ລາຍລະອຽດຂ່າວ
Oscar ອະດີດກອງກາງເຊວຊີ! ນຳ ຊ່ຽງໄຮ້ SIPG ສ້າງປະຫວັດສາດ ຄວ້າແຊ້ມລີກສູງສຸດປະເທດຈີນຄັ້ງທຳອິດ!!
ຂຽນເມື່ອ: 09/11/2018 08:11 | ໂດຍ: ແອັດມິນ | ອ່ານ: 788 ຄັ້ງ

      ຊ່ຽງໄຮ້ SIPG (Shanghai SIPG) ສະໂມສອນມະຫາເສດຖີໃນລີກສູງສຸດປະເທດຈີນ (Chinese Super League) ສ້າງປະຫວັດສາດ ຄວ້າແຊ້ມລີກສູງສຸດປະເທດຈີນຄັ້ງທຳອິດ ໃນປີ 2018 ຫລັງຈາກນັດທີ 29 (ຮອງນັດສຸດທ້າຍຂອງລະດູການ) ເປີດບ້ານຊະນະ ປັກກິ່ງ ເຣິນເຫີ (Beijing Renhe) ທິມອັນດັບທີ 8 ຂອງລີກ 2-1 ຈາກປະຕູຂອງ ໂອດີວ ອັກເມດັອຟ ແລະ ຫວູເລ່ຍ.

      ໄຊຊະນະດັ່ງກ່າວ ເຮັດໃຫ້ ຊ່ຽງໄຮ້ SIPG ມີຄະແນນໜີຫ່າງແຊ້ມເກົ່າ ກວາງໂຈ່ວ ເອເວີແກຣນ (Guangzhou Evergrande) ທີ່ບຸກເສຍໃຫ້ ຈົງຊິ່ງ ລີ້ຟານ (Chongqing Lifan) 0-2 ເຖິງ 8 ຄະແນນ ເຫລືອການແຂ່ງຂັນພຽງນັດດຽວ ກ່ອນໜ້ານັດນີ້ ຊ່ຽງໄຮ້ SIPG ບຸກພິຊິດໄຊ ເໜືອແຊ້ມເກົ່າຄາບ້ານ ແບບສຸດມັນ 5-4 ຢຸດແຊ້ມເກົ່າ 7 ສະໄຫມຊ້ອນໄວ້ໄດ້ ແລ້ວກ້າວມາເປັນແຊ້ມຄັ້ງທຳອິດ.

      ຄວາມສຳເລັດຄັ້ງນີ້ ມີຫລາຍຢ່າງຊ່ວຍຜັກດັນ ສະໜັບສະໜູນທີມສູ່ໝາກຜົນອັນໃຫມ່ ໃນນັ້ນຄະນະບໍລິຫານທີມ ທີ່ເອົາໃຈໃສ່ໃຫ້ຄວາມສະດວກ ພັດທະນາທີມຮອບດ້ານ ຍັງມີນັກເຕະກຳລັງຫລັກຫລາຍຄົນ ທັງຄົນຈີນ ແລະ ຄົນຕ່າງປະເທດ ເປັນຕົ້ນ: ອັອດສະກ້າ (Oscar) ກອງກາງທິມຊາດເບຣຊິນ, ອະດີດກອງກາງເຊວຊີ ແລະ ຮັກຄ໌ (Hulk) ປີກຮ່າງໃຫຍ່ຊົງພະລັງທິມຊາດເບຣຊິນ ອະດີດນັກເຕະເຊນິດ ເຊັນປິເຕີສະເບີກ.

      ລວມໄປເຖິງ ຫວູເລ່ຍ (Wu Lei) ກອງໜ້າທິມຊາດຈີນ ເປັນດາວຍິງສູງສຸດໃນລະດູການນີ້ 27 ໜ່ວຍ! ແລະ ຄູຝຶກໃຫມ່ Vítor Pereira ຊາວປອກຕຸຍການ (ໂປຕູເກດ) ຊ່ຽງໄຮ້ SIPG ຄວ້າສິດໄປຫລິ້ນ AFC Champions League 2019 ຮອບແບ່ງກຸ່ມ.

Info: ຂ່າວກີລາ Lao National TV
Photo: Shanghai SIPG




ຂ່າວຍອດນິຍົມ 7 ວັນລ່າສຸດ