ລາຍລະອຽດຂ່າວ
ກາຕ້າ ພິຊິດໄຊເໝືອ ຍີ່ປຸ່ນ! ສ້າງປະຫວັດສາດຄວ້າແຊ້ມເອຊຽນຄັບ ຄັ້ງທຳອິດ!!
ຂຽນເມື່ອ: 01/02/2019 23:02 | ໂດຍ: ແອັດມິນ | ອ່ານ: 126 ຄັ້ງ

     ການແຂ່ງຂັນເຕະບານຊາຍ ຊິງແຊ້ມອາຊີ ຫລື ເອຊຽນຄັບ 2019 ທີ່ປະເທດສະຫະລັດອາຣັບເອມີເຣດ (UAE) ເປັນເຈົ້າພາບ ຮອບຊິງຊະນະເລີດ ໃນມື້ນີ້ (1 ກຸມພາ 2019) ທັບຊາມູໄຣຟ້າ ທິມຊາດຍີ່ປຸ່ນ ແຊ້ມສູງສຸດ 4 ສະໄຫມ ພົບກັບ ທິມຊາດກາຕ້າ ເຈົ້າພາບບານໂລກ 2022 ທີ່ສ້າງປະຫວັດ 2 ໜ້າ ເຂົ້າຮອບ 4 ທິມສຸດທ້າຍຄັ້ງທຳອິດ ແລະ ກ້າວສູ່ຮອບຊິງຄັ້ງທຳອິດໃນປີນີ້ ແລະ ກາຕ້າ ເປັນທິມດຽວທີ່ຍັງບໍ່ເສຍປະຕູໃນການແຂ່ງຂັນຄັ້ງນີ້.

ນັດນີ້ ໜ້າສົນໃຈຢ່າງຍິ່ງ ເມື່ອສະພາບນັກກິລາທັງສອງທິມບໍ່ມີບັນຫາໂທດແບນ ແລະ ອາການເຈັບລົບກວນ ພ້ອມລົງສະໜາມທຸກຄົນ! ນີ້ເປັນການພົບກັນ ຄັ້ງທີ 5 ໃນເອຊຽນຄັບຂອງທັງສອງທິມ 4 ຄັ້ງຜ່ານມາ ປ່ຽນກັນຊະນະຝ່າຍລະຄັ້ງ ແລະ ສະເໝີກັນ 2 ຄັ້ງ, ຫລ້າສຸດພົບກັນ ໃນເອຊຽນຄັບ ປີ 2011 ທີ່ກາຕ້າເປັນເຈົ້າພາບ ຮອບ 8 ທິມສຸດທ້າຍ ຍີ່ປຸ່ນ ຊະນະ 3-2 ແລະ ພົບກັນ 5 ນັດຫລັງສຸດ ຍີ່ປຸ່ນ ບໍ່ເສຍ ຊະນະ 3 ສະເໝີ 2.

ຍີ່ປຸ່ນເຂົ້າຊິງເອຊຽນຄັບ 4 ຄັ້ງ ເປັນແຊ້ມທັງ 4 ຄັ້ງ, ຂະນະທີ່ ກາຕ້າ ເຂົ້າຊິງລາຍການຫລັງສຸດແມ່ນລາຍການ Gulf Cup ເຂດອາຣັບ ປີ 2014 ຊະນະ ຊາອຸດິອາຣາບີ 2-1.

ນັດນີ້ ເປັນກາຕ້າເປັນຝ່າຍເຮັດໄດ້ດີກວ່າ ທັບຊາມູໄຣຟ້າ ໂດຍສະເພາະຈັງຫວະສວນກັບ, ໃຊ້ໂອກາດບໍ່ເປືອງ ແລະ ຍິງປະຕູໄດ້ຄົມກວ່າ ຂຶ້ນນຳ 2-0 ໃນເຄິ່ງເວລາທີ 1 ຈາກຕີລັງກາຍິງຂອງ ອາໂມລ ອາລີ ກອງໜ້າເຊື້ອສາຍຊູດັງ ນາທີ 12' ເປັນປະຕູທີ 9 ຂອງ ອາໂມລ ອາລີ ໃນການແຂ່ງຂັນຄັ້ງນີ້ ເປັນດາວຍິງສູງສຸດ ແລະ ປະຕູທີສອງໄດ້ຈາກການຍິງໄກຂອງ ອັບດູລາຊິສ ຮາເຕັມ ນາທີ 27'.

