ລາຍລະອຽດຂ່າວ
ເປ້ຊັດ 2 ປະຕູ ຄວ້າຜູ້ຫຼິ້ນຍອດຍ້ຽມ ພ້ອມພາ U-19 ຍິງລາວ ຖະລົ່ມ ທາຈີກິດສະຖານ ເຄິ່ງໂຫຼ
ຂຽນເມື່ອ: 28/04/2019 12:04 | ໂດຍ: ເພຣເມັກເກີ | ອ່ານ: 263 ຄັ້ງ

      ທີມຊາດຍິງ ລາວ ຮຸ່ນອາຍຸບໍ່ເກີນ 19 ປີ ໂຊຜົນງານແບບເໜືອຊັ້ນໃນລາຍການ angamata U-19 Women’s International Gold Cup 2019  ໂດຍການລົງສະໜາມ 2​ນັດ ຊະນະລວດ ຍິງປະຕູໄດ້ທັງໝົດ 11 ປະຕູແລະບໍ່ທັນເສຍ ຈັກປະຕູ ໂດຍນັດທຳອິດໃນວັນທີ 25/04/2019 ສາມາດເອົາຊະນະທີມຊາດ ມົງໂກລີ ໄປ 5-0 ຈາກນັ້ນໃນມື້ຄືນນີ້ ວັນທີ 27/04/2019 ຖະ​ຫລົ່ມ ທີມຊາດທາຈີກິດສະຖານ 6-0.

      ການແຂ່ງຂັນນັດທີ 2 ຂອງທີມຊາດສາວ ລາວ ໄດ້ມີຂຶ້ນໃນເວລາ 21:30 ຂອງວັນທີ 27 ເມສາ 2019 ຢູ່ທີ່ສະຫນາມກິລາ Bangabandhu National Stadium, Dhaka  ພົ​ບ​ກັບ ທີ​ມ​ຊາດທາຈີກິດສະຖານ. ໂດຍໃນນັດນີ້ຜູ້ຫຼິ້ນເບີ 8 ເປ້ ພົມພັກດີ ໂຊຜົນງານໄດ້ຢ່າງໂດດເດັ່ນ ທັງໂຊທັກສະການເຕະທີ່ເໜືອຊັ້ນ, ຈ່າຍບານໃຫ້ເພື່ອນຮ່ວມທີມ ແລະຍິງປະຕູ 2 ປະຕູໃນນາທີ 4, 38 ຈົນຈົບເກມຖືກຄັດເລືອກເປັນນັກເຕະຍອດຢ້ຽມປະຈຳນັດແຂ່ງຂັນພ້ອມເງິນລາງວັນ 500 ໂດລາສະຫະລັດ ເປັນນັດທີ 2 ເຊິ່ງນັດຜ່ານມາລາວກໍ່ໄດ້ຮັບລາງວັນນີ້ເຊັ່ນກັນ. ນອກຈາກນັ້ນ ທີມຊາດລາວໄດ້ປະຕູຈາກ ເບີ 19 ອາ​ນຸດ​ຕາ ຈັນ​ທີ​ທອງ ນາທີ ​25, ເບີ 16 ສາຍສະຫມອນ ອິນທະພອນ ນາທີ 75,90 ແລະ ການ​ສະ​ກັດ​ບານ​ເຂົ້າ​ປະ​ຕູ​ຕົນ​ເອງ​ຂອງ​ນັກ​ກິ​ລາ ທາຈີກິດສະຖານ Fayzulloeva Marjona ໃນນາທີທີ 90+4. ຈາກໄຊຊະນະ ດັ່ງກ່າວສົ່ງຜົນໃຫ້ ທີມຊາດລາວ ເປັນອັນດັບ 1 ກຸ່ມ A ລົງ​ແຂ່ງ​ຂັນ 2 ນັດ ຊະ​ນະ 2 ນັດ ມີ 6 ຄະ​ແນນ, ອັນ​ດັບ 2 ທີມ​ຊາດມົງ​ໂກ​ລີ ລົງ​ແຂ່ງ​ຂັນ 2 ນັດ ຊະ​ນະ 1 ເສຍ 1 ມີ 3 ຄະ​ແນນ. 

      ຈາກຜົນງານດັ່ງກ່າວສົ່ງຜົນໃຫ້ທີມຊາດລາວຈະຜ່ານເຂົ້າໄປຫຼິ້ນຮອບຮອງຊະນະເລີດໃນວັນຈັນ ວັນທີ 29/04/2019 ເວ​ລາ 19:00

      ທີມ​ຊາດ​ລາວ ພົບ​ກັບ ທີມ​ຊາດຄີກິສຖານ ທີ່​ເປັນ​ອັນ​ດັບ 2 ກ​ຸ່ມ​ບີ ຂໍແຮງຊົມແຮງເຊຍຈາກກອງເຊຍລາວພວກເຮົາດ້ວຍ

ໂດຍ: ໃຈລາສີ

ຂອບໃຈພາບຈາກ: ສຕລ
 

ສະໜັບສະໜູນຂ່າວໂດຍ:



11 ຜູ້ຫຼິ້ນຕົວຈິງຂອງທີມຊາດ ຍິງ U-19 ຂອງລາວ
11 ຜູ້ຫຼິ້ນຕົວຈິງຂອງທີມຊາດ ຍິງ U-19 ຂອງທາຈີກິດສະຖານ