ລາຍລະອຽດຂ່າວ
 ແມັກ​ນ້ອຍ ນ໋ອກ ​ເດັ່ນ​ເມືອງ​ເໜືອ ຍົກ 4 ມວຍ​ລາວ ຊີງ​ແຊ໋ມສາຍ​ແອວ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນວ
ຂຽນເມື່ອ: 10/06/2019 14:06 | ໂດຍ: ເພຣເມັກເກີ | ອ່ານ: 63 ຄັ້ງ

      ​​ແມັກ​ນ້ອຍ ສໍຈະເລີດສິງ ​​ແກ້​ທາງ​ມວຍ​ໄດ້​ດີໄລ່​ຕີ​ວົງ​ໃນອາ​ໃສ​ຟັນ​ສອກ​ເຂົ້າ​ຫາງ​ຄິ້ວ​​ ເດັ່ນເມືອງເຫນືອ ສໍ ຈະເລີນສຸ ແຕກ​ຈີກ​ຍາວ​ເລືອດ​ໄຫລ​ບໍ່​ຢຸດ ກຳມະການ​ກາງ​ເວທີຍົກ​ມື​ໃຫ້ ​ແມັກ​ນ້ອຍ ​ເປັນ​ຝ່າຍ​ເອົາຊະນະ​ນ໋ອກ​ໃນຍົກທີ 4  ​ເກັບ​ໄຊຊະນະ​ເປັນ​ຄັ້ງ​ທຳ​ອິດ​ໃນ​ກຸ່ມ ບີ ການ​ແຂ່ງຂັນກິລາ​ມວຍ​ລາວ ມວຍ​ຮອບ ຮຸ່ນ​ນໍ້າໜັກ 55 ກິ​ໂລກຣາມ ຊີງ​​ແຊ໋ມສາຍ​ແອວ​ທ່ານ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ (ນວ) ຄັ້ງ​ທີ l ປະຈຳ​ປີ 2019 ​ເພື່ອ​​ເລືອກ​ເຟັ້ນນັກ​ກິລາ​ພອນ​ສະຫວັນ​ດີ​ເດັ່ນ ກຽມ​ຮ່ວມລ່າ​ຫຼຽນ​ຄຳ ​ຊຽງ​ຂວາງ ​ເກ​ມ 2020 ​ແລງ​ມື້​ນີ້ (7 ມິຖຸນາ) ຮູ້​ກັນມ່ວນ​ມັນ​ແນ່ນອນ​.

      ​ເມື່ອ​ວັນ​ທີ 7 ມິຖຸນາ ຜ່ານ​ມາ ທີ່​ສະ​ໂມ​ສອນ​ກິລາ​ໃນ​ຮົ່ມ ພະ​ແນ​ກສຶກສາ​ທິການ ​ແລະ ກິລາ ນວ (ບ້ານ​ບຶງ​ຂະ​ຫຍອງ) ​ເມືອງ​ສີ​ສັດຕະ​ນາກ, ພະ​ແນ​ກສຶກສາ​ທິການ ​ແລະ ກິລາ ນວ ຮ່ວມ​ກັບ ສະຫະພັນ​ມວຍ​ລາວ ນວ ສືບ​ຕໍ່​ຈັດ​ການ​ແຂ່ງຂັນ​ມວຍ​ລາວ ມວຍ​ຮອບ ຮຸ່ນ​ນໍ້າໜັກ 55 ກິ​ໂລກຣາມ ​ໃນ​ກຸ່ມ ບີ ຊີງ​​ແຊ໋ມສາຍ​ແອວ​ທ່ານ​ຫົວໜ້າ​ພະ​ແນ​ກ ສຶກສາ​ທິການ ​ແລະ ກິລາ ນວ ຄັ້ງ​ທີ l ປະຈຳ​ປີ 2019 ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ເສັງ ສູນ​ດາລາ ປະທານ​ສະຫະພັນ​ມວຍ​ລາວ, ມວຍ​ສາກົນ ​ແລະ ມວຍ​ປັນ​ຈັກ​ສີ​ລັດ ນວ ພ້ອມ​ດ້ວຍ​ຄະນະ​ບໍລິຫານ​ງານ​ສະຫະພັນ, ຄະນຮັບຜິດຊອບ​ຈັດການ​ແຂ່ງຂັນ, ຄູ​ຝຶກ ​ແລະ ນັກ​ກິລາ​ຕະຫຼອດ​ຮອດ​ແຟນພັນ​ແທ້​ມວຍ​ລາວ​ອ້ອມ​ຂ້າງ​ສູນ​ກາງ ​ເຂົ້າ​ຮ່ວມ​ຢ່າງ​ຫຼວງ​ຫຼາຍ.

