ລາຍລະອຽດຂ່າວ
ຈາງ ເຮືອນຊູ(Jang Hyun-soo) ກອງຫຼັງທີມຊາດເກົາຫຼີ ໃຕ້ຖືກແບນຕະຫຼອດຊີວິດ
ຂຽນເມື່ອ: 02/11/2018 12:11 | ໂດຍ: ເພຣເມັກເກີ | ອ່ານ: 1046 ຄັ້ງ

      ໃນຕອນແລງມື້ວານນີ້ ວັນທີ 01/11/2018 ສຳນັກຂ່າວ Reuters ປະຈຳ ກຸງໂຊ ປະເທດເກົາຫຼີໃຕ້ ໄດ້ລາຍງານວ່າ ກອງຫຼັງທີມຊາດ ເກົາຫຼີໃຕ້ ຈາງ ເຮືອນຊູ(Jang Hyun-soo) ໄດ້ຖືກສະຫະພັນບານເຕະ ເກົາຫຼີໃຕ້ ສັ່ງລົງໂທດບໍ່ໃຫ້ຮັບໃຊ້ທີມຊາດຕະຫຼອດຊີວິດ  ພ້ອມທັງປັບໄໝເງິນ ຈຳນວນ 30 ລ້ານວອນ ປະມານ US$26,340.  ເນື່ອງມາຈາກເຂົາແຈ້ງເອກະສານເທັດ ກ່ຽວກັບການບໍລິການສັງຄົມ ໃນການຍື່ນເອກະສານ ຍົກເວັ້ນການຮັບໃຊ້ ກອງທັບ ອີງຕາມກົດໝາຍຂອງເກົາຫຼີໃຕ້ ຊາຍໜຸ່ມທຸກຄົນ ຈະຕ້ອງເຂົ້າຮັບໃຊ້ ກອງທັບເພື່ອຝຶກແອບ ການທະຫານເປັນເວລາ 2 ປີ, ແຕ່ Jang Hyun-soo ເຄີຍພາທີມຊາດເກົາຫຼີໃຕ້ ຍາດໄດ້ ຫຼຽນຄຳ ບານເຕະ ເອຊຽນ ເກມ 2014 ຈຶ່ງໄດ້ຮັບການຍົກເວັນບໍ່ຈຳເປັນເຂົ້າເປັນທະຫານ.

      ໂດຍມີເງື່ອນໄຂຢູ່ວ່າ Jang Hyun-soo ຈະຕ້ອງໄດ້ຮັບການຝຶກທະຫານຂັ້ນພື້ນຖານ ແລະ ໃຫ້ບໍລິການສັງຄົມທີ່ກ່ຽວຂ້ອງກັບກິລາ ເປັນເວລາ 544 ຊົ່ວໂມງໃນກຳນົດ 34 ເດືອນ. ແຕ່ໃນເອກະສານທີ່ລາວສົ່ງໃຫ້ ຄະນະກຳມະການພິຈາລະນາ ມີ 196 ​ຊົ່ວໂມງ ເປັນກິດຈະກຳ ທີ່ບໍ່ໄດ້ປະຕິບັດຈິງໃນເດືອນ ທັນວາ ປີ 2017, ເພາະໃນຊ່ວງເວລາດັ່ງກ່າວ ທີ່ປະເທດເກົາຫຼີ ໄດ້ ເປັນຊ່ວງເວລາທີ່ມີຫິມະຕົກໜັກ ບໍ່ສາມາດຈັດກິດຈະກຳບານເຕະໄດ້.

      ຈາກຫຼັກຖານດັ່ງກ່າວຈຶ່ງເຮັດໃຫ້ເຂົາຖືກ ພິຈາລະນາລົງໂທດບໍ່ໃຫ້ລົງຫຼິ້ນໃນນາມທີມຊາດ ອີກຕໍ່ໄປ. ປະຈຸບັນ  Jang Hyun-soo ກຳລັງຫຼິ້ນໃຫ້ ໂຕກຽວ FC ສະໂມສອນໃນ J-League.

ໂດຍ: ຄົງວົງໃນ

ພາບຈາກ: foxsportsasia.com




ພາບຈາກສື່ເກົາຫຼີ, ຮູບຊ້າຍມື ແມ່ນພາບທີ່ ຈາງສົ່ງໃຫ້ ຄະນະກຳມະການ ແຕ່ຮູບຂວາມືແມ່ນຮູບຈິງໃນຊ່ວງເວລາທີ່ເຂົາອ້າງ
ຂ່າວຍອດນິຍົມ 7 ວັນລ່າສຸດ