ລາຍລະອຽດຂ່າວ
ຫວຽດນາມ ສູ້ສົມສັກສີ ເຖິງເສຍໄຊໃຫ້ ຍີ່ປຸ່ນ! ຕົກຮອບ 8 ທິມ!! ເອຊຽນຄັບ 2019
ຂຽນເມື່ອ: 25/01/2019 10:01 | ໂດຍ: ແອັດມິນ | ອ່ານ: 216 ຄັ້ງ

      ມື້ວານນີ້ (24 ມັງກອນ 2019) ການແຂ່ງຂັນເຕະບານຊາຍ ຊິງແຊ້ມອາຊີ ຫລື ເອຊຽນຄັບ 2019 ທີ່ສະຫະລັດອາຣັບເອມີເຣສ ຮອບ 8 ທີມສຸດທ້າຍ ຄູ່ທີ 1 ທິມຊາດຫວຽດນາມ ແຊ້ມອາຊຽນ 2018 ພົບກັບ ທິມຊາດຍີ່ປຸ່ນ ແຊ້ມເອຊຽນຄັບສູງສຸດ 4 ສະໄຫມ, ນັດນີ້ ປ໊າກຮັງໂຊ ຄູຝຶກທິມຊາດຫວຽດນາມ ຊາວສາທາລະນະລັດເກົາຫລີ ຍັງຮັກສານັກເຕະຊຸດຊະນະ ຈໍແດນ (ຊັອກດານີ້) ໃນຮອບ 16 ທິມຜ່ານມາ, ນຳໂດຍ: ຫງຽນຄົງເຟືອງ, ຫງຽນກວາງຫ໊າຍ, ຟາມວັນດຶກ ແລະ ຫງຽນຮຸຍຮຸ່ງ.

ຂະນະທີ່ ຮາຈິເມະ ໂຢຣິຢະຊຸ ຄູຝຶກທິມຊາດຍີ່ປຸ່ນ ເຖິງວ່າຈະຂາດ ມູໂຕະ ກອງໜ້າຈາກ ນິວຄາສເຊິນ ຢູໄນເຕັດ ແຕ່ອາໄຫລ່ທີ່ມີຍັງມີຄຸນນະພາບສູງ ວາງ ນາກາໂຕໂມະ, ຊິບາຊາກິ, ຮາຣາກູຊິ ແລະ ຄິຕາກາວະ ນຳທັບ.

ຕັ້ງທີ 1 ທັບຊາມູໄຣຟ້າ ທິມຊາດຍີ່ປຸ່ນ ເປັນຝ່າຍຄອບຄອງບານ ເດີນເກມບຸກໃສ່ ມັງກອນໄຟແຫ່ງອາຊຽນ ທິມຊາດຫວຽດນາມ ແຕ່ຖືກຈັງຫວະສວນກັບຂອງຫວຽດນາມ ທີ່ມີ ຫງຽນຄົງເຟືອງ, ຫງຽນກວາງຫ໊າຍ ໃຊ້ຄວາມໄວປັ່ນປ່ວນເກມຮັບຂອງທັບຊາມູໄຣໜັກສົມຄວນ ຈົນເກືອບເສຍປະຕູປະມານ 2-3 ຈັງຫວະ ສ່ວນ ຍີ່ປຸ່ນ ມີໂອກາດແຕ່ບໍ່ຫລາຍ, ຊຶ່ງໃນໄລຍະ ກາງເຄິ່ງເວລາທີ 1 ຍີ່ປຸ່ນໄດ້ສົ່ງບານເຂົ້າປະຕູຫວຽດນາມ ຈາກຈັງຫວະເຕະແຈ ແຕ່ກຳມະການບໍ່ແນ່ໃຈ ອາດຖືກແຂນຜູ້ຫລິ້ນ ຍີ່ປຸ່ນ ຈຶ່ງຂໍເບິ່ງ VAR ທີ່ນຳມາໃຊ້ໃນຮອບ 8 ທິມສຸດທ້າຍຈົນເຖິງຮອບຊິງ ຊຶ່ງຜູ້ຕັດສິນຈາກເຈົ້າພາບເບິ່ງແລ້ວເຫັນວ່າ: ບານຖືກແຂນຜູ້ຫລິ້ນຍີ່ປຸ່ນ ຈຶ່ງບໍ່ໃຫ້ເປັນປະຕູ ຈົບຕັ້ງທີ 1 ສະເໝີກັນ 0-0.

ມາເຄິ່ງເວລາທີ 2 ຍີ່ປຸ່ນແກ້ເກມມາດີ ສ້າງສັນເກມບຸກໄດ້ຫລາຍຂຶ້ນ ແລະ ມາໄດ້ຈຸດໂທດ ຈາກຈັງຫວະ ບຸຍທ່ຽນຈຸງ ສະກັດ ຣິດຊຸ ໂດອັນ ໃນເຂດໂທດ ກຳມະການຂໍເບິ່ງ VAR ແລະ ຕັດສິນໃຫ້ເປັນຈຸດໂທດແກ່ຍີ່ປຸ່ນ ແລະ ເປັນ ຣິດຊຸ ໂດອັນ ລຸກຂຶ້ນມາຮັບໜ້າທີ່ສັງຫານ ເປັນປະຕູຂຶ້ນນຳໃຫ້ ຍີ່ປຸ່ນ 1-0 ນາທີ 57' ເມື່ອເສຍປະຕູ ຫວຽດນາມ ພະຍາຍາມບຸກຫວັງທວງປະຕູຄືນ ແຕ່ເຈາະເກມຮັບທັບຊາມູໄຣບໍ່ຜ່ານ ຈົບເກມ ຍີ່ປຸ່ນ ຊະນະ ຫວຽດນາມ ວຸດວິດ 1-0.

ຍີ່ປຸ່ນ ເຂົ້າສູ່ຮອບຮອງຊະນະເລີດ ຫລື ຮອບ 4 ທິມສຸດທ້າຍ ໄປພົບກັບ ທິມຊາດອີຣານ ອະດີດແຊ້ມ 3 ສະໄຫມ ທີ່ຊະນະ ທິມຊາດຈີນ ອະດີດຮອງແຊ້ມ 2 ສະໄຫມ 3-0. ຈະແຂ່ງຂັນໃນວັນທີ 28 ມັງກອນນີ້ ເວລາ 21:00.

Image: Asian Cup 2019

ສະໜັບສະໜູນຂ່າວໂດຍ:



ຂ່າວລ່າສຸດ