ລາຍລະອຽດຂ່າວ
ໄຊຍະບູລີ ກວາດ 2 ຫຼຽນຄຳ ບານສົ່ງຫາດຊາຍ “ນົກກົກຄຳ ເກມ”
ຂຽນເມື່ອ: 09/02/2017 10:02 | ໂດຍ: ແອັດມິນ | ອ່ານ: 1332 ຄັ້ງ

    ທີມບານສົ່ງຫາດຊາຍ ແຂວງໄຊຍະບູລີ ທັງປະເພດຍິງ ແລະ ຊາຍ ກວາດ 2 ຫຼຽນຄຳ ສົ່ງທ້າຍ ໃຫ້ແຂວງໄຊຍະບູລີ ຂຶ້ນມາຢູ່ ອັນດັບທີ 11 ໃນງານມະຫາກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ.

   ເມື່ອວັນທີ 8 ກຸມພາ ຜ່ານມາ ທີ່ສະໜາມກິລາຫາດຊາຍ ໂຮງຮຽນມັດທະຍົມສົມບູນ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ມີການແຂ່ງຂັນ ກິລາຫາດຊາຍ ປະເພດຍິງ ແລະ ປະເພດຊາຍ ນັດຊີງຊະນະເລີດ ງານມະຫາກຳ ກິລາ ນັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ໂດຍປະເພດຍິງ ເປັນການພົບກັນລະຫວ່າງ ເຈົ້າພາບ ທີມບານສົ່ງຫາດຊາຍ ສາວແຂວງໄຊຍະບູລີ ທີ່ປະກອບມີ ນາງ ນ້ຳທິບ ພົມມະລາດ ແລະ ນາງ ສຸພາພອນ ສີພອນແກ້ວປະເສີດ ພົບກັບ ທີມບານສົ່ງຫາດຊາຍ ສາວນະຄອນຫຼວງວຽງຈັນ ທີ່ປະກອບມີ ນາງ ຈັນສຸດາ ທອງສະຫວັນ ແລະ ນາງ ມາຊ່າ ສຸທຳມະວົງ. ຜ່ານການແຂ່ງຂັນ ຜົນປາກົດວ່າ 2 ສາວໄຊຍະບູລີ ສາມາດເອົາຊະນະໄປ 2 ເຊັດລວດ ດ້ວຍ 21-16 ແລະ 21-14 ຄະແນນ ຄວ້າຫຼຽນຄຳໄປ. ຂະນະທີ່ ຫຼຽນທອງ ແມ່ນຕົກເປັນຂອງ ທີມແຂວງສະຫວັນນະເຂດ ທີ່ເອົາຊະນະ ທີມແຂວງຈຳປາສັກ ໄປ 2-1 ເຊັດ ດ້ວຍ 21-18, 19-21 ແລະ 8-15 ຄະແນນ. ສ່ວນ ປະເພດຊາຍ ນັດຊີງຊະນະເລີດ ເປັນການພົບກັນລະຫວ່າງ ທີມບານສົ່ງຫາດ ຊາຍແຂວງໄຊຍະບູລີ ທີ່ປະກອບມີ ທ້າວ ຜິດສະນຸ ບຸນສະໜອງ ແລະ ທ້າວ ນົບພະຈອນ ສີລິວົງສາ ພົບກັບ ທີມແຂວງອຸດົມໄຊ ທີ່ປະກອບມີ ທ້າວ ໄຊຊະນະ ສຸບັນດິດ ແລະ ທ້າວ ພິດສະນຸ ອຸດົມພັນ. ຜ່ານການແຂ່ງຂັນ ຜົນປາກົດວ່າ 2 ບ່າວໄຊຍະບູລີ ກໍ່ບໍ່ໜ້ອຍໜ້າສາມາດເອົາຊະນະ 2 ບ່າວອຸດົມໄຊ ໄປ 2 ເຊັດລວດ ດ້ວຍ 21-15 ແລະ 21-14 ຄະແນນ ຄວ້າຫຼຽນຄຳໄປຄອງເຊັນກັນ. ສ່ວນ ອັນດັບ 3 ຕົກເປັນຂອງ ທີມແຂວງຄຳມ່ວນ ທີ່ເອົາຊະນະ ທີມແຂວງສະຫວັນນະເຂດ ໄປ 21-14 ແລະ 21-18 ຄະແນນ.

ໂດຍຊ້າງນ້ອຍ
ເກາະຕິດ "ນົກກົກຄຳ ເກມ 2017"




ຂ່າວລ່າສຸດ