ລາຍລະອຽດຂ່າວ
ມາຮູ້ຈັກ ເປ້ ກອງໜ້າຍິງທີ່ ຟອມດີທີ່ສຸດ ໃນອາຊຽນຂະນະນີ້
ຂຽນເມື່ອ: 20/05/2019 10:05 | ໂດຍ: ເພຣເມັກເກີ | ອ່ານ: 503 ຄັ້ງ

      ໃນຊົ່ວໂມງນີ້ຄົງບໍ່ມີແຟນບານພັນແທ້ ທີມຊາດລາວຄົນໃດບໍ່ຮູ້ຈັກ ເປ້ ພົມພັກດີ ນັກເຕະບານຍິງທີມຊາດລາວເຈົ້າຂອງລວງສູງ 165 cm ທີ່ໃສ່ເສື້ອ ໝາຍເລກ 8 ທີ່ຄວາມສາມາດເກັ່ງເກີດອາຍຸ ລາວເອງສາມາດໂຊຟອມໄດ້ຢ່າງໂດດເດັ່ນທັງ ໃນຮຸ້ນອາຍຸບໍ່ເກີນ 19 ປີ ແລະ 15 ປີ ແລະເປັນທີ່ຮູ້ຈັກຂອງແຟນບານທັງ 3 ລາວ ແລະຕ່າງປະເທດຢ່າງໄວວາ, ໃນຂ່າວມື້ນີ້ເຮົາຈະມາຮູ້ຈັກ ກັບ ເປ້ໃຫ້ຫຼາຍຂຶ້ນ.

       ໂດຍທີມງານ laosportnews ໄດ້ຕິດຕໍ່ຂໍສຳພາດ ແລະນ້ອງ ເປ້ ພົມພັກດີ ເຊິ່ງນ້ອງໃຫ້ຮູ້ວ່າເປ້ ເກີດເມື່ອວັນທີ 13/04/2004 ທີ່ບ້ານປາກງື່ມ, ເມືອງປາກງື່ມ, ນະຄອນຫຼວງວຽງຈັນ ມີອ້າຍເອື້ອຍນ້ອງຮ່ວມກັນ ທັງໝົດ 5 ຄົນ, ເປ້ ເປັນລູກຄົນທີ່ 4​ ຂອງຄອບຄົວ. ເປ້ເລີ່ມຫຼິ້ນກິລາບານເຕະແຕ່ອາຍຸ 7 ປີ ໂດຍມັກຈະລົງເຕະກັບເດັກນ້ອຍຜູ້ຊາຍ ແລະ ມັກຈະລົງເຕະບານກັບອ້າຍ ເພາະອ້າຍທັງ 2 ກໍ່ເປັນນັກກິລາບານເຕະເຊັ່ນກັນອີກທັງໄດ້ຮັບການສະໜັບສະໜູນຈາກທາງຄອບຄົວເປັນຢ່າງດີ, ນັບແຕ່ມື້ເຕະບານເປັນຕົ້ນມາ ເປ້ກໍ່ຮູ້ສຶກມັກແລະຫຼົງໄຫຼກັບໝາກບານໜ່ວຍມົນໆ ນີ້ຕະຫຼອດມາຈົນມີໂອກາດໄດ້ລົງແຂ່ງຂັນເປັນທາງການນັດທຳອິດໃຫ້ແກ່ ໂຮງຮຽນ ມສ ສົມສະຫວາດຕອນທີ່ນ້ອງ ຮຽນຢູ່ຊັ້ນ ມ 1​. ຈາກນັ້ນໄດ້ມີໂອກາດເຂົ້າຮ່ວມການແຂ່ງຂັນ ໃນລາຍການຊີງຂັນ ໂຄຄາໂຄລາ ຈົນໂຊຟອມໄປເຂົ້າຕາຄູຝຶກທີມຊາດ ເຮັດໃຫ້ ເປ້ຕິດທີມຊາດຕັ້ງປີ 2016 ​ເປັນຕົ້ນມາ.

      ປະຈຸບັນ ເປ້ ຮຽນຢູ່ຫ້ອງ ມ 4/1 ໂຮງຮຽນ ມສ ບຸນເກີດ ການຮຽນຂອງນ້ອງຢູ່ໃນລະດັບດີສົມຄວນ, ເປ້ ມີຄວາມໄຝ່ຝັນວ່າ ຢາກໄປຫຼິ້ນກິລາບານເຕະໃນລີກ ອາຊີບ ຂອງຕ່າງປະເທດ ໂດຍສະເພາະ ຖ້າເປັນໄປໄດ້ ເປ້ມີຄວາມຝັນຢາກໄປຫຼິ້ນໃຫ້ທີມມັກຂອງຕົນເອງ ຄືທີມ ລິເວີພູ, ເມື່ອຫາເງິນໄດ້ຫຼາຍແລ້ວ ຢາກສ້າງບ້ານຫຼັງງາມໆ ໃຫ້ແມ່. ເປ້ ບອກວ່ານັກເຕະລາວທີ່ມັກ ແມ່ນ ກັນລະຍາ ສີສົມຫຍັງ, ສ່ວນນັກເຕະທີ່ເປັນຕົ້ນແບບຂອງ ເປ້ ແມ່ນ ໂມຮາເມັດ ຊາຣາ ຂອງລິເວີພູ. 

      ໃນຕອນທ້າຍຂອງການສຳພາດ ເປ້ ໄດ້ຮຽກຮ້ອງແລະເຊີນຊວນແຟນບານຊາວລາວທຸກຄົນຊ່ວຍສົ່ງແຮງໃຈ ແລະຕິດຕາມເຊຍທີມຊາດຍິງລາວ U15 ທີ່ຈະລົງແຂ່ງຂັນນັດຊີງຊະນະເລີຍ ໃນວັນທີ 21/05/2019 ເວລາ 18:00 ນີ້ດ້ວຍ.

 

ໂດຍ: ໃຈລາສີ

ພາບ: ນ້ອຍ ຕະຕິເດດ

ສະໜັບສະໜູນຂ່າວໂດຍ: