ລາຍລະອຽດຂ່າວ
PSG ຫັກປີກຫົງແດງ! ຢູຟ້າ ແຊ້ມປ້ຽນລີກ ຮອບແບ່ງກຸ່ມ ນັດທີ 5 ຄືນຜ່ານມາ!!
ຂຽນເມື່ອ: 29/11/2018 11:11 | ໂດຍ: ແອັດມິນ | ອ່ານ: 809 ຄັ້ງ

      ເຕະບານຢູຟ້າ ແຊ້ມປ້ຽນລີກ 2018-19 ຄືນວານນີ້ ຮອບແບ່ງກຸ່ມນັດສຸດທ້າຍຂອງກຸ່ມ C ປາຣິສ ແຊັງແຊກແມັງ ເປີດບ້ານ Parc des Princes ຕ້ອນຮັບຫົງແດງລີເວີພູລ ຮອງແຊ້ມລະດູການຜ່ານມາ ນັດນີ້ທັງສອງທິມຈັດທັບເຕັມສູບ PSG ເຈົ້າບ້ານນຳໂດຍ ເນມາຣ, ເອັມບັບເປ້, ເອດີສັນ ຄາວານີ້ ແລະ ອັງເຄວ ດີມາເຣຍ, ຂະນະທີ່ ລີເວີພູລ ນຳໂດຍ 3 ປະສານແດນໜ້າ ມາເນ້, ຊາລ້າ ແລະ ຟີມີໂນ້, ນັດທຳອິດພົບກັນທີ່ແອນຟີວ ຫົງແດງຊະນະ 3-2 ມາໃນນັດນີ້ PSG ເຈົ້າບ້ານເດີນເກມບຸກແຕ່ຕົ້ນເກມ ແລະ ສ້າງສັນໂອກາດຍິງປະຕູໄດ້ຢ່າງຕື່ນເຕັ້ນ ອອກນຳໄວ 1-0 ຈາກຈັງຫວະ ເວີຈິວ ຟານໄດ໋ ສະກັດບານມາເຂົ້າທາງ ຮວນເບີນັດ ນາທີ 13'.

     ເມື່ອຫົງແດງເສຍປະຕູ ເກມເປີດໜ້າແລກກັນຫລາຍຂຶ້ນ PSG ມາໄດ້ປະຕູທີ 2 ຈາກຈັງຫວະສວນກັບ ເອັມບັບເປ້ ຫລຸດໄປທາງຟາກຊ້າຍ ຜ່ານບານເຂົ້າເຂດໂທດໃຫ້ ເອດີສັນ ຄາວານີ້ ຍິງບານໄປຕໍາ ອາລີສຊອນ ຜູ້ຮັກສາປະຕູລີເວີພູລ ມາເຂົ້າທາງ ເນມາຣ ຍິງຊໍ້າເຂົ້າປະຕູນາທີ 37' ລີເວີພູລ ພະຍາຍາມຮືດສູ້ ແລະ ມາໄດ້ປະຕູສຳຄັນໄລຍະຕໍ່ເວລາບາດເຈັບຈາກການຍິງຈຸດໂທດຂອງ ເຈມສ໌ ມິວເນີ ນາທີ 45+1' ໄດ້ຈຸດໂທດຈາກຈັງຫວະ ອັງເຄວ ດີມາເຣຍ ໂດດສຽບ ມາເນ້ ໃນເຂດໂທດ ຈົບຕັ້ງທີ 1 PSG ນຳລີເວີພູລ 2-1.

     ມາເຄິ່ງຫລັງ ລີເວີພູລ ຄອງເກມໄດ້ຫລາຍຂຶ້ນ ແຕ່ບໍ່ສາມາດເຈາະເກມຮັບຂອງ PSG ຈົບເກມ ປາຣິສ ແຊັງແຊກແມັງ ບຽດຊະນະ ລີເວີພູລ 2-1 ເກັບ 3 ຄະແນນສຳຄັນສຳເລັດ!

+ ເນມາຣ ມີສ່ວນກັບ 50 ປະຕູ ໃນແຊ້ມປ້ຽນລີກ ຍິງ 31 ປະຕູ ສົ່ງ 19 ໃຫ້ເພື່ອນຍິງ 19 ໜ່ວຍ (ລວມຢູ່ກັບ 2 ສະໂມສອນ ບາຣຊ້າ ແລະ PSG).

+ ເນມາຣ ກາຍເປັນນັກເຕະຊາວເບຣຊິນ ຍິງປະຕູໃນແຊ້ມປ້ຽລີກຫລາຍສຸດ 31 ໜ່ວຍ ຈາກ 51 ນັດ, ແຊງ ຣິຄາໂດ້ ກາກ້າ ຍິງໄດ້ 30 ໜ່ວຍ ຈາກ 86 ນັດ.

+ PSG ຊະນະເປັນນັດທີ 50 ຈາກ 95 ນັດ ໃນແຊ້ມປ້ຽນລີກ ໄວສຸດອັນດັບ 3 ຮອງຈາກ ຣຽວມາດຣິດ ໃຊ້ເວລາ 88 ນັດ ແລະ ບາຣຊ້າ 93 ນັດ.

+ PSG ບໍ່ເສຍໃນບ້ານ 21 ນັດຕິດຕໍ່ກັນ ສະເພາະເກມແຊ້ມປ້ຽນລີກ ຮອບແບ່ງກຸ່ມ ນັດຫລ້າສຸດທີ່ເສຍຄືເສຍໃຫ້ ຊີເອັສເຄເອ ມັອສໂຄ ຈາກຣັດເຊຍ 1-3 ໃນເດືອນທັນວາ ປີ 2004.

+ ລີເວີພູລ ເສຍ 5 ນັດລວດ ເກມຢາມ ຢູຟ້າ ແຊ້ມປ້ຽນລີກ ເປັນຄັ້ງທຳອິດ.

ຜົນອີກ 1 ຄູ່ໃນກຸ່ມດຽວກັນ ນາໂປລີ ເປີດບ້ານ ຊະນະ ເຣດສະຕາຣ ເບວເກຣດ 3-1 ກຸ່ມນີ້ຜ່ານ 5 ນັດ ນາໂປລີ ເປັນທິມນຳ ມີ 9 ຄະແນນ, PSG ມີ 8 ຄະແນນ, ລີເວີພູລ ມີ 6 ຄະແນນ ທັງສາມທິມລຸ້ນເຂົ້າຮອບ 16 ທິມໃນນັດສຸດທ້າຍ ໂດຍ ນາໂປລີ ແລະ PSG ຂໍພຽງສະເໝີເຂົ້າຮອບ ສ່ວນລີເວີພູລ ຖ້າຈະເຂົ້າຮອບ ຕ້ອງຊະນະນາໂປລີ ໃຫ້ຫ່າງ 2 ໜ່ວຍ ຂະນະທີ່ ເຣດສະຕາຣ ເບວເກຣດ ມີ 4 ຄະແນນ ລຸ້ນໄດ້ພຽງອັນດັບ 3 ຂອງກຸ່ມເພື່ອຊິງສິດໄປຫລິ້ນຢູໂຣປ້າລີກ. ນັດສຸດທ້າຍ ລີເວີພູລ ພົບ ນາໂປລີ, ເຣດສະຕາຣ ເບວເກຣດ ພົບ PSG ຈະແຂ່ງຂັນໃນວັນທີ 11 ທັນວານີ້.

Info: ຂ່າວກີລາ Lao National TV

Photo: UEFA Champions League




ຂ່າວຍອດນິຍົມ 7 ວັນລ່າສຸດ