ລາຍລະອຽດຂ່າວ
ເປັນຫຍັງ ມະໂນລົມ ກັບມາເຕະໃນລາວພຣີເມຍລີກ?
ຂຽນເມື່ອ: 04/03/2019 21:03 | ໂດຍ: ເພຣເມັກເກີ | ອ່ານ: 731 ຄັ້ງ

       ກ່ອນໜ້ານີ້ ມະໂນລົມ ພົມສຸວັນ ອາດີດນັກເຕະທີມຊາດລາວ, ເປັນນັກເຕະລາວອີກຄົນທີ່ເຄີຍໄປຄ້າແຂ່ງທີ່ໄທລີກ ໄດ້ມີຂ່າວວ່າ ຍົກເລີກສັນຍາກັບ ສະໂມສອນລາວໂຕໂຢຕ້າ ເພື່ອໄປຄ້າແຂ່ງໃນຕ່າງປະເທດ, ແຕ່ອາທິດຜ່ານມາ ໃນເກມລາວພຣີເມຍລີກ ແຟນບານຫຼາຍຄົນຄົງສັງເກດເຫັນ ມະໂນລົມ ລົງແຂ່ງຂັນໃຫ້ກັບຕົ້ນສັງກັດໃໝ່ EVO United ມັນເກີດຫຍັງຂຶ້ນ.

      ທີມງານເຮົາຈຶ່ງໄດ້ຕິດຕໍ່ສຳພາດ ທາງມະໂນລົມກ່ຽວກັບທີ່ໄປທີ່ມາຂອງການຍ້າຍທີມໃນຄັ້ງນີ້ ໂດຍມະໂນລົມກ່າວວ່າ: ທຳອິດມີທີມຕິດຕໍ່ມາ 4 ທີມຈາກ Division 1, 2 ແລະ 3 ຂອງປະເທດໄທ ໂດຍແຕ່ລະທີມກໍ່ສະເໜີເງື່ອນໄຂແຕກຕ່າງກັນ ແລະ ລະບົບການຫຼິ້ນບາງສະໂມສອນກະບໍ່ເຂົ້າກັບສະໄຕ໌ຂອງຕົນ. ສະນັ້ນ, ຂ້ອຍເອງ ກໍ່ຕ້ອງການລົງຫຼິ້ນໃຫ້ຫຼາຍທີ່ສຸດ ໃນປະສິດທິພາບ ແລະ ໃນເງື່ອນໄຂທີ່ດີຂຶ້ນ ເຊີ່ງແຕ່ລະເງື່ອນໄຂຍັງບໍ່ສົມບູນ ເລີຍຕັດສິນໃຈກັບມາເອີ້ນຄວາມຟິດກ່ອນ ເພື່ອການໄປຄັ້ງນີ້ຈະສົມບູນແບບ ສາມາດບຽດໂຄຕ້າອາຊ້ຽນໃຫ້ໄດ້ສະບາຍ ແລະ ເພື່ອໃຫ້ເຂົາຍອມຮັບສັກກະຍາພາບຂອງຄົນລາວ.
      ດັ່ງນັ້ນ ອີໂວຢູໄນເຕັດ ສະໂມສອນນ້ອງໃໝ່ ທີ່ເລື່ອນຊັ້ນຂຶ້ນມາຫຼິ້ນໃນລາວພຣີເມຍລີກດ້ວຍຄວາມສາມາດຂອງທີມ 100% ເປັນສະໂມສອນທີ່ມີທັງໂອກາດໃນການລົງຫຼີ້ນ ແລະ ເປັນໂຕຫຼັກຂອງທີມ ເລີຍຫວັງວ່າຈະ ເອີ້ນຄວາມຟິດກັບມາຄືນໄດ້ຫຼາຍທີ່ສຸດ.
      ແຕ່ທີ່ສຳຄັນກວ່ານັ້ນ ອີໂວຢູໄນເຕັດ ຍັງມີແຜນການສ້າງທີມທີ່ດີ ໃຫ້ຄວາມສຳຄັນແກ່ເຮົາໃນການເປັນຜູ້ນຳຄົນລຸ້ນໃໝ່ໃນການຈັດການ ທັງໃນ ແລະ ນອກສະໜາມ ມີການໂປຣໂມດທີ່ດີ ຄົນເຊຍຫຼາຍ ບັນຍາກາດໃນເກມເຈົ້າບ້ານກັບມາຄຶກຄື້ນທີ່ສຸດໃນລາວລີກຕອນນີ້ ເຊິ່ງນີ້ກໍ່ແມ່ນສ່ວນໜຶ່ງຂອງການຕັດສິນໃຈ.
      ສຸດທ້າຍນີ້ ກໍ່ຍັງຕ້ອງຕິດຕາມກັນເບິ່ງຕາມໂອກາດ ແລະ ຕົວຈິງ , ທຸກຢ່າງຂຶ້ນກັບເວລາ ອາດຈະຍ້າຍໄປ ຫລັງຈົບເຄິ່ງລະດູການ ຫລື ຢູ່ຈົນຈົບລະດູການ ທຸກຢ່າງຍັງບໍ່ຊັດເຈນທີ່ຈະພິສູດໄດ້ຄື ໃນສະຫນາມແຂ່ງຂັນ ເທົ່ານັ້ນ. ມະໂນລົມ ກ່າວ

ໂດຍ: ນັກຂ່າວເງົາ

ພາບຈາກ: ສະໂມສອນ EVO United

ສະໜັບສະໜູນຂ່າວໂດຍ: