ລາຍລະອຽດຂ່າວ
ໂຮມ​ຊັບ ປາບ​ແຊ໋ມ​ເກົ່າ ​ເອັດ​ທີ​ທີ 1-0 ​ເກັບ 3 ​​ແຕັມ ​ເຕະບານ ຊີງ​ຂັນ​ບໍລິສັດ ຈີ​ເອັດ ​ແບັດ​ເຕີຣີ ຄັບ 2019  
ຂຽນເມື່ອ: 03/07/2019 11:07 | ໂດຍ: ເພຣເມັກເກີ | ອ່ານ: 135 ຄັ້ງ

           ທີ​ມນ້ອງ​ໃໝ່ ບໍລິສັດ ​ໂຮມ​ຊັບ ກໍ່ສ້າງ ປະ​ເດີມ​ສະໜາມ​ໄດ້​ຢ່າງ​ສວຍ​ງາມ ຫຼັງ​​ໂຊ​ຟອມ​ເກັ່ງ​ປາບ​ແຊ໋ມ​ເກົ່າ ທີ​ມ​ເອັດ​ທີ​ທີ ​ໄປ​ແບບ​ຫວຸດ​ຫວິດ 1-0 ປະຕູ ​ເກັບ 3 ຄະ​ແນນ ຫຍັບ​ຂຶ້ນ​ເປັນອັນ​ດັບ​ທີ 2 ຂອງ​ກຸ່ມ D ການ​ແຂ່ງຂັນກິລາ​ເຕະບານ ຮຸ່ນ​ຊາວໜຸ່ມ ຊີງ​ຂັນ​ບໍລິສັດ ຈີ​ເອັດ ​ແບັດ​ຕີ​ເຣີ ຄັ້ງ​ທີ ll ປະຈຳ​ປີ 2019 ​ຫຼື ລາຍການ ຈີ​ເອັດ ​ແບັດ​ເຕີຣີ ຄັບ 2019 ຂະນະ​ທີ່​ຮຸ່ນ​ອາວຸ​ໂສ ອາຍຸ 40 ປີ ​ທີ​ມປະສານ​ມິດ ດີກຣີ​ແຊ໋ມຂັນລິດ​ເດີ ຄັບ 2018 ປະ​ເດີມ​ສະໜາມນັດ​ແຮກ​ກໍ​ເອົາ​ຊະນະ ທີ​ມປາ​ໄຊ​ມ້ອນ 3-1 ປະຕູ.

           ນັດ​ເປີດ​ສະໜາມ​ການ​ແຂ່ງຂັນ​ເຕະບານ ຮຸ່ນ​ຊາວໜຸ່ມ ​ແລະ ອາວຸ​ໂສ​ຮຸ່ນອາຍຸ 40 ປີ​ຂຶ້ນ​ໄປ ຊີງ​ຂັນ​ບໍລິສັດ ຈີ​ເອັດ ​ແບັດ​ຕີ​ເຣີ ຄັ້ງ​ທີ ll ປະຈໍາ​ປີ 2019 ​ໄດ້​ມີ​ຂຶ້ນ ​ເມື່ອ​ລະຫວ່າງ​ວັນ​ທີ ​​29-30 ມິຖຸນາ​ນີ ຜ່ານ​ມາ ທີ່​ສະໜາມກິລາ​ເຕະບານ​ຫຍ້າ​ທຽມ ປະສານ​ໃຈ ບ້ານ​ໜອງ​ພະຍາ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ​ເຂົ້າ​ຮ່ວມ​ຂອງ​ທ່ານ ບຸນ​ທົງ ສີ​ຫາ​ລາດ ປະທານ​ຄະນະ​ຮັບຜິດຊອບ​ຈັດການ​ແຂ່ງຂັນ ທັງ​ເປັນ​ເຈົ້າ​ຂອງ​ສະໜາມກິລາ​ເຕະບານ​ຫຍ້າ​ທຽມ ປະສານ​ໃຈ ​ມີ​ບັນດາ​ຄູ​ຝຶກ, ນັກ​ກິລາ ​ແລະ ກອງ​ເຊຍ​ແຕ່ລະ​ທີ​ມ​ເຂົ້າ​ຮ່ວມົຊມ ​ແລະ ​ເຊຍ​ຢ່າງ​ຫຼວງ​ຫຼາຍ.

ການ​ແຂ່ງຂັນລາຍການ​ນີ້ ​ຈັດ​ຂຶ້ນ ກໍເພື່ອ​ເປັນ​ການ​ສືບ​ຕໍ່​ສົ່ງ​ເສີ​ມນັກ​ກິລາ​ໜຸ່ມ​ນ້ອຍ​ໃຫ້​ມີ​ປະສົບ​ການ​ສາມາດ​ພັດທະນາ​ຕົນ​ເອງ​ກາຍ​ເປັນ​ນັກ​ກິລາ​ໃຫ້​ແກ່​ນະຄອນຫຼວງ​ວຽງ​ຈັນ ​ແລະ ບັນດາ​ສະ​ໂມ​ສອນ​ຕ່າງໆ ​ເພື່ອ​ເຂົ້າ​ຮ່ວມ​ການ​ແຂ່ງຂັນ​ລະດັບ​ຊາດ ​ກໍ​ຄື ຕິດ​ທີ​ມຊາດ​ໃນ​ອະນາຄົດ ສໍາລັບ​ເງື່ອນ​ໄຂ​ຂອງນັກ​ກິລາ​​ເຂົ້າ​ຮ່ວມ​ແຂ່ງຂັນ ສະ​ເພາະ​ຮຸ່ນ​ຊາວ​ໜຸ່ມ​ແມ່ນບໍ່​ໃຫ້ນັກ​ກິລາ​ທີ​ມຊາດຊຸດ​ໃຫຍ່​​ໃນ​ປັດຈຸບັນ ​ແລະ ນັກ​ກິລາ​ທີ່​ກຳລັງ​ແຂ່ງຂັນ​ລາຍການ ​ເປ​ບຊີ ລາວ ​ພຣີ​ເມຍ​ລີກ ​ເຂົ້າ​ຮ່ວມ​ແຂ່ງຂັນ​ເດັດຂາດ ສ່ວນນັກ​ກິລາ​ລະດັບ ສາຍ ກ ​ແມ່ນ​ສາມາດ​ສົ່ງ​ເຂົ້າ​ຮ່ວມ​ແຂ່ງຂັນ​ໄດ້ ຕ້ອງ​ມີ​ນັກ​ກິລາ​ຮ່ວມທີ​ມ​ໄດ້​ທີ​ມລະ 15 ຄົນ ສຳລັບຮຸ່ນຊາວ​ໜຸ່ມ​ທົ່ວ​ໄປມີ​ 16 ທີ​ມ ​ເຂົ້າ​ຮ່ວມ​ແຂ່ງຂັນ ​ແບ່ງ​ອອກ​ເປັນ 4 ກຸ່ມ ສ່ວນ​ອາວຸດ​ໂສ ກຳນົດ​ເອົາ​ແຕ່ 10 ພາກສ່ວນ ຈັດ​ເປັນ 2 ​ກຸ່ມ ທັງ 2 ຮຸ່ນ​ດັ່ງກ່າວ ແຕ່​ລະ​ກຸ່ມ​ແຂ່ງຂັນ​ພົບ​ກັບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ.

          ການ​ແຂ່ງຂັນ​ນັດ​ປະ​ເດີມ​ສະໜາມທຳ​ອິດ​ແຕ່ລະ​ທີ​ມຂອງ 2 ຮຸ່ນ​ດັ່ງກ່າວ ​ເມື່ອ​ທ້າຍ​ອາທິດ​ທີ່​ຜ່ານ​ມາ ຜົນ​ປະກົດ​ວ່າ: ​ໃນ​ຮຸ່ນ​ຊາວ​ໜຸ່ມ ກຸ່ມ D ທີ​ມບໍລິສັດ ​ໂຮມ​ຊັບ ກໍ່ສ້າງ ສາມາດ​ຫຼົ້ມ​ແຊ໋ມ​ເກົ່າ 1-0 ປະຕູ, ຫອດ​ດ໋ອກ ຊະນະ ບໍລິສັດ 3​ເອັດ ​7-3 ປະຕູ, ກຸ່ມ A ທີ​ມ​ເອັນ​ເອັນ ຊີ​ໂອ ຊະນະ ​ເຟຣມຊິ​ບ 5-2 ປະຕູ ​ແລະ ມາ​ຊດ້າ ຖະຫຼົ່ມ ​ເຄພີ ອໍ​ໂຕ​ໂມ​ຖີບ 15-1 ປະຕູ, ກຸ່ມ B ລູກ​ນໍ້າ​ຂອງ ​ເສຍ ຍອດ​ຊາຍ 2-5 ປະຕູ, ​ແມນ​ຊໍ້າ ​ເສຍ ​ເພື່ອນ​ກັນ 7-8 ປະຕູ ​ແລະ ກຸ່ມ C ດີ​ເຄ ຄອນ​ເກຼັດ ຊະນະ ປ້ອງ​ກັນ​ອາກາດ 3-1 ປະຕູ ​ແລະ ​ໄອ​ທີ​ພີ ​ເສຍ ສີ​ເມືອງ​ກຣຸບ 3-4 ປະຕູ ສ່ວນ​ຮຸ່ນ​ອາວຸ​ໂສ  ປະສານ​ໃຈ ຊະນະ ນາ​ສ້ຽວ 12-6 ປະຕູ, ​ໄຊ​ເຊ​ດຖາ ຊະນະ ວີ​ໄອ​ພີ ຫາດ​ຊາຍ​ຟອງ 9-1 ປະຕູ, ລວມ​ເພື່ອນ ສະ​ເໝີ ​ໃຈ​ສະປອດ 5-5 ປະຕູ ​ແລະ ປະສານ​ມິດ ຊະນະ ປາ​ໄຊ​ມ້ອນ 3-1 ປະຕູ.

      ການ​ແຂ່ງຂັນລາຍການ​ດັ່ງກ່າວ ທີ​ມທີ່​ໄດ້​ຊະນະ​ເລີດທັງຮຸ່ນ​ຊາວ​ໜຸ່ມ ​ແລະ ອາວຸ​ໂສ ຈະ​ໄດ້​ເທົ່າ​ກັນໝົດ ກໍ​ຄື ອັນ​ດັບ​ທີ 1 ຈະ​ໄດ້​ຮັບ​ຂັນ​ແຊ໋ມທີ​ມລະ 1 ໜ່ວຍ ພ້ອມ​ຫຼຽນ​ຄຳທີ​ມລະ 15 ໜ່ວຍ ​ແລະ ​ເງິນສົດທີ​ມລະ 5 ລ້ານ​ກີບ ສ່ວນທີ 2 ຈະ​ໄດ້​ຮັບ​ຂັນທີ​ມລະ 1 ໜ່ວຍ ພ້ອມ​ຫຼຽນ​ເງິນທີ​ມລະ 15 ໜ່ວຍ ​ແລະ ​ເງິນ​ສົດ​ທີ​ມລະ 3 ລ້ານ​ກີບ ​ແລະ ອັນ​ດັບ​ທີ 3 ຈະ​ໄດ້​ຮັບ​ຂັນທີ​ມລະ 1 ໜ່ວຍ, ຫຼຽນ​ທອງ​ທີ​ມລະ 15 ໜ່ວຍ ​ແລະ ​ເງິນສົດ 1 ລ້ານ​ກີບ.

ພາບແລະຂ່າວໂດຍ: ສົງການ 

           

ສະໜັບສະໜູນຂ່າວໂດຍ:



ຂ່າວລ່າສຸດ