ລາຍລະອຽດຂ່າວ
ເມດິທອບ ການຢາ ຊຸກຍູ້ເຄື່ອງທັບນັກກິລາມວຍສາກົນລວມ ຮ່ວມຊີງແຊ໋ມອາຊີ 2019 ທີ່ປະເທດໄທ
ຂຽນເມື່ອ: 28/03/2019 11:03 | ໂດຍ: ເພຣເມັກເກີ | ອ່ານ: 171 ຄັ້ງ

      ບໍລິສັດ ​ເມ​ດິທອບ ການ​ຢາ ກອງທັບ ​ໃຫ້ການ​ຊຸກຍູ້​ເຄື່ອງ​ກິລາ ​ເຊິ່ງ​ເປັນຊຸດ​ວອມ 7 ຊຸດ ​ແລະ ​​ເຄື່ອງນຸ່ງຝຶກ​ຊ້ອມກິລາ 7 ຊຸດ ລວມມູນ​ຄ່າ 4 ລ້ານ​ກວ່າ​ກີບ ​ໃຫ້​ແກ່​ທັບ​ນັກ​ກິລາ​ຊົກມວຍ​ສາກົນ​ທີ​ມຊາດ​ລາວ, ຄະນະ​ນຳ​ 2 ທ່ານ, ຄູຝຶກ 1 ທ່ານ ​ແລະ ນັກ​ກິລາ 4 ຄົນ, ຍິງ 2 ຄົນ ກຽມ​ຄວາມ​ພ້ອມ​ເຂົ້າ​ຮ່ວມ​ການ​ແຂ່ງຂັນມວຍ​ສາກົນ ຊີງ​ແຊ໋ມອາຊີ ຈະ​ຈັດ​ຂຶ້ນ​ ລະຫວ່າງ​ວັນ​ທີ 6-27 ​ເມສາ 2019 ທີ່​ນະຄອນຫຼວງ ບາງກອກ ປະ​ເທດ​ໄທ.

      ພິທີ​ມອບ-ຮັບ​ເຄື່ອງ​ດັ່ງກ່າວ​ນີ້ ​ໄດ້​ມີ​ຂຶ້ນ ​ເມື່ອ​ວັນ​ທີ 27 ມີນາ ຜ່ານ​ມາ ທີ່​ຫ້ອງການ​ຄະນະ​ກຳມະການ​ໂອ​ແລມປິກ​ແຫ່ງ​ຊາດ​ລາວ ​ເປັນ​ການ​ກ່າວ​ມອບ​ຂອງ​ທ່ານ ນາງ ກັນລະຍານີ ມິ​ໄຊ​ ປະທານ​ບໍລິສັດ ​ເມ​ດິທອບ ການ​ຢາ ກອງທັບ ​ແລະ ຕາງໜ້າ​ກ່າວ​ຮັບ​ແມ່ນ​ທ່ານ ສົມ​ພອນ ມະນີ​ຄຳ ​ເລຂາທິການ​ສະຫະພັນ​ມວຍ​ສາກົນ​ແຫ່ງ​ຊາດ​ລາວ, ມີ​ທ່ານ ກະ​ເສມ ອິນ​ທະລາ ຮອງ​ປະທານ​ຄະນະ​ກຳມະການ​ໂອ​ແລ​ມປິກ​ແຫ່ງ​ຊາດ ​ແລະ ທ່ານ ອຸດອນ ຂັນ​ໄຊ ຫົວໜ້າ​ຄູ​ຝຶກ​ມວນ​ສາກົນ​ທີ​ມຊາດ ​ແລະ ນັກ​ກິລາ​ມວຍ​ສາກົນ​ທີ​ມຊາດ​ລາວ​ເຂົ້າ​ຮ່ວມ​ເປັນ​ສັກຂີ​ພິຍານ.

       ​ໂອ​ກາດນີ້, ທ່ານ ສົມ​ພອນ ມະນີ​ຄຳ ກ່າວ​ວ່າ: ​ແຜນການ​ເຂົ້າ​ຮ່ວມ​ໃນແຂ່ງຂັນມວຍ​ສາກົນ ຊີງ​ແຊ໋ມອາຊີ ຈະ​ຈັດ​ຂຶ້ນ​ ລະຫວ່າງ​ວັນ​ທີ 6-27 ​ເມສາ 2019 ທີ່​ນະຄອນຫຼວງ ບາງກອກ ປະ​ເທດ​ໄທ​ຄັ້ງ​ນີ້ ​ແມ່ນ​​ເນອນ​ໃນ​ແຜນ​ເປົ້າ​ໝາຍ​ຂອງ​ການ​ສົ່ງ​ເສີມນັກ​ກິລາ​ໃຫ້​ໄດ້​ເຄື່ອນ​ໄຫວ​ຮ່ວມ​ງານ​ຕ່າງໆ ຂອງ​ສະຫະພັນ​ມວຍ​ສາກົນ​ແຫ່ງ​ຊາດ ​ເພື່ອ​ສ້າງ​ນັກ​ກິລາ​ກຽມ​ສົ່ງເຂົ້າ​ຮ່ວມສ້າງ​ຜົນງານຄັ້ງ​ປະຫວັດສາດ ​ການ​ແຂ່ງຂັນງານ​ມະຫະກຳ​ກິລາ​ຊີ​ເກ​ມ ຄັ້ງ​ທີ 30 ທີ່​ປະ​ເທດ​ຟິລິບ​ປິນ ​ເປັນ​ເຈົ້າພາບ ​ຈະ​ຈັດ​ຂຶ້ນ​ໃນ​ທ້າຍ​ປີ​ 2019 ສຳລັບ​ການ​ແຂ່ງຂັນ​ຊີງ​ແຊ໋ມອາຊີ ທີ່​ປະ​ເທດ​ໄທ ​ຈະ​ສົ່ງນັກ​ກິລາ 4 ຄົນ, ຍິງ 2 ຄົນ ​ແລະ ຄູ​ຝຶກ 1 ຄົນ ກຽມ​ອອກ​ເດີນທາງ​ໄປ​ເກັບ​ຕົວ​ຝຶກ​ຊ້ອມ​ຢູ່​ທີ່​ແຂວງ​ນະຄອນຣາຊະ​ສີມາ ຣາຊະ​ອານາຈັກ​ໄທ ຈາກ​ນັ້ນ ​ໃນ​ຕົ້ນ​​ເດືອນ​ເມສາ 2019 ກໍ່​ຈະ​ສືບ​ຕໍ່​​ເຂົ້າ​ຮ່ວມ​​ແຂ່ງຂັນ​​ມວຍ​ສາກົນ ຊີງ​ແຊ໋ມທະວີບອາຊີ ທີ່​ນະຄອນຫຼວງ​ບາງກອກ ປະ​ເທດ​ໄທ ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 6-27 ​ເມສາ 2019 ຄາດ​ວ່າ​ຈະ​ມີ​ນັກ​ກິລາ​ຈາກ 40 ກວ່າ​ປະ​ເທດ​ໃນ​ທົ່ວ​ທະວີບອາຊີ ​ເຂົ້າ​ຮ່ວມ.