ມາເຄິ່ງຫລັງ ຍີ່ປຸ່ນ ເດີນເກມບຸກໜັກກວ່າເກົ່າ ແລະ ສາມາດຍິງໄລ່ມາ 1-2 ຈາກການຍິງຂອງ ທາກູມິ ມິນາມີໂນະ ນາທີ 69' ແຕ່ຍີ່ປຸ່ນມາເສຍປະຕູ ນາທີ 83' ໄລຍະທີ່ທິມກຳລັງສ້າງສັນໂອກາດຍິງປະຕູຢ່າງຕໍ່ເນື່ອງ ຈາກຈັງຫວະສວນກັບ ກາຕ້າ ໄດ້ເຕະແຈ ຜູ້ຫລິ້ນຂອງກາຕ້າເອົາຫົວຕໍາບານໄປຖືກແຂນຂອງຫົວໜ້າທິມ ມາຢະ ໂຢຊິດະ ກອງຫລັງຈາກເຊົາແທ່ມຕັນ ຜູ້ຕັດສິນເບິ່ງ VAR ແລະ ໃຫ້ຈຸດໂທດແກ່ກາຕ້າ ແລະ ເປັນ ອາຄຣາມ ອາຟິບ ຈອມ Assist ສົ່ງບານໃຫ້ເພື່ອນຍິງປະຕູເຖິງ ໜ່ວຍໃນຄັ້ງນີ້ ຮັບໜ້າທີ່ສັງຫານບໍ່ຜິດພາດ ຈົບເກມ ກາຕ້າ ເຈົ້າພາບບານໂລກ 2022 ຊະນະ ຍີ່ປຸ່ນ 3-1 ສ້າງປະຫວັດສາດ ຄວ້າແຊ້ມເອຊຽນຄັບ ເປັນຄັ້ງທຳອິດ! ສ້າງຂວັນກຳລັງໃຈ ແລະ ຄວາມໝັ້ນໃຈກ່ອນເປັນເຈົ້າພາບບານໂລກ 2022.

ກາຕ້າ ຮັບຂັນແຊ້ມ ພ້ອມເງິນລາງວັນ 5 ລ້ານໂດລາສະຫະລັດ ແລະ ສິດເປັນຕົວແທນທະວີບອາຊີ ເຂົ້າຮ່ວມຊິງແຊ້ມ FIFA Confederations Cup 2021 ທີ່ຕົນເອງເປັນເຈົ້າພາບ, ແຕ່ ກາຕ້າ ໄດ້ສິດເຂົ້າຮ່ວມໃນນາມເປັນເຈົ້າພາບແລ້ວ ຈຶ່ງມອບສິດນັ້ນໃຫ້ຮອງແຊ້ມ ທິມຊາດຍີ່ປຸ່ນ ໄດ້ເຂົ້າຮ່ວມເຊັ່ນກັນ, ສຳລັບເງິນລາງວັນຮອງແຊ້ມເອຊຽນຄັບຄັ້ງນີ້ ໄດ້ຮັບ 3 ລ້ານໂດລາສະຫະລັດ.

ລາງວັນນັກເຕະດີເດັ່ນ MVP ປະຈຳການແຂ່ງຂັນຄັ້ງນີ້ ເປັນຂອງ ອາໂມລ ອາລີ ກອງໜ້າທິມຊາດກາຕ້າ ພ້ອມກັບລາງວັນດາວຍິງສູງສຸດ ຍິງໄດ້ 9 ປະຕູ ຈາກການລົງສະໜາມ 7 ນັດ ຮັບເງິນລາງວັນ 30,000 ໂດລາສະຫະລັດ, ລາງວັນຜູ້ຮັກສາປະຕູດີເດັ່ນເປັນຂອງ ຊາອັດ ອາວຊິບ ທິມຊາດກາຕ້າ ເສຍພຽງ 1 ປະຕູ, ສ່ວນລາງວັນທິມມາລະຍາດດີເດັ່ນເປັນຂອງທິມຊາດຍີ່ປຸ່ນ.

ເປັນກຽດເຂົ້າຮ່ວມມອບລາງວັນຄັ້ງນີ້ມີ ທ່ານ ຈານນີ້ ອິນຟານຕີໂນ້ ປະທານສະຫະພັນບານເຕະນາໆຊາດ ຫລື FIFA, ທ່ານ ຊີກ ຊາວມານ ບິນ ອີບຣາຮິມ ອາວ-ຄາຣີຟ້າ ປະທານສະຫະພັນບານເຕະອາຊີ ຫລື AFC ພ້ອມດ້ວຍປະທານສະຫະພັນບານເຕະຍີ່ປຸ່ນ, ກາຕ້າ ແລະ ຜູ້ໃຫ້ການສະໜັບສະໜູນ.

Photo: AsianCup

ສະໜັບສະໜູນຂ່າວໂດຍ: