ລາຍລະອຽດຂ່າວ
ດາວຮຸ່ງໄວ 18 ປີ ທີ່ຍິງປະຕູຕີສະເໝີໃຫ້ ໂປຕຸເກດ ມື້ຄືນນີ້ ມີປະຫວັດບໍ່ທຳມະດາ
ຂຽນເມື່ອ: 01/07/2016 14:07 | ໂດຍ: ເພຣເມັກເກີ | ອ່ານ: 1083 ຄັ້ງ

      ບ້ານຢູໂຣຮອບ 8 ທີມນັດທຳອິດໄດ້ຜ່ານໄປ, ໂດຍທີມຊາດ ໂປຕຸເກດ ໄດ້ຜ່ານເຂົ້າຮອບຕໍ່ໄປຈາກ ຜົນຂອງການດວນຈຸດໂທດ ທີ່ສາມາດເອົາຊະນະໄປໄດ້ດ້ວຍສະກໍ 5-3 (ໃນເວລາ 1-1) ແຕ່ໃນເກມມື້ຄືນນີ້ ສັງເກດເຫັນວ່າ ຜູ້ທີ່ຍິງປະຕູຕີສະເໝີໃຫ້ ໂປຕຸເກດ ນັ້ນກໍ່ຄື ເຣນາໂຕ້ ຊານເຊດ (Renato Sanches) ຫຼື ຊື່ເຕັມແມ່ນ Renato Júnior Luz Sanches ເປັນຜູ້ຫຼິ້ນໜ້າໃໝ່ ທີ່ແຟນບານບ້ານເຮົາ ຍັງບໍ່ທັນຮູ້ຈັກຫຼາຍ. ເມື່ອໄປເບິ່ງປະຫວັດຂອງ ເຣນາໂຕ້ ແລ້ວເຫັນວ່າ ມີປະຫວັດໃນການ ຄ້າແຂ່ງທີ່ໜ້າສົນໃຈຫຼາຍ, ປັດຈຸບັນ ເຣນາໂຕ້ ມີອາຍຸ 18 ປີ ເກີດເມື່ອວັນທີ 18 ສິງຫາ 1997 ຫຼິ້ນຕໍາແໜ່ງກອງກາງ ລວງສູງ 176 cm, ລາວຫາກໍ່ລົງແຂ່ງຂັນໃນລີກອາຊີບ ເປັນປີທຳອິດໃນລະດູການ 2015-16 ໃຫ້ກັບສະໂມສອນ ເບັນຟິກ້າ ທີມດັງຈາກໂປຕຸເກດ ແລະ ໄດ້ແຊ້ມລີກຂອງໂປຕຸເກດ ກັບຕົ້ນສັງກັດອີກດ້ວຍ. ຈາກການໂຊຜົນງານໄດ້ ໂດດເດັ່ນທີ່ຫຼິ້ນໃຫ້ກັບ ຕົ້ນສັງກັດຈົນໄປເຂົ້າຕາ ສະໂມສອນຍັກໃຫຍ່ ຂອງເຢຍລະມັນ ບາເຢິນ ມິວນິກ ແລະ ໄດ້ຕົກລົງເຊັນສັນຍາ ຍ້າຍທີມດ້ວຍຄ່າໂຕ 35 ລ້ານຢູໂຣ ເຊິ່ງເປັນ ຄ່າໂຕທີ່ແພງທີ່ສຸດໃນການຍ້າຍທີມ ຈາກສະໂມສອນໃນລີກ ໂປຕຸເກດ ໄປຫຼິ້ນໃຫ້ລີກອື່ນ. ຜ່ານມາ ເຣນາໂຕ້ ລົງຫຼິ້ນໃຫ້ທີມຊາດເຍົາວະຊົນທັງໝົດ 40 ນັດ ສາມາດຍິງໄດ້ 8 ປະຕູ ແລະ ຫຼິ້ນໃຫ້ທີມຊາດຊຸດໃຫຍ່ 9 ນັດຍິງໄດ້ 1 ປະຕູ ແລະ ເປັນປະຕູສຳຄັນ ທີ່ມີສ່ວນເຮັດໃຫ້ໂປຕຸເກດ ຜ່ານເຂົ້າສູ່ຮອບ 4 ທີມ.
   ຜົນງານທີ່ໜ້າສົນໃຈມື້ຄືນນີ້ ເຣນາໂຕ້ ສົ່ງບານທັງໝົດ 64 ຄັ້ງ ຜ່ານບານສຳເລັດ 60 ຄັ້ງ, ຍາດບານຄືນໄດ້ 12 ຄັ້ງ, ຕັດບານໄດ້ 3 ຄັ້ງ ອີກດ້ວຍ.

ຂອບໃຈພາບຈາກ: ronaldo7.net

ຂໍ້ມູນຈາກ: wikipedia.org

ໂດຍ: ເພຣເມັກເກີ




ຂ່າວຍອດນິຍົມ 7 ວັນລ່າສຸດ