ລາຍລະອຽດຂ່າວ
ທີມບານສົ່ງຍິງ-ຊາຍ ໄຊຍະບູລີ ຜ່ານເຂົ້າຮອບ 4 ທີມ ນົກກົກຄຳ ເກມ 2017
ຂຽນເມື່ອ: 06/02/2017 22:02 | ໂດຍ: ແອັດມິນ | ອ່ານ: 1644 ຄັ້ງ

  ທັບນັກກິລາບານສົ່ງ ແຂວງໄຊຍະບູລີ ທັງປະເພດທີມຍິງ ແລະ ທີມຊາຍ ສ້າງຜົນງານໄດ້ຢ່າງໂດເດັ່ນ ທະລຸເຂົ້າຮອບ 4 ທີມສຸດທ້າຍ ໄດ້ສຳເລັດ ໃນການແຂ່ງຂັນ ກິລາບານສົ່ງ ງານມະຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017.

  ໃນຕອນເຊົ້າ ວັນທີ 6 ກຸມພາ ຜ່ານມາ ທີ່ສະໜາມກິລາ ມສ ສີທ່ານາໄຊ ເມືອງປາກຊັນ ແຂວງບໍລິຄຳໄຊ ໄດ້ມີການແຂ່ງຂັນ ບານສົ່ງຊາຍ ຮອບ 8 ທີມສຸດທ້າຍ ຄູ່ທຳອິດ ເຊິິ່ງເປັນການພົບກັນ ລະຫວ່າງ ແຂວງເຊກອງ ທີມອັນດັບ 1 ສາຍ ກໍ ພົບກັບ ແຂວງໄຊຍະບູລີ 1 ໃນ 2 ທີມອັນດັບ 3 ທີ່ມີຄະແນນດີທີ່ສຸດ. ເກມການແຂ່ງຂັນ ໃນເຊັດທຳອິດ ໄດ້ດຳເນີນໄປຢ່າງດຸເດືອດ ເມື່ອທັງ 2 ທີມຜັດປ່ຽນກັນເສີບ-ຕີ ໄລ່ຄະແນນກັນ ແບບລູກຕໍ່ລູກ ກ່ອນທີິ່ ໄຊຍະບູລີ ຈະແຊງເອົາຊະນະໄປກ່ອນ ໃນເຊັດທຳອິດ 25-21 ຄະແນນ. ສ່ວນເຊັດທີ 2 ເປັນທາງ ໄຊຍະບູລີ ທີ່ໄດ້ຄະແນນ ຂຶ້ນນຳໄປກ່ອນ 6-3 ກ່ອນທີ ເຊກອງ ຈະໄລ່ມາເປັນ 9-9 ຄະແນນ ຫຼັງຈາກນັ້ນ ເປັນຝ່າຍ ໄຊຍະບູລີ ທີ່ຫຼິ້ນໄດ້ດີກວ່າ ພິກເກມຂຶ້ນນຳອີກຄັ້ງ 18-10 ຄະແນນ ແຕ່ທາງ ເຊກອງ ກໍ່ບໍ່ຍອມງ່າຍໆ ໄລ່ຈີ້ມາເປັນ 16-20 ແນວໃດກໍ່ຕາມ ດ້ວຍສະພາບຮ່າງກາຍ ທີ່ອິດເມື່ອຍຂອງນັກກິລາ ເຊກອງ ຈາກການລົງສະໜາມ ມື້ກ່ອນໃນ ຮອບແບ່ງກຸ່ມນັດສຸດທ້າຍ ບວກກັບການແກ້ເກມມາດີ ຂອງຄູບານສົ່ງ ໄຊຍະບູລີ ເຮັດໃຫ້ ໄຊຍະບູລີ ເອົາຊະນະໄປແບບຂາດຮອຍ 25-18 ຄະແນນ ແລະ ໃນເຊັດທີ 3 ກໍ່ເປັນທາງນັກຕົບຊອນບ່າວ ແຂວງໄຊຍະບູລີ ທີ່ຫຼິ້ນໄດ້ດີກວ່າ ເອົາຊະະນະ ແຂວງເຊກອງ ໄດ້ໄດ້ອີກໃນເຊັດນີ້ ດ້ວຍຄະແນນ 25-17 ຄະແນນ ສົ່ງຜົນໃຫ້ ທັບນັກກິລາບານສົ່ງ ແຂວງໄຊຍະບູລີ ເປັນຝ່າຍເອົາຊະນະ ແຂວງເຊກອງ 3-0 ເຊັດ ດ້ວຍຄະແນນ 25-21, 25-18 ແລະ 25-17 ຜ່ານເຂົ້າ ຮອບຮອງຊະນະເລີດ ຫຼື ຮອບ 4 ທີມສຸດທ້າຍໄດ້ສຳເລັດ ໂດຍຈະໄປພົບກັບ ແຂວງຊຽງຂວາງ ທີມເຕັງ 1 ທີ່ ເອົາຊະນະ ນະຄອນຫຼວງວຽງຈັນ 3-0 ເຊັດ ດ້ວຍຄະແນນ 28-26, 25-18 ແລະ 25-16 ຄະແນນ.

   ຂະນະທີ່ ທັບນັກຕົບສາວ ໄຊຍະບູລີ ແຊ໋ມເກົ່າ ພາດທ່າເສຍໃຫ້ ອຸດົມໄຊ 2-3 ເຊັດ ໃນນັດສຸດທ້າຍຂອງ ຮອບແບ່ງກຸ່ມ ດ້ວຍຄະແນນ 25-23, 17-25, 18-25,25-19 ແລະ 5-15 ແຕ່ຍັງໄດ້ເຂົ້າຮອບ 4 ທີມສຸດທ້າຍ ໃນຖານະທີມອັນດັບ 2 ຂອງສາຍ ກໍ ມີ 9 ຄະແນນ ຈາກຜົນຊະນະ 3 ນັດ ເສຍ 1 ນັດ ສ່ວນ ຮອບຮອງຊະນະເລີດ ຫຼື ຮອບ 4 ທີມສຸດທ້າຍ ໃນປະເພດທີມຍິງ ແຂວງບໍລິຄຳໄຊ ພົບກັບ ນະຄອນຫຼວງວຽງຈັນ ແລະ ໄຊຍະບູລີ ພົບກັບ ສະຫວັນນະເຂດ ໂດຍທັງປະເພດທີມຊາຍ ແລະ ຍິງ ຈະລົງແຂ່ງຂັນໃນມື້ນີ້ (7 ກຸມພາ 2017) ເລີ່ມແຕ່ເວລາ 08:00 ໂມງ ເປັນຕົ້ນໄປ ທີ່ເດີນບານສົ່ງ ມສ ສີທ່ານາໄຊ.

ຂ່າວໂດຍ: ຫຼ້າ ສາຍນ້ຳພຽງ ລາຍງານຈາກແຂວງບໍລິຄຳໄຊ
ເກາະຕິດ "ນົກກົກຄຳ ເກມ 2017"




ຂ່າວລ່າສຸດ