ລາຍລະອຽດຂ່າວ
ສຸກອາພອນ ສະຫຼອງວັນເກີດ ດ້ວຍການໄດ້ເປັນ ຜູ້ຫຼິ້ນຍອດຍ້ຽມໃຫ້ຕົ້ນສັງກັດ
ຂຽນເມື່ອ: 11/03/2019 00:03 | ໂດຍ: ເພຣເມັກເກີ | ອ່ານ: 639 ຄັ້ງ

       ສຸກອາພອນ ວົງຈຽງຄຳ ສະຫຼອງວັນເກີດ ຂອງຕົນເອງດ້ວຍການເປັນນັກເຕະຍອດຍ້ຽມ, ໃນການແຂ່ງຂັນບານເຕະ ໄທລີກ 1 ມື້ວານນີ້ວັນທີ 09/03/2019 ມີການແຂ່ງຂັນ ລະຫວ່າງ ໄຊນາດ ຮໍບິວ ເປີດບ້ານພົບກັບ ສິງຮາຊຽງຣາຍ ຢູໄນເຕັດ. ໂດຍໃນນັດນີ້ ສຸກອາພອນ ໄດ້ຮັບໂອກາດລົງສະຕາດເປັນ 11 ຜູ້ຫຼິ້ນຕົວຈິງໃຫ້ກັບຕົ້ນສັງກັດ ໄຊນາດ ຮໍບິວ ແລະກໍ່ບໍ່ເຮັດໃຫ້ແຟນບານຜິດຫວັງ ເຂົາໂຊຜົນງານໄດ້ຢ່າງໂດດເດັ່ນ ແລະມີສ່ວນຮ່ວມກັບທີມຕະຫຼອດ ພ້ອມທັງມີສ່ວນໃນການໄດ້ປະຕູຂອງທີມ ເຖິງແມ່ນວ່າປະຕູດັ່ງກ່າວຈະບໍ່ໄດ້ນຳໄຊຊະນະ ມາໃຫ້ທີມກໍ່ຕາມແຕ່ກໍ່ເປັນປະຕູສຳຄັນທີ່ເຮັດໃຫ້ ທີມເຈົ້າບ້ານສາມາດເກັບແຕ້ມໄດ້. ພາຍຫຼັງເກມສິ້ນສຸດລົງ ເຂົາກໍ່ໄດ້ຮັບການປະກາດໃຫ້ເປັນຜູ້ຫຼິ້ນຍອດຍ້ຽມຂອງການແຂ່ງຂັນນຳອີກ.

      ພາຍຫຼັງການແຂ່ງຂັນທາງທີມງານຂອງພວກເຮົາໄດ້ສຳພາດ ສຸກອາພອນແລະໄດ້ຮັບການເປີດເຜີຍວ່າ: ນັບແຕ່ເຊັນສັນຍາແລະໄດ້ຮ່ວມທີມກັບ ໄຊນາດຮໍບິວ ເປັນເວລາເດືອນກວ່າກໍ່ມີຄວາມກົດດັນພໍສົມຄວນ ເພາະກ່ອນໜ້ານີ້ກໍ່ເຄີຍໄດ້ຫຼິ້ນໃນໄທລີກເຊັ່ນກັນແຕ່ເປັນໄທລີກ 2 ແຕ່ທີມເອງກໍ່ຍັງບໍ່ທັນເຊື່ອໝັ້ນແບບເຕັມຮ້ອຍກັບຕົນເອງ, ເຊິ່ງໃນນັດທຳອິດກໍ່ໄດ້ໂອກາດລົງຫຼິ້ນແຕ່ກໍ່ໄດ້ຫຼິ້ນຍັງບໍ່ຄົບເວລາ, ສ່ວນນັດທິ 2 ຫຼຸດຈາກທີມຈິງຈົນມີຊື່ໄປຫຼິ້ນໃນຊຸດ B ຂອງສະໂມສອນ. ເມື່ອສະຖານະການເປັນແນວນັ້ນເຮົາກໍ່ໄດ້ສະແດງອອກໃຫ້ເຫັ້ນເຖິງຄວາມທຸ້ມເທ ແລະຕັ້ງໃຈໂດຍການມາຊ້ອມກ່ອນໝູ່ ເອົາຈິງເອົາຈັງໃນການຝຶກຊ້ອມຢ່າງໜັກ ຈົນໄດ້ຮັບໂອກາດໄດ້ລົງສະຕາດເປັນ 11 ຕົວຈິງໃນນັດນີ້ ແລະກາຍເປັນຂອງຂວັນວັນເກີດສຸດປະທັບໃຈດ້ວຍການຮັບລາງວັນນັກເຕະຍອດຍ້ຽມນຳອີກ.

      ແຕ່ສິ່ງປະທັບໃຈທີ່ສຸດໃນມື້ວານນີ້ສຸກອາພອນບອກວ່າແມ່ນເຫັນ ທຸງຊາດລາວຢູ່ໃນສະໜາມ ແລະຮູບຂອງທຸງຊາດລາວໄດ້ຖ່າຍທອດສົດຜ່ານທາງໂທລະພາບໄທ ໃນຜືນແຜນດິນໄທທີ່ສະແດງໃຫ້ເຫັນວ່າ ຄົນລາວທີ່ມີຄວາມສາມາດໃນການຫຼິ້ນລະດັບລີກສູງສຸດຂອງໄທ, ເຊິ່ງມັນສະແດງເຖິງຄວາມສາມາດຂອງຄົນລາວ ແລະ ເປັນສິ່ງທີ່ບອກໃຫ້ຄົນຕ່າງຊາດໄດ້ຮັບຮູ້ວ່າ ຄົນລາວກໍ່ສາມາດເຮັດໄດ້.

       ນອກຈາກນັ້ນນັກເຕະຄ່າຕົວເດືອນລະແສນກວ່າບາດ ໄດ້ກ່າວຕື່ມອີກວ່າ ຢາກໃຫ້ຄົນລາວຊ່ວຍສົ່ງແຮງໃຈ ແລະກຳລັງໃຈໃຫ້ຕົນເພື່ອສ້າງຜົນງານພິສູດໃຫ້ຊາດອື່ນໄດ້ເຫັນວ່າ ນັກເຕະລາວທີ່ເກັ່ງໆ ແລະມີຄວາມາສາມາດກໍ່ຍັງມີຢູ່.

ໂດຍ: ໃຈລາສີ

ພາບຈາກ: ຄູປອນປອນ

ສະໜັບສະໜູນຂ່າວໂດຍ: