ລາຍລະອຽດຂ່າວ
ກ໊ອງເຕ້ ຕໍ່ສັນຍາກັບເຊວຊີ 5 ປີ ຮັບຄ່າເມື່ອຍສູງສຸດຂອງສະໂມສອນ 3 ຕື້ກວ່າກີບຕໍ່ອາທິດ! ພ້ອມສະຖິຕິທີ່ໜ້າສົນໃຈທີ່ກ໊ອງເຕ້ສ້າງຂຶ້ນ!!
ຂຽນເມື່ອ: 23/11/2018 22:11 | ໂດຍ: ແອັດມິນ | ອ່ານ: 774 ຄັ້ງ

      ເອັນໂກໂລ ກ໊ອງເຕ້ (N'Golo Kante) ກອງກາງສາລະພັດປະໂຫຍດທິມຊາດຝຣັ່ງ ອາຍຸ 27 ປີ ຕົກລົງຕໍ່ສັນຍາກັບຕົ້ນສັງກັດ ເຊວຊີເຖິງປີ 2023 ຮັບຄ່າເມື່ອຍເພີ່ມຂຶ້ນຈາກ 120,000 ປອນ ຕໍ່ອາທິດເປັນ 290,000 ປອນຕໍ່ອາທິດ ຫລື ປະມານ 3 ຕື້ 200 ລ້ານກວ່າກີບ ສູງສຸດເປັນອັນດັບ 1 ຂອງທິມ ແຊງ ເອເດັນອາຊາ ທີ່ໄດ້ 200,000 ປອນອາທິດ ແຕ່ຄາດວ່າ ອາຊາ ອາດໄດ້ຫລາຍກວ່າ ກ໊ອງເຕ້ ຖ້າຕົກລົງຕໍ່ສັນຍາກັບທິມ.

      ກ໊ອງເຕ້ ຍ້າຍຈາກ ເລັສເຕີ ຊິຕີ້ ມາຢູ່ກັບເຊວຊີໃນປີ 2016 ດ້ວຍຄ່າຕົວ 32 ລ້ານປອນ ລົງຫລິ້ນຊ່ວຍທິມ 105 ນັດ ຍິງໄດ້ 4 ປະຕູ, ສະເພາະໃນພຣີເມ໋ຍລີກ 81 ນັດ ຍິງ 3 ປະຕູ, ລົງສະໜາມຊ່ວຍທິມຊາດຝຣັ່ງ 36 ນັດ ຍິງ 1 ປະຕູ. ໄດ້ແຊ້ມພຣີເມ໋ຍລີກກັບເຊວຊີ ລະດູການ 2016-17 ແລະ ແຊ້ມເອຟເອຄັບ 2017-18, ໄດ້ແຊ້ມບານໂລກ 2018 ກັບທິມຊາດຝຣັ່ງ ແລະ ຮອງແຊ້ມຢູໂຣ 2016.

      ລາງວັນສ່ວນຕົວຢູ່ກັບສິງຟ້າເຊວຊີ ໄດ້ລາງວັນນັກເຕະດີເດັ່ນຂອງສະໂມສອນລະດູການ 2017-18, ເປັນນັກເຕະດີເດັ່ນແຫ່ງປີ 2017 ຂອງປະເທດຝຣັ່ງ ແລະ ຕິດທິມດີເດັ່ນຂອງຟີຟ້າປະຈຳປີ 2018. ກ໊ອງເຕ້ ກ່າວວ່າ: '' 2 ປີຢູ່ກັບທິມນີ້ ມັນເປັນເວລາທີ່ສວຍງາມຫລາຍ! ຂ້ອຍເຊື່ອວ່າຈະພົບກັບຜົນສຳເລັດອັນໃຫມ່, ຄວາມທ້າທາຍໃຫມ່, ຂ້ອຍຮັກເມືອງແຫ່ງນີ້ ຮັກສະໂມສອນ ແລະ ມີຄວາມສຸກກັບທີ່ນີ້!!

        ກ໊ອງເຕ້ ມີສະຖິຕິທີ່ດີຢ້ຽມກັບເຊວຊີ ເປັນນັກເຕະທີ່ຍາດບານກັບຄູ່ແຂ່ງໄດ້ຫລາຍສຸດໃນທິມ 657 ຄັ້ງ ແຊງໜ້າ ເນມັນຢ້າ ມາຕິກ ອະດີດກອງກາງຂອງທິມທີ່ຍ້າຍໄປຢູ່ກັບ ແມນຢູ ດ້ວຍຈຳນວນ 267 ຄັ້ງ, ພ້ອມກັນນີ້ ການປະທະກັບຄູ່ແຂ່ງ 262 ຄັ້ງ ໃນພຣີເມ໋ຍລີກ ເອົາຊະນະໄດ້ເຖິງ 172 ຄັ້ງ ເປັນຮອງພຽງ ອີດຣີສຊ້າ ເກລ ກອງກາງຊາວເຊເນການຂອງເອຟເວີຕັນ ທີ່ປະທະກັບຄູ່ແຂ່ງ 310 ຄັ້ງ ເອົາຊະນະໄດ້ 228 ຄັ້ງ, ນອກຈາກນີ້ ການສົ່ງບານໃຫ້ເພື່ອນຮ່ວມທິມ 4967 ຄັ້ງ ສຳເລັດຜົນເຖິງ 88.99 %

ຂໍ້ມູນເສີມ: ກ໊ອງເຕ້ ບໍ່ແມ່ນຄົນຝຣັ່ງແທ້! ພໍ່ແມ່ເປັນຄົນມາລີ (Mali) ຍ້າຍມາຢູ່ຝຣັ່ງ!!!




ຂ່າວຍອດນິຍົມ 7 ວັນລ່າສຸດ