      ສຳລັບ​ການ​ແຂ່ງຂັນ​ມວຍ​ຮອບ ຮຸ່ນ​ນນໍ້າໜັກ​ດັ່ງກ່າວ ​ໃນ​ກຸ່ມ ບີ ມີ​ການ​ແຂ່ງຂັນ 2 ຄູ່ ຜ່ານ​ການ​ແຂ່ງຂັນ​ຜົນ​ປະກົດ​ວ່າ: ຄູ່​ທຳອິດ ແມັກນ້ອຍ ສໍຈະເລີດສິງ ພົບ​ກັບ ເດັ່ນເມືອງເຫນືອ ສໍຈະເລີນສຸ ພໍ​ແຕ່​ລະຄັງ​ດັງ​ຂຶ້ນ ທັງ​ສອງ​ຍ່າງ​ຫາ​ກັນ​ບວກ​ອາວຸດ​ແລກ​ກັນ​ຢ່າງ​ດຸ​ເດືອດ​ແບບບໍ່​ມີ​ການ​ລອງ​ເຊີງ ຜ່ານ​ໄປ​ຍົກ​ທີ 1 ​ແລະ ຍົກ​ທີ 2 ຄະ​ແນນ​ສູ​ສີ​ກັນ ພໍ​ແຕ່​ມາ​ຍົກ​ທີ 3 ອ້າຍ​ລ້ຽງ ​​ແມັກ​ນ້ອຍ ​ແກ້​ທາງ​ມວຍ​ໄດ້​ດີ ສັ່ງ​ແມັກ​ນ້ອຍ​ຕີ​ວົງ​ໃນ​ໃຊ້​ສອກ​ເປັນ​ຫຼັກ ​ແລະ ກໍ​ໄດ້ຜົນ​ ​ເພາະ ​ເດັ່ນ​ເມືອງ​ເໜືອ​ ຍ່າງ​ເຂົ້າ​ຫາພ້ອມ​​ໃຊ້​ອາວຸດຢ່າງ​ຄົບ​ເຄື່ອງ ມີ​ທັງສອກ, ​ເຂົ່າ, ມັດ ​ແລະ ​​ແຄ່ງ ​ບຸກ​ໂຈມ​ຕີ ​ແຕ່​ແມັກ​ນ້ອຍ​ ຕີ​ວົງ​ໃນ​ໃຊ້​ສອກ​ປັກ​ເຂົ້າ​ຖືກ​ຫາງ​ຄິ້ວ​ພໍດີ ​ເຮັດ​ໃຫ້​​ເລືອດ​ເດັ່ນ​ເມືອງ​​ເໜືອ ອອກ ​ແຕ່​ກຳມະການ​ກໍ​ໃຫ້​ຕີ​ຕໍ່​ໄດ້ ​ແຕ່​ຍັງ​ດີ​ທີ່​ລະຄັງ​ຊ່ວຍ​ໄວ້​ກ່ອນ ​ກັບ​ມາຕີ​ກັນ​ຕໍ່​ໃນ​ຍົກ​ທີ 4 ​ແມັກ​ນ້ອຍ ​ເນັ້ນ ສອກ​ ​ແລະ ມັດ​ ຕີ​ເຂົ້າ​ແຜ​ເກົ່າ ​​ເດັ່ນ​ເມືອງ​ເໜືອ ພະຍາຍາມຫຼີກ​ໜີ​ແຕ່​ບໍ່​ມົ້ມ​ຖືກ​ສອກ ​ແລະ ມັດ ​ເຮັດ​ໃຫ້ເລືອດ​ໄຫຼ​ບໍ່​ຢຸດ ກຳມະການ​ກາງ​ເວທີ ຈຶ່ງ​ຕັດສິນ​ໃຫ້ ​ແມັກ​ນ້ອຍ​ເປັນ​ຝ່າຍ​ເອົາ​ຊະນະ​ນ໋ອກ ​ໃນ​ຍົກ​ທີ 4 ມີ​ລຸ້ນຜ່ານ​ເຂົ້າ​ໄປ​ຫຼິ້ນ​ໃນ​ຮອບ 4 ຄົນ​ສຸດ​ທ້າຍ ສ່ວນ​ຜົນ​ການ​ແຂ່ງຂັນ​ອີກ​ຄູ່ ​ໃນ​ກຸ່ມ​ດັ່ງກ່າວ ກັບຕັນ ຂວັນໃຈສີໂຄດ ຊະນະຄະແນນ ເອກະໄຊ ລູກບ້ານດຸງ.

