ລາຍລະອຽດຂ່າວ
ເອັມບັບເປ້ ຂຶ້ນນຳດາວຍິງສູງສຸດ! ຫລັງນຳ PSG ບຸກຄວ້າ 3 ຄະແນນທີ່ ອາມ້ຽນ!!
ຂຽນເມື່ອ: 13/01/2019 14:01 | ໂດຍ: ແອັດມິນ | ອ່ານ: 297 ຄັ້ງ

      ເຕະບານ ລີກອ໋ອງຝຣັ່ງ ລະດູການ 2018-19 ຄືນຜ່ານມາ ປາຣິສ ແຊັງແຊກແມັງ ທິມນຳ ທັງເປັນແຊ້ມເກົ່າ 5 ສະໄຫມຊ້ອນ ລົງຫລິ້ນເປັນນັດທີ 18 ໃນລີກລະດູການນີ້ ບຸກໄປຢາມ ອາມ້ຽນສ໌ (Amiens) ທິມທ້າຍຕາຕະລາງ ຊຶ່ງລົງຫລິ້ນເປັນນັດທີ 20 ຫລາຍທິມລົງຫລິ້ນບໍ່ເທົ່າກັນ ເພາະເລື່ອນການແຂ່ງຂັນບາງຄູ່ຫລັງຈາກເກີດການປະທ້ວງ ເມື່ອທ້າຍປີ 2018 ຜ່ານມາ.

PSG ຫາກໍ່ຜິດຫວັງຈາກການຕົກຮອບ 8 ທິມ ລີກຄັບຝຣັ່ງ (Coupe de la Ligue) ໃນກາງອາທິດຜ່ານມາ ເສຍຄາບ້ານໃຫ້ ແກັງກ໊ອງ ທິມອັນດັບສຸດທ້າຍຂອງລີກປະຈຸບັນ 1-2, ນັດນີ້ ເນັ້ນເປັນພິເສດຕ້ອງໃຫ້ໄດ້ 3 ຄະແນນ ເຖິງວ່າບໍ່ມີ ເນມາຣ ແຕ່ໄດ້ ເອດີສັນ ຄາວານີ້ ແລະ ຄີລຽນ ເອັມບັບເປ້ ຍິງປົດຄວາມກົດດັນນາທີ 50' ແລະ ນາທີ 70' ກ່ອນປິດທ້າຍຈາກ ມາຣກິນຢັອສ ນາທີ 79' ຈົບເກມ ປາຣິສ ແຊັງແຊກແມັງ ແຊ້ມເກົ່າ ບຸກຊະນະ ອາມ້ຽນສ໌ 3-0. ເອັມບັບເປ້ ຍິງປະຕູທີ 14 ໃນລີກລະດູການນີ້ ຂຶ້ນນຳດາວຍິງສູງສຸດ ລວມກັບລາຍການອື່ນເປັນ 17 ປະຕູ ຈາກ 21 ນັດ.

ຈຸດປ່ຽນສຳຄັນເຮັດໃຫ້ເຈົ້າບ້ານ ເສຍເພີ່ມອີກສອງປະຕູແມ່ນ ຄາເລັດ ອາເດນອນ ກອງຫລັງໄດ້ 2 ເຫລືອງເປັນໃບແດງ ນາທີ 66'. ແຊ້ມເກົ່າ ບວກເພີ່ມເປັນ 50 ຄະແນນ ຈາກ 18 ນັດ ນຳອັນດັບສອງ ລິນ (Lille) ເຖິງ 13 ຄະແນນ ແລະ ຍັງແຂ່ງໜ້ອຍກວ່າ 2 ນັດ ໂອກາດປ້ອງກັນແຊ້ມສົດໃສ ພ້ອມຍັງບໍ່ເສຍໃນລີກລະດູການນີ້ 18 ນັດ ຊະນະ 16 ສະເໝີ 2 ຍິງ 53 ເສຍ 10 ປະຕູ.

ສະໜັບສະໜູນຂ່າວໂດຍ:



ຂ່າວລ່າສຸດ