ລາຍລະອຽດຂ່າວ
ສ້າງປະຫວັດສາດ! ເບວຢ້ຽມ ຄວ້າແຊ້ມກັອຟຄູ່ຊາຍຊິງແຊ້ມໂລກ 2018
ຂຽນເມື່ອ: 26/11/2018 09:11 | ໂດຍ: ແອັດມິນ | ອ່ານ: 714 ຄັ້ງ

      ການແຂ່ງຂັນກັອຟຄູ່ຊາຍຊິງແຊ້ມໂລກ ຄັ້ງທີ 59 ທີ່ສະໜາມ Metropolitan Golf Club ຢູ່ South Oakleigh ປະເທດອົດສະຕຣາລີ ໃນວັນທີ 22-25 ພະຈິກ 2018 ມີນັກກັອຟຈາກ 28 ປະເທດທີ່ຜ່ານການຄັດເລືອກເຂົ້າຮ່ວມ ເປັນຕົ້ນ: ສະຫະລັດອາເມຣິກາ, ອັງກິດ, ເບວຢ້ຽມ (ແບນຊິກ), ອາຟຣິກາໃຕ້, ຝຣັ່ງ, ເຢຍລະມັນ, ແອັສປາຍ (ສະເປນ), ສະວີເດັນ (ຊູແອັດ), ການາດ້າ, ດານມາກ, ສະກັອດແລນ, ຍີ່ປຸ່ນ, ສາທາລະນະລັດເກົາຫລີ, ໄທ, ຈີນ ແລະ ອົດສະຕຣາລີ ເຈົ້າພາບ.

ຜ່ານການແຂ່ງຂັນ 4 ວັນ 72 ຂຸມ ປະກົດວ່າ: ໂທມາສ ປີເຕີສ໌ ແລະ ໂທມາສ ເດຕຣີ ຈາກເບວຢ້ຽມ (ແບນຊິກ) ຄວ້າແຊ້ມໂລກມາຄອງເປັນຄັ້ງທຳອິດ ຄະແນນລວມ -23 ເອົາຊະນະຄູ່ຈາກເຈົ້າພາບອົດສະຕຣາລີ ແລະ ເມັກຊິໂກ້ 3 ສະໂຕຣກ ຮັບຂັນແຊ້ມພ້ອມເງິນລາງວັນ 2,240,000 ໂດລາສະຫະລັດ ຫລື ປະມານ 19 ຕື້ກີບ. ສ່ວນແຊ້ມເກົ່າດານມາກ ຈົບອັນດັບທີ 4 ຮ່ວມກັບ ການາດ້າ ເກັບໄດ້ -17.

ການແຂ່ງຂັນກັອຟຄູ່ຊາຍຊິງແຊ້ມໂລກ ຈັດຂຶ້ນ 2 ປີ ມີ 1 ຄັ້ງ ເມື່ອກ່ອນຈັດຂຶ້ນທຸກປີ ມາປ່ຽນຮູບແບບໃຫມ່ ໃນປີ 2016 ທິມທີ່ເປັນແຊ້ມຫລາຍສຸດແມ່ນ ສະຫະລັດອາເມຣິກາ 24 ສະໄຫມ ຮອງລົງມາອົດສະຕຣາລີ ແລະ ອາຟຣິກາໃຕ້ ທິມລະ 5 ສະໄຫມ.

Cr: ຂ່າວກີລາ Lao National TV

Photo: World Cup of Golf




ຂ່າວຍອດນິຍົມ 7 ວັນລ່າສຸດ