ລາຍລະອຽດຂ່າວ
ຢືນຢັນແລ້ວ! ຫວຽດນາມຈະເປັນເຈົ້າພາບລົດສູດ 1 Formula 1 ຄັ້ງທຳອິດໃນປີ 2020
ຂຽນເມື່ອ: 08/11/2018 11:11 | ໂດຍ: ແອັດມິນ | ອ່ານ: 779 ຄັ້ງ

      ຄວາມຝັນຂອງຫວຽດນາມໃກ້ເປັນຈິງໃນການເປັນເຈົ້າພາບຈັດການແຂ່ງຂັນລົດສູດ 1 ຟຣໍມູລ້າວັນ (Formula 1) ຄັ້ງທຳອິດຂອງປະເທດ ເມື່ອລັດຖະບານ ພ້ອມດ້ວຍຜູ້ໃຫ້ການສະໜັບສະໜູນ ແລະ ຝ່າຍຈັດການແຂ່ງຂັນ Formula 1 ໄດ້ປຶກສາຫາລືກັນ ໃນອາທິດນີ້ ແລະ ຕົກລົງເຫັນດີໃຫ້ຫວຽດນາມເປັນເຈົ້າພາບຄັ້ງປະຫວັດສາດ.

      ການແຂ່ງຂັນຈະມີຂຶ້ນໃນປີ 2020 ໂດຍຈະໃຊ້ເສັ້ນທາງໃນນະຄອນຫລວງຮ່າໂນ້ຍ, ທ່ານ ເຊັສ ຄາຣີ້ (Chase Carey) ຜູ້ບໍລິຫານລະດັບສູງ ຂອງລົດສູດ 1 Formula 1 ກ່າວວ່າ: ''ພວກເຮົາໄດ້ກຳນົດເອົາເສັ້ນທາງ ໃນນະຄອນຫລວງຮ່າໂນ້ຍ ໃຫ້ໄດ້ໄລຍະທາງຕໍ່ຮອບ 5.565 ກິໂລແມັດ ໂດຍມີເຖິງ 22 ໂຄ້ງ''.

       ຊຶ່ງການມີ 22 ໂຄ້ງ ຢູ່ຫວຽດນາມຄັ້ງນີ້ ເປັນສະໜາມທຳອິດວົງການລົດສູດ 1 Formula 1 ແຊງສະຖິຕິຂອງ ຊູຊູກະ ປະເທດຍີ່ປຸ່ນ ແລະ ເຊປັງຂອງມາເລເຊຍ 16-19 ໂຄ້ງ ແລະ ມີເສັ້ນທາງຊື່ຍາວ 1500 ແມັດ ທີ່ສາມາດເລັ່ງຄວາມໄວໄດ້ເຖິງ 300 ກິໂລແມັດຕໍ່ຊົ່ວໂມງ (335km/h) ຫລື 208 ໄມຕໍ່ຊົ່ວໂມງ (208mph).

      ການແຂ່ງຂັນຄັ້ງປະຫວັດສາດນີ້ ຈະໃສ່ຊື່ເປັນພາສາອັງກິດວ່າ: Vietnamese Grand Prix ເປັນສະໜາມທີ 4 ທີ່ໃຊ້ຖະໜົນ ເປັນສະໜາມແຂ່ງ ຕໍ່ຈາກຢູ່ ໂມນາໂຄ, ສິງກະໂປ ແລະ ອາເຊີໄບຈັນ ແລະ ຫວຽດນາມເປັນປະເທດທີ 3 ໃນອາຊຽນ ທີ່ສາມາດ ເປັນເຈົ້າພາບ ຈັດການແຂ່ງຂັນລົດສູດ 1 Formula 1 ຕໍ່ຈາກມາເຊຍ ແລະ ສິງກະໂປ.

      ທ່ານ Nguyen Duc Chung ເຈົ້າຄອງນະຄອນຫລວງຮ່າໂນ້ຍ ກ່າວວ່າ: ''ນີ້ຈະເປັນການສະແດງໃຫ້ເຫັນເຖິງ ຄວາມອາດສາມາດຂອງຫວຽດນາມ ໃນຖານະປະເທດທີ່ມີການພັດທະນາເສດຖະກິດໄດ້ຢ່າງວ່ອງໄວ ສາມາດເປັນເຈົ້າງານໃຫຍ່ລະດັບໂລກ ເພື່ອດຶງດູດການທ່ອງທ່ຽວໃຫ້ປະເທດ''

Info: ຂ່າວກີລາ Lao National TV

Photo: F1 & Zing.vn & VietTimes




ຂ່າວຍອດນິຍົມ 7 ວັນລ່າສຸດ