ລາຍລະອຽດຂ່າວ
ອານຸສອນ ເວລາດີສຸດໃນລະດູການນີ້! ແລ່ນ-ລານ ຊິງແຊ້ມອາຊີ 2019 ບາເຣນ ສ້າງປະຫວັດສາດຄອງເຈົ້າຫລຽນຄຳຄັ້ງທຳອິດ!!
ຂຽນເມື່ອ: 25/04/2019 16:04 | ໂດຍ: ແອັດມິນ | ອ່ານ: 282 ຄັ້ງ

      ການແຂ່ງຂັນກິລາແລ່ນ-ລານ ຊິງແຊ້ມອາຊີ ຄັ້ງທີ 23 ໃນລະຫວ່າງວັນທີ 21-24 ເມສາ 2019 ທີ່ນະຄອນຫລວງໂດຮາ ປະເທດກາຕ້າ ມີການຊິງໄຊທັງໝົດ 43 ຫລຽນຄຳ ໃນ 43 ລາຍການ ຍິງ 21 ລາຍການ ຊາຍ 21 ລາຍການ ແລະ ທິມປະສົມ 1 ລາຍການ ໂດຍມີນັກກິລາຈາກ 43 ປະເທດເຂົ້າຮ່ວມ.

ສະເພາະ ສປປ ລາວ ສົ່ງນັກກິລາເຂົ້າຮ່ວມ 3 ຄົນຄື: ທ້າວ ອານຸສອນ ໄຊສາ ລົງແຂ່ງລາຍການແລ່ນຂ້າມຮົ້ວ 110 ແມັດ ເຮັດເວລາໄດ້ 14,45 ວິນາທີ ເປັນເວລາດີສຸດຂອງອານຸສອນໃນລະດູການນີ້ ໄດ້ອັນດັບທີ 14 ຈາກ 20 ຄົນເຂົ້າຮ່ວມ ບໍ່ຜ່ານຮອບຄັດເລືອກ.

ຂະນະທີ່ ນາງ ມະນີວັນ ຈັນທະວົງ ລົງແຂ່ງລາຍການແລ່ນຂ້າມຮົ້ວ 100 ແມັດ ເຮັດເວລາໄດ້ 14,79 ວິນາທີ ໄດ້ອັນດັບທີ 12 ຈາກ 14 ຄົນເຂົ້າຮ່ວມ ບໍ່ຜ່ານຮອບຄັດເລືອກ.

ສ່ວນ ນາງ ສີລິນາ ພະອາໄພ ລົງແຂ່ງລາຍການແລ່ນ 100 ແມັດ ເຮັດເວລາໄດ້ 12,52 ວິນາທີ ໄດ້ອັນດັບທີ 27 ຈາກ 30 ຄົນເຂົ້າຮ່ວມ ບໍ່ຜ່ານຮອບຄັດເລືອກ.

ສຳລັບ ເຈົ້າຄອງຫລຽນຄຳໃນການແຂ່ງຂັນຄັ້ງນີ້ ເປັນຂອງນັກກິລາຈາກປະເທດບາເຣນ ໄດ້ 11 ຫລຽນຄຳ 7 ຫລຽນເງິນ 4 ຫລຽນທອງ ລວມ 22 ຫລຽນ, ທີ 2 ສປ ຈີນ ອະດີດແຊ້ມສູງສຸດ 17 ສະໄຫມ ໄດ້ 9 ຫລຽນຄຳ 13 ຫລຽນເງິນ 7 ຫລຽນທອງ, ທີ 3 ຍີ່ປຸ່ນ ອະດີດແຊ້ມ 4 ສະໄຫມ ໄດ້ 5 ຫລຽນຄຳ 4 ຫລຽນເງິນ 9 ຫລຽນທອງ, ທີ 4 ອິນເດຍ ແຊ້ມເກົ່າ ໄດ້ 3 ຫລຽນຄຳ 7 ຫລຽນເງິນ 7 ຫລຽນທອງ, ສ່ວນເຈົ້າພາບກາຕ້າ ໄດ້ອັນດັບທີ 6 ລວມ 6 ຫລຽນຄື: 2 ຫລຽນຄຳ 1 ຫລຽນເງິນ 3 ຫລຽນທອງ.

Photo: Anousone Sprinter & Asian Athletics Championship

ສະໜັບສະໜູນຂ່າວໂດຍ: