ລາຍລະອຽດຂ່າວ
ນັກສະນຸກເກີລາວ ລົງແຂ່ງຂັນ ຊີງແຊ໋ມປະເທດໄທ ສາມາດ ຊະນະ​ເຈົ້າພາບ​ໄທ​ 4 ນັດລວດ
ຂຽນເມື່ອ: 05/04/2019 11:04 | ໂດຍ: ເພຣເມັກເກີ | ອ່ານ: 128 ຄັ້ງ

       ດາວພະຈັນ ນັກກິລາສະນຸກເກີທີມຊາດລາວ (ມື 2 ລາວ) ຊະນະ 4 ນັດລວດ ຜ່ານເຂົ້າຮອບ 64 ຄົນ ສະນຸກເກີ 6 ແດງ ລາຍການ ໄຮຄຣາດ 2019 ທີ່ປະເທດໄທ, ທ້າວ ດາວພະຈັນ ພຸດທະບັນດິດ ເຈົ້າຂອງຮອງແຊ໋ມ ລາຍການ ສະນຸກເກີ 6 ແດງ ມຸກດາຫານ 2018 ໂຊຟອມເກັ່ງ ໄລ່ເອົາຊະນະນັກກິລາເຈົ້າຖິ່ນເຖິງ 4 ນັດລວດ ໂດຍສະເພາະຫຼ້າສຸດ ຊະນະ ເມັ້ນ ໄຮຄຣາດ ນັກກິລາສະນຸກເກີ ເຈົ້າພາບ ແຂວງນະຄອນຣາຊະສີມາ ໃນຮອບ 128 ໄປແບບສະບາຍມື 4-0 ເຟຣມ ຜ່ານເຂົ້າຮອບ 64 ຄົນສຸດທ້າຍ ແລະ ມີຄິວແຂ່ງຂັນໃນວັນທີ 7 ເມສາ 2019 ລາຍການແຂ່ງຂັນສະນຸກເກີ 6 ແດງ ຊີງແຊ໋ມປະເທດໄທ ຫຼື ລາຍການ Hi-Class Snooker Clup 2019.

         ໜ້າເສຍດາຍ ສິດທິເດດ ສັກບ່ຽງ ຫຼື ໜຶ່ງເມືອງລາວ ເຈົ້າຂອງຫຼຽນຄຳ ຊີເກມ ຄັ້ງທີ 29 ທີ່ປະເທດມາເລເຊຍ ເມື່ອປີ 2017 ຕົກຮອບ 128 ຄົນສຸດທ້າຍ ຫຼັງພາດທ່າໃຫ້ນັກສະນຸກເກີ ເຈົ້າຖິ່ນ. ການແຂ່ງຂັນລາຍການດັ່ງກ່າວ ຈັດຂຶ້ນໃນລະຫວ່າງວັນທີ 28 ມີນາ ຫາ 10 ເມສາ 2019 ເຊິ່ງມີນັກກິລາຈາກປະເທດໄທ ເຂົ້າຮ່ວມ 512 ຄົນ, ໃນນັ້ນ ນັກກິລາລາວ ສົ່ງເຂົ້າຮ່ວມແຂ່ງຂັນໂດຍໃຊ້ທຶນຂອງຕົນເອງ 100 ເປີເຊັນ ຈຳນວນ 5 ຄົນ ລາຍການນີ້ ໃຊ້ລະບົບແຂ່ງຂັນ 4 ໃນ 7 ເຟຣມ ຜ່ານການແຂ່ງຂັນຜົນງານຂອງທັບນັກສອຍຄິວລາວ ໃນຈຳນວນ 5 ຄົນ ແຕ່ຕົກຮອບໄປແລ້ວ 3 ຄົນ, ສົ່ງຜົນໃຫ້ຍັງເຫຼືອນັກກິລາລາວພຽງ 2 ຄົນ ເທົ່ານັ້ນ ທີ່ໄດ້ໄປຕໍ່ ແລະ ກໍ່ໄດ້ສືບຕໍ່ແຂ່ງຂັນໃນວັນທີ 4 ເມສາ ຜ່ານມາ ໂດຍສະເພາະ ທ້າວ ດາວພະຈັນ ພຸດທະບັນດິດ ນັກສະນຸກເກີ ມື 2 ລາວ ລົງແຂ່ງຂັນໃນຮອບ 4 ຈຳນວນ 128 ຄົນ ຕໍ່ແຕ້ມເຂົາເຈົ້າເຖິງ 8 ແຕ້ມ ກໍ່ເຮັດໃຫ້ແຟນສະນຸກເກີ ຊາວລາວບໍ່ຜິດຫວັງ ສາມາດເອົາຊະນະ ເມັ້ນ ໄຮຄຣາດ ນັກສອຍຄິວເຈົ້າຖິ່ນ ໄປແບບສະບາຍມື 4-0 ເຟຣມ ຜ່ານເຂົ້າຮອບ 64 ຄົນ ໄປພົບກັບ ປິ້ນ ພິຈິດ ເຊິ່ງຈະຈັດຂຶ້ນໃນວັນທີ 7 ເມສາ 2019. ຂະນະທີ່ອີກ 1 ຄົນ ສຸລິຍາ ມີນາລາວົງ ເຈົ້າຂອງຫຼຽນທອງ ຊີເກມ ຄັ້ງທີ 29 ທີ່ປະເທດມາເລເຊຍ ຈະລົງແຂ່ງຂັນໃນມື້ນີ້ (5 ເມສາ) ສ່ວນຜົນການແຂ່ງຂັນຈະເປັນແນວໃດນັ້ນ ຈະຂໍລາຍງານໃຫ້ຊາບຕື່ມອີກ.