ຂະນະ​ທີ່​ຜົນ​ການ​ແຂ່ງຂັນ ມວຍປະກອບລາຍການ ແລັມໂບ້ເລັກ ສິດຈານມ້ອນ ຊະນະນ໋ອກຍົກ​ທີ 2 ນິຍົມນ້ອຍ ບໍລິສັດ ຄຳເສັງ ຮຸ່ນ​ນໍ້າໜັກ 50 ກິ​ໂລກຣາມ,  ເພັດດຳ ໂຮງຮຽນ ອບຈ (ໄທ) ເສຍຄະແນນ ​ເຫຼັກກ້າ ຂວັນໃຈສີໂຄດ ຮຸ່ນ​ນໍ້າໜັກ 49 ກິ​ໂລກຣາມ,  ເສືອໄຕ້ ສິດເພັດນະຄອນ ຖືກ ຈຳປາສັກ ສິດນາຍຕ່າງ (ໄທ) ນ໋ອກຍົກ 2 ຮຸ່ນ​ນໍ້າໜັກ 48 ກິ​ໂລກຣາມ, ເພັດເມືອງທາດ ສິດຈານມ້ອນ ເສຍນ໋ອກຍົກ 1 ​ໃຫ້ ລົມ ວິທະຍາ (ໄທ) ຮຸ່ນ​ນໍ້າໜັກ 44 ກິ​ໂລກຣາມ ການແຂ່ງຂັນມວຍຮອບຄັ້ງຕໍ່ໄປ ນັດທີ 2 ຈະ​ສືບ​ຕໍ່​ກັບ​ມາ​ແຂ່ງຂັນ​ກັນ​ອີກ​ຄັ້ງ​ໃນວັນທີ 21 ມິຖຸນາ 2019. 

      ການ​ແຂ່ງຂັນກິລາ​ມວຍ​ລາວ ມວຍ​ຮອບ ຮຸ່ນ​ນໍ້າໜັກ 55 ກິ​ໂລກຣາມ ຊີງ​​ແຊ໋ມສາຍ​ແອວ​ທ່ານ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ (ນວ) ຄັ້ງ​ທີ l ປະຈຳ​ປີ 2019 ຈັດ​ຂຶ້ນ ມີ​ຈຸດປະສົງ​ຫຼັກ​ກໍ​ເພື່ອ​ເປັນ​ການ​​ເລືອກ​ເຟັ້ນນັກ​ກິລາ​ທີ່​ມີພອນ​ສະຫວັນ​ດີ​ເດັ່ນ ກຽມຕາງໜ້າ​ທັບ​ນັກ​ກິລາ​ນະຄອນຫຼວງ​ວຽງ​ຈັນ ​ເຂົ້າ​ຮ່ວມລ່າ​ຫຼຽນ​ຄຳ ​ງານ​ມະຫາ​ກຳ​ກິລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ​ເກ​ມ 2020 ທີ່​ແຂວງ​ຊຽງ​ຂວາງ ​ເປັນ​ເຈົ້າພາບ ຈະ​ຈັດ​ຂຶ້ນ ລະຫວ່າງ​ວັນ​ທີ 21 ມີນາ ຫາ 1 ​ເມສາ 2020 ສຳລັບ​ມວຍ​ຮອບ ຮຸ່ນ​ນໍ້າໜັກ 55 ກິ​ໂລກຣາມ ມີ​ນັກ​ກິລາ​ເຂົ້າ​ຮ່ວມ​ຊີງ​ໄຊ​ທັງ​ໝົດ 8 ຄົນ ຈາກ 6 ຄ້າຍ ຄື ກຸ່ມ ​ເອ ປະກອບ​ມີ ເກົ້າ​ແສນ ຂວັນ​ໃຈ​ສີ​ໂຄດ, ​ເດັ່ນ​ນະຄອນ ​ເພັດ​ນະຄອນ, ຂຸນ​ເຫຼັກ ສະ​ໂມ​ສອນ ຄຳ​ເສັງ, ເພັດ​ບຸນ​ຄໍ້າ ມຸງຄຸນ​ສ່ວນ​ກຸ່ມ B ມີ ​ແມັກ​ນ້ອຍ ສໍ​ຈະ​ເລີ​ນສິງ, ​ເດັ່ນ​ເມືອງ​ເໜືອ ສໍ​ຈະ​ເລີ​ນສຸກ, ​ເອກ​ກະ​ໄຊ ລູກບ້ານ​ດຸ​ງ ​ແລະ ກັບຕັນ ຂວັນ​ໃຈ​ສີ​ໂຄດ. 

​ໂດຍ ສົງການ

ສະໜັບສະໜູນຂ່າວໂດຍ: