ລາຍລະອຽດຂ່າວ
ເຫັນຜົນ! ອະດີດຄູຝຶກທິມຊາດອັງກິດ ນຳຟີລິບປິນມີໄຊນັດແຮກ! ຊູຊູກິຄັບ 2018 ສ່ວນອິນໂດເນເຊຍ ພິກແຊງຕີມໍເລັສເຕ້!!
ຂຽນເມື່ອ: 13/11/2018 21:11 | ໂດຍ: ແອັດມິນ | ອ່ານ: 890 ຄັ້ງ

      ການແຂ່ງຂັນເຕະບານຊາຍ ຊິງແຊ້ມອາຊຽນ ຫລື AFF Suzuki Cup 2018 ນັດທີ 2 ຂອງກຸ່ມ B ມື້ນີ້! ທິມຊາດຟີລີບປິນ ອັນດັບ 2 ຂອງຊຽນໃນປະຈຸບັນ ນຳໂດຍ ສະເວັນ ໂກລັນ ອີຣິກສັນ (Sven-Göran Eriksson) ອະດີດຄູຝຶກທິມຊາດອັງກິດ ແລະ ສະໂມສອນແມນເຊັສເຕີ ຊິຕີ້ ນຳທິມຊາດຟີລິບປິນ ເປີດບ້ານເອົາຊະນະ ທິມຊາດສິງກະໂປ 1-0 ຈາກປະຕູໂທນຂອງ ແພັດທຣິກ ເຣເຊວ ນາທີ 78' 

ຂະນະທີ່ ອິນໂດເນເຊຍ ແຊງຊະນະ ຕີມໍເລັສເຕ້ 3-1 ຕີມໍ ນຳກ່ອນຈາກ ຣູຟີໂນ້ ກາມ້າ ນາທີ 48' ແຕ່ອິນໂດມາຍິງແຊງ 3 ປະຕູຈາກ ອາວຟັດ ຟາເຕຍ ນາທີ 60' ສະເຕຟາໂນ້ ລີລີປາລີ້ ລູກຊອດເນເທີແລນ-ອິນໂດ ຍິງຈຸດໂທດນາທີ 69' ແລະ ເບໂຕ້ ຄອນຄາວເວັສ ກອງໜ້າຊາວເບຣຊິນ ໂອນສັນຊາດ ນາທີ 82'.

ສະຖານະການຂອງກຸ່ມ B ທິມນຳຍັງເປັນທິມຊາດໄທແຊ້ມເກົ່າ ແຂ່ງ 1 ນັດ ມີ 3 ຄະແນນ ເທົ່າກັບ ຟິລິບປິນ ແຕກຕ່າງປະຕູໄດ້ເສຍ ໄທບວກ 7 ຟິລິບປິນ ບວກ 1, ຂະນະທີ່ ອິນໂດເນເຊຍ ແລະ ສິງກະໂປ ກໍ່ມີ 3 ຄະແນນ ແຕ່ແຂ່ງ 2 ນັດເທົ່າກັນ, ປະຕູໄດ້ເສຍ ອິນໂດ ຍິງ 3 ເສຍ 2, ສິງກະໂປ ຍິງ 1 ເສຍ 1, ສ່ວນຕີມໍເລັສເຕ້ ແຂ່ງ 2 ນັດ ຍັງບໍ່ມີຄະແນນ, ຍິງ 1 ເສຍ 10 ປະຕູ.

ນັດຕໍ່ໄປ ໄທ ພົບ ອິນໂດເນເຊຍ ແລະ ຕີມໍເລັສເຕ້ ພົບ ຟີລີບປິນ ຈະແຂ່ງຂັນໃນວັນທີ 17 ພະຈິກນີ້.

Info: ຂ່າວກີລາ Lao National TV

Photo: AFF Suzuki Cup 2018




ຂ່າວຍອດນິຍົມ 7 ວັນລ່າສຸດ