ລາຍລະອຽດຂ່າວ
ຈຳປາສັກ ປ້ອງກັນແຊ້ມ ໄດ້ສຳເລັດ ບານເຕະຊາຍ ນົກກົກຄຳເກມ
ຂຽນເມື່ອ: 08/02/2017 23:02 | ໂດຍ: ແອັດມິນ | ອ່ານ: 2280 ຄັ້ງ

    ການແຂ່ງຂັນ ບານເຕະຊາຍ ໃນງານມະຫາກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳເກມ ໄດ້ປິດສາກລົງ ດ້ວຍຜົນສຳເລັດຂອງ ທັບນັກກິລາບານເຕະ ຈຳປາສັກ ແດນໃຕ້ ແຊ້ມເກົ່າ ເມື່ອປີ 2014.

  ມື້ນີ້ວັນທີ 08 ກຸມພາ 2017 ຊ່ວງຕອນບ່າຍ ມີການແຂ່ງຂັນ ບານເຕະຊາຍ 2 ນັດສຸດທ້າຍຄື ນັດຊີງອັນດັບທີ 3 ແລະ ນັດຊີງຊະນະເລີດ ໂດຍທີ່ໃນເວລາ 13:30 ມີການແຂ່ງຂັນ ນັດຊີງອັນດັບທີ 3 ເປັນການພົບກັນລະຫວ່າງ ຫຼວງພະບາງ ເມືອງມໍລະດົກໂລກ (ທີ່ເສຍໃຫ້ ສະຫວັນນະເຂດ ໃນຮອບຮອງຊະນະເລີດ) ພົບກັບ ອັດຕະປື ຜື່ນແຜ່ນດິນຄຳ (ທີ່ເສຍໃຫ້ ຈຳປາສັກ ໃນຮອບຮອງຊະນະເລີດ) ຜ່ານການແຂ່ງຂັນ 90 ນາທີ ປາກົດວ່າ ສະຫວັນນະເຂດ ເອົາຊະນະ ອັດຕະປື ໄປໄດ້ 2 ປະຕູຕໍ່ 1 ໄດ້ອັນດັບທີ 3 ຄອງຫຼຽນທອງ ບານເຕະຊາຍ ໄປໄດ້.

   ພໍຮອດເວລາປະມານ 15:30 ການລໍຄອຍຂອງ ເລົ່າບັນດານັກເຕະ ແລະ ກອງເຊຍ ແຟນບານ ທັງ 2 ທີມຄູ່ຊີງຊະນະເລີດ ບານເຕະຊາຍ ນົກກົກຄຳເກມ ກໍ່ສິ້ນສຸດລົງ ມື້ນີ້ພວກເຂົາຈະໄດ້ຮູ້ວ່າທີມ ຂອງຕົນເອງ ຈະໄປເຖິງຝັ່ງຝັນຫຼືບໍ່ ບໍ່ວ່າຈະເປັນທາງດ້ານ ສະຫວັນນະເຂດ ທີ່ມີຂຸມກຳລັງນັກເຕະ ແລະ ການສະໜັບສະໜູນ ຢ່າງເປັນຂະບວນ ແລະ ທາງດ້ານ ຈຳປາສັກ ແຊ້ມເກົ່າ ທີ່ພວກເຂົາຫວັງທີ່ຈະມາ ປ້ອງກັນແຊ້ມ ໄວ້ໃຫ້ໄດ້. ສຳລັບການແຂ່ງຂັນ ນັດຊີງຊະນະເລີດ ບານເຕະຊາຍ ກິລານັກຮຽນ ມັດທະຍົມສຶກສາ ທົ່ວປະເທດ ໃນຄັ້ງນີ້ ບໍ່ສາມາດມີຜູ້ຊະນະໃນ 90 ນາທີໄດ້ ສະເໝີກັນໄປ 1 ປະຕູຕໍ່ 1 ຕ້ອງຕໍ່ເວລາພິເສດ ແຕ່ກໍ່ຍັງຫາຜູ້ຊະນະບໍ່ໄດ້ ສຸດທ້າຍຕ້ອງໄດ້ຕັດສິນ ໂດຍການດວນຈຸດໂທດ ແລະ ຜົນປະກົກວ່າ ຈຳປາສັກ ແຊ້ມເກົ່າ ຍິງຈຸດໂທດ ດັບຝັນ ສະຫວັນນະເຂດ ໄປ 4 ປະຕູຕໍ່ 2 ແລະ ຜົນປະຕູລວມ 5 ປະຕູຕໍ່ 3 ເຮັດໃຫ້ ຈຳປາສັກ ປ້ອງກັນແຊ້ມ ໄວ້ໄດ້ສຳເລັດ.

  ສ່ວນຜົນການແຂ່ງຂັນ ບານເຕະຍິງ ແມ່ນແຂ່ງຈົບໄປແລ້ວມື້ວານນີ້ ໂດຍແຊ້ມຕົກເປັນຂອງ ກອງທັບສາວນ້ອຍ ສະຫວັນນະເຂດ ທີ່ເອົາຊະນະ ບໍ່ແກ້ວ ແດນເໜືອ 3 ປະຕູຕໍ່ 1 ແລະ ອັນດັບທີ 3 ຕົກເປັນຂອງ ສາວຊຽງຂວາງ ທັງງາມທັງເກັ່ງ ຫຼັງຈາກເອົາຊະນະ ສາວນ້ອຍ ນະຄອນຫຼວງ 2 ປະຕໍຕໍ່ 0.

   ມື້ອື່ນ ວັນທີ 09 ກຸມພາ 2017 ເລີ່ມເວລາ 16:30 ຈະມີພິທີປິດການແຂ່ງຂັນ ງານມະຫາກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ທີ່ບໍລິຄຳໄຊ.

ຂອບໃຈພາບຈາກ ຈຳປາກິລາລາວ




ຂ່າວລ່າສຸດ