ລາຍລະອຽດຂ່າວ
ມິຕິໃໝ່ ແຫ່ງວົງການບານເຕະລາວ Commando Cup ທີມຈາກລາວພຣີເມຍລີກ ປະທະທີມ ສາຍ ກ
ຂຽນເມື່ອ: 03/07/2019 22:07 | ໂດຍ: ເພຣເມັກເກີ | ອ່ານ: 221 ຄັ້ງ

      ໃນຕອນບ່າຍຂອງມື້ນີ້ວັນທີ 03/07/2019, ທີ່ຫ້ອງປະຊຸມຊັ້ນ 3 ຂອງ ສຕລ (ສະຫະພັນບານເຕະແຫ່ງຊາດລາວ) ໄດ້ມີພິທີ ຖະແຫຼງຂ່າວ ການແຂ່ງຂັນບານເຕະ ໃນລາຍການ Lao Commando Division 1 ທີ່ທຳການແຂ່ງຂັນກັນຕັ້ງແຕ່ວັນທີ 4 ພຶດສະພາ 2019 ເປັນຕົ້ນມາ, ພ້ອມກັບ ລາຍການ LFF Commando Cup ທີ່ຮູບແບບການແຂ່ງຂັນຄ້າຍຄືກັບ FA Cup ຂອງຕ່າງປະເທດ ຕ່າງແຕ່ວ່າ ຖ້າສະເໝີ ກັນຍິງຈຸດໂທດຕັດສິນຫາຜູ້ເຂົ້າຮອບທັນທີ. ການຖະແຫຼງຂ່າວໃນຄັ້ງນີ້ໂດຍມີທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ສິນທະນະສັກ ອັດສະຣະສີ ຜູ້ບໍລິຫານ ( Chief Executive Officer ) ບໍລິສັດ ກຣຸງສະຫຍາມ ເບເວີເຣສ ຈຳກັດ Krung Siam Beverage Co.,Ltd , ທ່ານ ສາມາດ ອັດສະຣະສະກອນ ຜູ້ອໍານວຍການການຕະຫຼາດ (CHIEF MARKETING OFFICER) ບໍລິສັດ ກຣຸງສະຫຍາມ ເບເວີເຣສ ຈຳກັດ Krung Siam Beverage Co.,Ltd ພ້ອມດ້ວຍຄະນະບໍລິຫານ ສຕລ, ຄະນະບໍລິຫານງານບໍລິສັດ Krung Siam Beverage Co.,Ltd, ຕົວແທນຈໍາໜ່າຍທາງການເຄື່ອງດື່ມຄອມມານໂດປະຈໍາ ສປປ ລາວ, ຕາງຫນ້າ ສະໂມສອນ ໃນ ເປບຊີ ລາວພຣີເມຍລີກ , ຕາງຫນ້າ ສະໂມສອນ ໃນ ຄອມມານໂດ ສາຍ ກໍ ແລະ ບັນດາສື່ມວນຊົນ ເຂົ້າຮ່ວມຢ່າງພ້ອມພຽງ.

ນອກຈາກນີ້, ໃນພິທີໄດ້ມີການເຊັນສັນຍາສະໜັບສະໜູນ ການຈັດການແຂ່ງຂັນບານເຕະ ສາຍ ກ (Lao Commando Division 1), ການແຂ່ງຂັນລາຍການ LFF Commando Cup ແລະ ການແຂ່ງຂັນນັດມິດຕະພາບ ແລະ ນັດທີ່ທີມຊາດລາວລົງແຂ່ງຂັນທີ່ປະເທດລາວ ທຸກນັດ ຈົນເຖິງປີ 2021 ລວມມູນຄ່າການສະໜັບສະໜູນທັງໝົດ 1.140.000.000(ໜຶ່ງຕື້ໜຶ່ງຮ້ອຍສີ່ສິບລ້ານກີບ).

      ຫຼັງຈາກນັ້ນໄດ້ມີພິທີການຈົກສະຫຼາກປະກົບຄູ່ການແຂ່ງຂັນ LFF Commando Cup ເຊິ່ງມີທີມເຂົ້າຮ່ວມແຂ່ງຂັນທັງໝົດ 14 ທີມຈາກ ລາວພຣີເມຍລີກ ແລະ ສາຍ ກ ເຊິ່ງຕາມການກະຕິກາການແຂ່ງຂັນລາຍການນີ້ສະໂມສອນທີ່ມີທີມລົງແຂ່ງຂັນທັງ 2 ລີກ ສາມາດສົ່ງທີມເຂົ້າຮ່ວມແຂ່ງຂັນໄດ້ພຽງ ທີມດຽວ ແລະ ຜົນຂອງການຈົກສະຫຼາກປະກົດວ່າ

ສະໂມສອນ ປກສ ເອັຟຊີ ພົບ ສະໂມສອນ ມາສເຕີ້ ເຊເວັ້ນ ເອັຟຊີ,

 ສະໂມສອນ ເຄວສ ຢູໄນເຕັດ ພົບ ສະໂມສອນ ວຽງຈັນ ເອັຟທີ ,

ສະໂມສອນ ວຽງຈັນ ເອັຟຊີ ຈາກແຂວງວຽງຈັນ ພົບ ສະໂມສອນ ລາວໂຕໂຢຕ້າ ເອັຟຊີ,

ສະໂມສອນ ກອງທັບ ເອັຟຊີ ພົບ ສະໂມສອນ ຊ້າງນ້ອຍ ເອັຟຊີ,

 ສະໂມສອນ ນະຄອນຫລວງ ເອັຟຊີ ພົບ ສະໂມສອນ ແບລາວ ອະຄາເດມີ,

 ສະໂມສອນ ມຊ ເອັຟຊີ ພົບ ສະໂມສອນ ອີໂວ ຢູໄນເຕັດ

       ສ່ວນ 2 ສະໂມສອນ ຄື: ສະໂມສອນ ເຄພີເອັສ ເອັຟຊີ ແລະ ສະໂມສອນ ທຣີນີ້ຕີ ແມ່ນຈັບສະຫລາກໄດ້ຢືນຖ້າໃນຮອບ 8 ທີມສຸດທ້າຍ ໂດຍ ຈະເລີ້ມແຂ່ງຂັນໃນວັນທີ 13 ກໍລະກົດ 2019 ສ່ວນເວລາ ແຂ່ງຂັນ ແລະ ສະຫນາມ ແມ່ນຈະແຈ້ງໃຫ້ຮັບຊາບຕາມພາຍຫລັງ.

ຂ່າວໂດຍ: ໃຈລາສີ

ພາບຈາກ: ສຕລ

ສະໜັບສະໜູນຂ່າວໂດຍ:



ຂ່າວລ່າສຸດ