ລາຍລະອຽດຂ່າວ
ວຽງຈັນ ເອັນດູໂຣ ຊ່ວຍເຄື່ອງກິລາ ແລະ ຄອມພິວເຕີໃຫ້ບ້ານດອນເງິນ
ຂຽນເມື່ອ: 09/04/2019 11:04 | ໂດຍ: ເພຣເມັກເກີ | ອ່ານ: 227 ຄັ້ງ

     ທີມງານຂະບວນລົດຈັກ ວຽງຈັນ ເອັນດູໂຣ (Vientiane Enduro) ຈຳນວນ 27 ຄົນ ຮ່ວມແຮງຮ່ວມໃຈ ແລະ ຮ່ວມສາມັກຄີກັນ ນຳເອົາບັນດາເຄື່ອງກິລາ, ອຸປະກອນກິລາ, ຄອມພິວເຕີ, ເຄື່ອງປິ່ນເຕີ ແລະ ອືື່ນໆອີກ ທີ່ສາມາດລະດົມທຶນການ ໄດ້ຈາກບັນດາສະມາຊິກ ແລະ ບໍລິສັດ ກຸ່ມຄຳໄພ ຊະນະ ຈຳກັດຜູ້ດຽວ ລວມມູນຄ່າ 10 ລ້ານກວ່າກີບ ນຳໄປຊ່ວຍເຫຼືອໃຫ້ບ້ານດອນເງິນ ເມືອງພູຄູນ ແຂວງຫຼວງພະບາງ ທີ່ຢູ່ຫ່າງໄກສອກຫຼີກ ມີໂອກາດນຳໃຊ້ເຄື່ອງດັ່ງກ່າວສາມາດພັດທະນາຕົນເອງກາຍເປັນບູກຄົນສຳຄັນຂອງບ້ານ, ຂອງເມືອງ, ຂອງແຂວງ ກໍ່ຄື ຂອງຊາດ ໃນອະນາຄົດ ໂດຍສະເພາະໃນເດືອນສິງຫານີ້ ວຽງຈັນ ເອັນດູໂຣ ຈະສືບຕໍ່ນຳເອົາບັນດາເຄື່ອງຕ່າງໆແບບເກົ່າໄປຊ່ວຍເຫຼຶອ ບ້ານນ້ຳງີມ ເມືອງພຽງ ແຂວງໄຊຍະບູລີ ຕື່ມອີກ.

      ເມື່ອບໍ່ດົນມານີ້, ທີມງານຂະບວນລົດຈັກ ວຽງຈັນ ເອັນດູໂຣ ຈຳນວນ 27 ຄົນ ນຳທີມໂດຍທ່ານ ວັນໄຊຍາ ຫຼວງໄຊ ຫົວໜ້າທີມງານຂະບວນລົດຈັກ ວຽງຈັນ ເອັນດູໂຣ ແລະ ທ່ານ ນິຄົມ ພົມມະຈັນ ຮອງຫົວໜ້າທີມງານຂະບວນລົດຈັກ ວຽງຈັນ ເອັນດູໂຣ ພ້ອມດ້ວຍສະມາຊິກ ໄດ້ເຄື່ອນຂະບວນນຳເອົາເຄື່ອງທີ່ສາມາດລະດົມໄດ້ໄປຊ່ວຍເຫຼືອບ້ານດອນເງິນ, ມີບັນດາອຳນາດການປົກຄອງບ້ານ, 3 ອົງການຈັດຕັ້ງມະຫາຊົນບ້ານ, ພໍ່ແມ່ປະຊາຊົນຊາວບ້ານດັ່ງກ່າວ ຕະຫຼອດພະນັກງານ, ຄູອາຈານ ແລະ ນ້ອງນ້ອຍເຍົາວະຊົນໃຫ້ການຕ້ອນຮັບຢ່າງອົບອຸ່ນ. ທ່ານ ນິຄົມ ພົມມະຈັນ ລາຍງານໃຫ້ຮູ້ວ່າ: ຈຸດເປົ້າໝາຍໃນການເຕົ້າໂຮມທີມງານຂະບວນລົດຈັກ ວຽງຈັນ ເອັນດູໂຣ ໃນຄັ້ງນີ້ ກໍ່ຍ້ອນວ່າຢາກສ້າງຄວາມສາມັກຄີໃຫ້ບັນດາສະມາຊິກ ກໍ່ຄື ກຸ່ມຄົນມັກຮັກສອງລໍ້ ອີກດ້ານໜຶ່ງກໍ່ຍັງເປັນປຸກລະດົມທຶນການກຸສົນເພື່ອຈະນຳໄປຊ່ວຍເຫຼືອບັນດາພາກສ່ວນທີ່ຢູ່ຫ່າງໄກສອກຫຼີກ ທີ່ຂາດເຂີນດ້ານອຸປະກອນກິລາ ແລະ ອື່ນໆອີກ ຕະຫຼອດໄລຍະທີ່ຜ່ານມາ ພວກເຮົາສາມາດຈັດຕັ້ງປະຕິບັດຕາມແນວທາງນະໂຍບາຍຂອງທີມ ຢ່າງມີຜົນສຳເລັດດ້ວຍຄວາມພາກພູມໃຈ ເປັນຕົ້ນແມ່ນເມື່ອເດືອນກຸມພາ ຜ່ານມາ ທີມງານພວກເຮົາສາມາດຮ່ວມແຮງຮ່ວມໃຈກັນອອກເດີນທາງດ້ວຍລົດຈັກ (ປະເພດລົດສະເກມ) ແຕ່ວຽງຈັນ-ບ້ານນ້ຳງີມ ປະມານ 355 ກິໂລແມັດ ໄປບໍລິຈາກເງິນສົມທົບຊ່ວຍເຫຼືອປຸກສ້າງ ໂຮງຮຽນປະຖົມສຶກສາ ບ້ານນ້ຳງີມ ເມືອງພຽງ ແຂວງໄຊຍະບູລີ ໃນມູນ ຄ່າສົມທົບທຶນ 7,5 ລ້ານກີບ ແລະ ເງິນຈຳນວນດັ່ງກ່າວທີ່ນຳໄປປະກອບສ່ວນໃນຄັ້ງນີ້ ກໍ່ແມ່ນໄດ້ຈາກນ້ຳໃຈຂອງສະມາຊິກພາຍໃນທີມງານ ແລະ ບໍລິສັດ ກຸ່ມຄຳໄພ ຊະນະ ຈຳກັດຜູ້ດຽວ ຮ່ວມກັນ ໂດຍຕາງໜ້າມອບຂອງທ່ານ ວັນ ໄຊຍາ ຫຼວງໄຊ ຫົວໜ້າທີມ ວຽງຈັນ ເອັນດູໂຣ. ທ່ານ ນິຄົມ ພົມມະຈັນ ບອກຕື່ມອີກວ່າ: ແນວໃດກໍ່ດີ, ໃນຕໍ່ໜ້າທີມງານພວກເຮົາຍັງຈະສືບຕໍ່ຈັດຕັ້ງປະຕິບັດແນວທາງນະໂຍບາຍຂອງທີມເພື່ອຊ່ວຍເຫຼືອສັງຄົມຜູ້ທູກຍາກທີ່ຫ່າງໄກສອກຫຼີກໃຫ້ໄດ້ຢ່າງທົ່ວເຖິງ ແລະ ຕໍ່ເນື່ອງ ທຸກໆຄັ້ງທີ່ອອກເດີນທາງກໍ່ຈະໄດ້ຕິດຕາມບັນດາໂຮງຮຽນ, ບ້ານ ແລະ ອື່ນໆ ທີ່ທູກຍາກແທ້ໆ ຊ່ວຍເຫຼືອເຂົາເຈົ້າໄດ້ມີໂອກາດນຳໃຊ້ເຄື່ອງເລົ່ານີ້ ໃຫ້ຄືກັບສັງຄົມໃນເມືອງ ໂດຍສະເພາະໃນເດືອນສິງຫານີ້ ຈະສືບຕໍ່ນຳເອົາເຄື່ອງກິລາ, ອຸປະກອນກິລາ, ເຄື່ອງຄອມພີມເຕີ້, ເຄື່ອງປິ່ນເຕີ ແລະ ອື່ນໆອີກ ໄປມອບໃຫ້ ໂຮງຮຽນປະຖົມສຶກສາ ບ້ານນ້ຳງີມ ເມືອງພຽງ ແຂວງໄຊຍະບູລີ ຕື່ມອີກ.

ໂດຍ ສົງການ

ສະໜັບສະໜູນຂ່າວໂດຍ: