມາ ວຸດວິດ 24-22 ຄະແນນ ຄວ້າໄຊມາຄອງໄດ້ ເຮັດໃຫ້ໂອກາດເຂົ້າຮອບ 8 ທິມສຸດທ້າຍສົດໃສ.
ນັດທີ 2 ຂອງສາຍ A ລາວເຮົາ ຈະພົບກັບ ໄຕ້ຫວັນ ໃນວັນທີ 26 ສິງຫານີ້ ເວລາ 10:00.

      ສຳລັບສາຍອື່ນປະເພດກະຕໍ້ຄູ່ຊາຍ ສາຍ B ປະກອບມີ: ຍີ່ປຸ່ນ, ຫວຽດນາມ ແລະ ບຣູໄນ, ສາຍ C: ສາທາລະນະລັດເກົາຫລີ, ມາເລເຊຍ ແລະ ສະຫະລັດອາເມຣິກາ, ສາຍ D: ຟີລິບປິນ, ອີຣານ, ອິນໂດເນເຊຍ ແລະ ສປ ຈີນ.
      ຮູບແບບການແຂ່ງຂັນລາຍການນີ້ພົບກັນໝົດໃນສາຍ ແລ້ວຄັດເອົາທີ 1 ແລະ 2 ຂອງສາຍເຂົ້າສູ່ຮອບ 8 ທິມສຸດທ້າຍຕໍ່ໄປ, ທີ 1 ສາຍ A ພົບທີ 2 ສາຍ B, ທີ 1 ສາຍ B ພົບທີ 2 ສາຍ A ທີ 1 ສາຍ C ພົບທີ 2 ສາຍ D ທີ 1 D ພົບທີ 2 ສາຍ C

      ສ່ວນປະເພດທິມຄູ່ຍິງລາວເຮົາເປັນແຊ້ມເກົ່າເຊັ່ນກັບທິມຄູ່ຊາຍ ລົງແຂ່ງນັດທີ 1 ຂອງສາຍ A ໃນແລງຂອງວັນທີ 25 ສິງຫາ ຊະນະ ມາເລເຊຍ ຂາດຮອຍ 2-0 ເຊັດ: 21-5 21-6 ນັດທີ 2 ຈະພົບກັບ ກຳປູເຈຍ ໃນວັນທີ 26 ສິງຫານີ້ ເວລາ 11:30.

      ໃນມື້ອື່ນມີດັ່ງນີ້: ສາຍ B ຫວຽດນາມ, ສປ ຈີນ, ເຢຍລະມັນ, ສາຍ C: ຍີ່ປຸ່ນ, ໄຕ້ຫວັນ, ອີຣັກ, ສາຍ D: ສາທາລະນະລັດເກົາຫລີ, ອິນໂດເນເຊຍ, ອີຣານ ແລະ ປາກິດສະຖານ. ຮູບແບບການແຂ່ງຂັນເຊັ່ນດຽກັບຄູ່ຊາຍ.

        ການແຂ່ງຂັນກະຕໍ້ຊິງແຊ້ມໂລກ ລາຍການ King’s Cup Sepaktakraw World Championship ຄັ້ງທີ 34 ຊິງຂັນເຈົ້າຊີວິດໄທຄັ້ງນີ້ ມີ 31 ປະເທດ ແລະ ເຂດແຄວ້ນເຂົ້າຮ່ວມ, ແບ່ງເປັນສອງລະດັບຄື: ລະດັບສູງສຸດ (Premier) ແລະ ລະດັບ ດີວີຊັ່ນ 1 (Division 1) ແຂ່ງຂັນໃນລະຫວ່າງວັນທີ 25 ສິງຫາ-1 ກັນຍາ 2019.
ສະເພາະທັບກະຕໍ້ລາວເຮົາທັງຍິງ ແລະ ຊາຍຢູ່ລະດັບສູງສຸດ (Premier) ໃນ 4 ລາຍການຄື: ທິມຊຸດຍິງ-ຊາຍ ແລະ ຄູ່ຍິງ-ຊາຍ, ສ່ວນລາຍການກະຕໍ້ລອດບ້ວງ ແມ່ນເປີດກວ້າງໃຫ້ທຸກທິມເຂົ້າຮ່ວມ.



#ເຊຍລາວ
#Cheerlao
#Cr: เซปัก ตะกร้อ – Sepak Takraw & Jai Keophaserd

ສະໜັບສະໜູນຂ່າວໂດຍ:



ຂ່າວລ່າສຸດ