      ທ່ານ ນາງ ກັນລະຍານີ ມິ​ໄຊ​ ​ໃຫ້​ສຳພາດ​ວ່າ: ພວກ​ເຮົາຄອບຄົວ​ມີ​ໄຊ ​​​ມີ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງທີ່ໄດ້​ມີ​ໂອກາດປະກອບສ່ວນຊ່ວຍ​ເຫຼືອປະ​ເທດ​ຊາດ ກໍ່​ຄື ທັບ​ນັກ​ກິລາ​ລາວ ​ເຊິ່ງຕະຫຼອດ​ໄລຍະທີ່​ຜ່ານ​ມາ ​ກໍ່ຍັງ​ເຄີຍ​ໃຫ້ການ​ສະໜັບສະໜູນການ​ພັດທະນາ​ວົງ​ການ​ກິລາ​ລາວ​ມາຢ່າງ​ຫຼວງ​ຫຼາຍ ​ແລະ ການ​ຊຸກຍູ້​ຄັ້ງ​ນີ້ ກໍ່​ເປັນ​ນໍ້າ​ໃຈອັນ​ເລັກ​ນ້ອຍ ຂອງ​ຄອບຄົວ​ທີ່​ໄດ້​ປະກອບສ່ວນ​ຊ່ວຍ​ໃຫ້​ນັກ​ກິລາມວຍ​ສາກົນ​ທີ​ມຊາດ​ລາວ ​ໄດ້​ມີ​ຊຸດ​ງາມໆ​ ​ແລະ ທຸງຊາດ​ລາວ​ຕິດ​ເທິງ​ໜ້າ​ເອີກຢາງ​ສົມ​ກຽດ ​ເພື່ອຕາງໜ້າ​ປະ​ເທດຊາດ ​ເຂົ້າ​ຮ່ວມ​​ແຂ່ງຂັນສ້າງ​ຜົນງານ​ໃນ​ການ​ແຂ່ງຂັນ​ຄັ້ງ​ນີ້ອີກ​ດ້ວຍ.  

      ສຳລັບທັບ​ນັກ​ມວຍ​ສາກົນ​ທີ​ມຊາດ​ລາວ ສົ່ງ​ເຂົ້າ​ຮ່ວມ​ການ​ແຂ່ງຂັນ​ມວຍ​ສາກົນ​ຊີງ​ແຊ໋ມ ອາຊີ ​ຈະ​ຈັດ​ຂຶ້ນ​ທີ່​ປະ​ເທດ​ໄທໃນ​ຄັ້ງ​ນີ້ ປະກອບ​ມີ ທ້າວ​ ຄຳ​ພູ​ວັນ ຄຳ​ສູນ​ທອນ ​ໃນ​ຮຸ່ນ​ນໍ້າໜັກ 49 ກິ​ໂລກຣາມ, ທ້າວ ນັນທະ​ວົງ ສິມ​ພະ​ວົງ ​ໃນ​ຮຸ່ນ​ນໍ້າໜັກ 56 ກິ​ໂລກຣາມ, ນາງ ວິ​ໄລ​ພອນ ວົງ​ພະຈັນ ​ໃນ​ຮຸ່ນ​ນໍ້າໜັກ 54 ກິ​ໂລກຣາມ ​ແລະ ນາງ ດາວ​ມະ​ຍຸລີ ​ຈັນ​ທິລາດ ຫຼື ນ້ອງ​ດີ້​ສາວ​ລາວ ເຈົ້າ​ຂອງ​​ແຊ໋ມມວຍ​ໂລກ ຍິງ​ຄົນ​ທຳ​ອິດ​ຂອງ​ສປປ ລາວ ​ໃນ​ຮຸ່ນ​ນໍ້າໜັກ 54 ກິ​ໂລກຣາມ ນັກ​ກິລາ​ຊຸດ​ນີ້ ​​ໂດຍ​ແມ່ນ ທ່ານ​ ອຸດອນ ຂັນ​ໄຊ ​ເປັນຫົວໜ້າ​ຄູ​ຝຶກນຳພ​າ​ເຂົ້າ​ຮ່ວມ​ແຂ່ງຂັນ.

​ໂດຍ ສົງການ

ສະໜັບສະໜູນຂ່າວໂດຍ: