ລາຍລະອຽດຂ່າວ
ມຊ FC ຈັດກອງປະຊຸມ ຖອດຖອນບົດຮຽນການເຂົ້າຮ່ວມ ແຂ່ງຂັນບານເຕະ ສາຍ ກ 2019
ຂຽນເມື່ອ: 26/06/2019 22:06 | ໂດຍ: ເພຣເມັກເກີ | ອ່ານ: 131 ຄັ້ງ

     ໃນຕອນບ່າຍຂອງມື້ນີ້ ວັນທີ 26/06/2019, ເວລາ 13:30 ຢູ່ທີ່ຫ້ອງປະຊຸມ 213 ຕຶກສຳນັກງານອະທິການບໍດີ ໄດ້ມີກອງປະຊຸມພົບປະ ແລະ ຖອດຖອນບົດຮຽນຂອງສະໂມສອນບານເຕະ ມະຫາວິທະຍາໄລແຫ່ງຊາດທີ່ ເຂົ້າຮ່ວມການແຂ່ງຂັນບານເຕະ ສາຍ ກ (Division 1), ໂດຍການໃຫ້ກຽດເຂົ້າຮ່ວມແລະເປັນປະທານຂອງ ທ່ານ ຮສ.ປອ ອຸດົມ ພອນຄຳເພັງ ຮອງອະທິການບໍດີ ທັງເປັນປະທານສະໂມສອນບານເຕະ ມະຫາວິທະຍາໄລແຫ່ງຊາ, ພ້ອມທັງມີການເຂົ້າຮ່ວມຂອງ ບັນດາທ່ານ ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າ ແລະຮອງ ອານຸກຳມະການຕ່າງໆ ທີ່ຮັບຜິດຊອບວຽກບໍລິຫານຂອງສະໂມສອນ, ຜູ້ຈັດການທີມ, ຄະນະຄູຝຶກ ແລະ ນັກກິລາເຂົ້າຮ່ວມຢ່າງພ້ອມພຽງ. ໃນໂອກາດນີ້ ທ່ານ ອຈ. ປອ. ໃຈລາສີ ຍໍພັນໄຊ ຜູ້ຈັດການທີມ ຂອງສະໂມສອນ ໄດ້ລາຍງານສະພາບຕັ້ງແຕ່ໄລຍະກະກຽມ ຈົນເຖິງໄລຍະແຂ່ງຂັນໃນປະຈຸບັນ ເຊິ່ງບາງຕອນສຳຄັນຂອງການລາຍງານນີ້ໄດ້ກ່າວວ່າ: ການກະກຽມເຂົ້າຮ່ວມແຂ່ງຂັນແມ່ນໄດ້ເລີ່ມຕັ້ງແຕ່ມີການຈັດຕັ້ງຄະນະກຳມະການຄັດເລືອກນັກກິລາ ຈາກງານແຂ່ງຂັນກິລານັກສຶກສາທົ່ວ ມຊ ປະຈຳປີ 2019 ທີ່ຜ່ານມາ, ຫຼັງຈາກນັ້ນໄດ້ມີການຄັດເລືອກນັກກິລາຈາກຄະນະວິຊາຕ່າງໆ ທົ່ວມາະຫາວິທະຍາໄລແຫ່ງຊາດຈຶ່ງເຮັດໃຫ້ນັກກິລາຂອງ ສະໂມສອນແມ່ນນັກສຶກສາຂອງ ມະຫາວິທະຍາໄລແຫ່ງຊາດທັງໝົດ. ຜ່ານການແຂ່ງຂັນຕັ້ງແຕ່ວັນທີ 04/05/2019 ເປັນຕົ້ນມາຮອດປະຈຸບັນ ສະໂມສອນ ມຊ ລົງແຂ່ງຂັນທັງໝົດ 8 ນັດ ຊະນະ 5 ນັດ, ສະເໝີ 1 ນັດ ແລະ ເສຍ 2 ນັດມີທັງໝົດ 16 ຄະແນນເປັນອັນດັບ 3 ຈາກທັງໝົດ 12 ທີມ ແລະໄດ້ລາຍງານສະພາບສິ່ງທ້າທາຍຕ່າງໆ ໃນການຝຶກຊ້ອມແລະ ເຂົ້າຮ່ວມແຂ່ງຂັນໃນໄລຍະຜ່ານມາໃຫ້ທີ່ປະຊຸມໄດ້ຮັບຊາບ. ຈາກນັ້ນຕົວແທນຂອງພາກສ່ວນຕ່າງໆກໍ່ໄດ້ປະກອບຄຳເຫັນຕໍ່ກອງປະຊຸມ, ໃນຕອນທ້າຍ ທ່ານ ຮສ. ປອ. ອຸດົມ ພອນຄຳເພັງ ປະທານສະໂມສອນ ໄດ້ໂອ້ລົມຕໍ່ຄະນະຄູຝຶກ ແລະນັກກິລາໂດຍທ່ານ ໄດ້ເນັ້ນນັກໃຫ້ນັກກິລາເອົາໃຈໃສ່ ແລະທຸ້ມເທໃນການແຂ່ງຂັນ ເພາະຄວາມເຂັ້ມແຂງທາງດ້ານ ກິລາມັນສະແດງອອກເຖິງຄວາມເຂັ້ມແຂງຂອງສະຖາບັນ, ສະແດງອອກເຖິງກຽດສັກສີ ແລະຄວາມເອົາໃຈໃສ່ຂອງຄະນະນຳ. ສະນັ້ນ, ທຸກຄັ້ງທີ່ລົງແຂ່ງຂັນຕ້ອງໄດ້ເອົາໃຈໃສ່ພິເສດເລື່ອງນ້ຳໃຈນັກກິລາ, ເຖິງວ່າພວກເຮົາຢາກໄດ້ໄຊຊະນະແຕ່ປັນຫາສຳຄັນຄົນທີ່ເປັນນັກກິລາຂອງ ມຊ ຕ້ອງເປັນແບບຢ່າງເວລາລົງສະໜາມ. ນອກຈາກນັ້ນທ່ານຍັງໄດ້ໃຫ້ຄຳໝັ້ນສັນຍາວ່າ ຈະຊອກຫາວິທີທາງຂົນໄຂວແຫຼ່ງທຶນເພື່ອປະກອບສ່ວນແລະຊຸກຍຸກກຳລັງໃຈໃຫ້ນັກກິລາຍາດສາມາດຍາດເອົາໄຊຊະນະໃນການແຂ່ງຂັນມາໃຫ້ໄດ້.

ຂ່າວໂດຍ: ນັກຂ່າວເງົາ

ພາບໂດຍ: ນ້ອຍ ຕາຕິເດດ

ສະໜັບສະໜູນຂ່າວໂດຍ:



ຂ່າວລ່າສຸດ