ລາຍລະອຽດຂ່າວ
ເຕັກໂນໂລຊີ VAR!! ຈະນຳໃຊ້ໃນພຣີເມ໋ຍລີກອັງກິດ ເລີ່ມລະດູການໜ້າເປັນຕົ້ນໄປ!!
ຂຽນເມື່ອ: 16/11/2018 12:11 | ໂດຍ: ແອັດມິນ | ອ່ານ: 813 ຄັ້ງ

      ຫລັງຈາກມີການຖົກຖຽງກັນກັບຫລາຍເຫດການທີ່ເກີດຂຶ້ນແບບຄ້ານສາຍຕາແຟນບານ ໃນການແຂ່ງຂັນເຕະບານ ພຣີເມ໋ຍລີກ ອັງກິດ ຫລາຍລະດູການຜ່ານມາ ໂດຍສະເພາະການໃຫ້ຈຸດໂທດ, ການລໍ້າໜ້າ, ການໃຫ້ບານໄຫມ (Foul), ການປະທະກັນຂອງນັກກີລາ ແລະ ອື່ນໆ ເຮັດໃຫ້ຝ່າຍຈັດການແຂ່ງຂັນຕ້ອງໄດ້ຄົ້ນຄວ້າ ພິຈາລະນາ ປຶກສາກັບສະໂມສອນຕ່າງໆໃນພຣີເມ໋ຍລີກ ອັງກິດ ເພື່ອນຳໃຊ້ເຕັກໂນໂລຊີ VAR (Video Assistant Referees) ເປັນການເບິ່ງຄືນວິດີໂອເຫດການທີ່ສົງໄສຊ່ວຍຜູ້ຕັດສິນ.

ຫລ້າສຸດທຸກສະໂມສອນໄດ້ຕົກລົງເຫັນດີເປັນເອກະສັນ ໃຫ້ໃຊ້ VAR!! ຈະເລີ່ມໃຊ້ລະດູການໜ້າເປັນຕົ້ນໄປ!! ພຣີເມ໋ຍລີກຈະເປັນ 4 ໃນ 5 ລີກຊັ້ນນຳຂອງເອີຣົບທີ່ໃຊ້ເຕັກໂນໂລຊີ VAR ຕໍ່ຈາກ ບຸນເດັສລີກ້າ ເຢຍລະມັນ, ລາລີກ້າ ແອສັປາຍ (ສະເປນ) ແລະ ເຊຣີອາ ອີຕາລີ, ສ່ວນລີກອ໋ອງຝຣັ່ງກໍ່ຈະນຳໃຊ້ໃນລະດູການໜ້າເໝືອນກັບ ພຣີເມ໋ຍລີກ ອັງກິດ.

ເຕັກໂນໂລຊີ VAR ເລີ່ມເອົາມານຳໃຊ້ໃນວົງການເຕະບານອັງກິດ ໃນລາຍການລີກຄັບ ຫລື Carabao Cup ລະດູການນີ້ ແລະ ໃຊ້ບາງນັດໃນລາຍການ FA Cup, ຜ່ານມາໄດ້ຜົນດີສົມຄວນໃນການແຂ່ງຂັນຊິງແຊ້ມສະໂມສອນໂລກ 2017 ແລະ ບານໂລກ 2018 ສ່ວນ ຢູຟ້າ ແຊ້ມປ້ຽນລີກ ຈະເລີ່ມໃຊ້ໃນລະດູການໜ້າ.

ສຳລັບ ເຕັກໂນໂລຊີ ທີ່ທັນສະໄຫມນຳມາໃຊ້ໃນພຣີເມ໋ຍລີກ ອັງກິດ ຊ່ວຍກຳມະການຕັດສິນມີ Goal Line ຊ່ວຍໃນການບອກວ່າບານຂ້າມເສັ້ນກາງປະຕູຫລືບໍ ໂດຍໃຊ້ມາແຕ່ລະດູການ 2013-14 ແລະ ເຕັກໂນໂລຊີການສື່ສານກັນລະຫວ່າງຜູ້ຕັດສິນກາງສະໜາມ ແລະ ຜູ້ຊ່ວຍ.

Info: ຂ່າວກີລາ Lao National TV
Photo: The Independent




ຂ່າວຍອດນິຍົມ 7 ວັນລ່າສຸດ