      ຫຼັງເກມການແຂ່ງຂັນຮອບ 4 ໃນຈຳນວນ 128 ຄົນ, ທ້າວ ດາວພະຈັນ ພຸດທະບັນດິດ ໃຫ້ສຳພາດວ່າ: ພາຍຫຼັງທີ່ພວກເຮົານັກກິລາສະນຸກເກີທີມຊາດລາວ ສາມາດສ້າງຜົນງານປະຫວັດສາດໃຫ້ແກ່ປະເທດຊາດ ໃນຊີເກມ ຄັ້ງທີ 29 ທີ່ປະເທດມາເລເຊຍ ເມື່ອປີ 2017 ທີ່ຜ່ານມາ ກໍ່ໄດ້ສືບຕໍ່ນຳພານັກກິລາທັງຊຸດເກົ່າ ແລະ ຊຸດໃໝ່ ເຄື່ອນໄຫວເຂົ້າຮ່ວມແຂ່ງຂັນສະນຸກເກີລາຍການຕ່າງໆ ທີ່ຈັດຂຶ້ນທັງພາຍໃນ ແລະ ຕ່າງປະເທດ ທັງນີ້, ກໍ່ເພື່ອຮັກສາມູນເຊື້ອກຽມຄວາມພ້ອມເຂົ້າຮ່ວມປ້ອງກັນແຊ໋ມ ງານກິລາຊີເກມ ຄັ້ງທີ 30 ທີ່ປະເທດຟິລິບປິນ ຈະຈັດຂຶ້ນ ໃນທ້າຍປີນີ້. ແນວໃດກໍ່ດີ, ຕະຫຼອດໄລຍະຜ່ານມາ ນັກກິລາທຸກຄົນມີຄວາມຮັກແພງສາມັກຄີກັນເປັນກົກ ແລະ ພ້ອມກັນຖອດຖອນບົດຮຽນໃນການເຂົ້າຮ່ວມລາຍການຕ່າງໆຢ່າງກົງໄປກົງມາ ເພື່ອປັບປຸງຈຸດທີ່ຍັງເປັນຂໍ້ຄົງຄ້າງ ກໍ່ຄື ຂ້າພະເຈົ້າເອງ ສາມາດສ້າງຜົນງານຄວ້າອັນດັບທີ 2 ສະນຸກເກີ 6 ແດງ ຈັດຂຶ້ນ ທີ່ແຂວງມຸກດາຫານ ປະເທດໄທ ເມື່ອທ້າຍປີ 2018 ແລະ ຫຼ້າສຸດກຳລັງລົງແຂ່ງຂັນລາຍການ ໄຮຄາດ 2019 ທີ່ແຂວງນະຄອນຣາຊະສີມາ ປະເທດໄທ ກໍ່ສາມາດສ້າງຜົນງານ ຜ່ານນັກກິລານັກກິລາຈາກປະເທດໄທ ໃນຈຳນວນ 512 ຄົນ ລົງແຂ່ງຂັນ 4 ນັດ ຊະນະນັກກິລາເຈົ້າຖິ່ນລວດ 4 ນັດຊ້ອນ ແລະ ໃນ 4 ນັດລວດ ແມ່ນຊະນະໃນສະກໍດຽວ 4-0 ເຟຣມ. ແນວໃດກໍ່ຕາມ, ໃນຮອບຕໍ່ໄປ ຈະບໍ່ມີຄຳວ່າປະມາດຢ່າງເດັດສຳຄັນແມ່ນສະມາທິ ແລະ ຄວາມຕັ້ງໃຈ ພ້ອມທັງວາງແຜນໃຫ້ດີ ທັງນີ້, ກໍ່ເພື່ອຫວັງຢາກຈະສ້າງຜົນງານ ແລະ ຊື່ສຽງ ມາສູ່ປະເທດຊາດ.

ໂດຍ ສົງການ

ສະໜັບສະໜູນຂ່າວໂດຍ: