ລາຍລະອຽດຂ່າວ
ເກັ່ງເກີດຄາດ ! ປິ່ງປ່ອງ ອຸດົມໄຊ ກວາດ 5 ຫຼຽນຄຳ ງານນົກກົກຄຳ ເກມ 2017
ຂຽນເມື່ອ: 05/02/2017 22:02 | ໂດຍ: ແອັດມິນ | ອ່ານ: 1082 ຄັ້ງ

  ທັບນັກກິລາປິ່ງປ່ອງ ແຂວງອຸດົມໄຊ ສ້າງຜົນງານໄດ້ຢ່າງໂດດເດັ່ນ ພາຍຫຼັງຍາດມາໄດ້ 5 ຫຼຽນຄຳ ແລະ 4 ຫຼຽນເງິນ ຈາກການຊີງໄຊ ທັງໝົດ 7 ລາຍການ ໃນງານມຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ເປັນເຈົ້າພາບ ລະຫວ່າງວັນທີ 1-9 ກຸມພາ 2017.

  ການແຂ່ງຂັນ ກິລາປິ່ງປ່ອງ ໃນນົກກົກຄຳ ເກມ 2017 ໄດ້ທຳການແຂ່ງຂັນກັນ ໃນລະຫວ່າງວັນທີ 2-4 ກຸມພາ 2017 ທີ່ສະໂມສອນໃນຮົ່ມ ພະແນກກະສິກຳ ແລະ ປ່າໄມ້ ແຂວງລິຄຳໄຊ ໂດຍມີນັກກິລາ ເຂົ້າຮ່ວມທັງໝົດ 60 ຄົນ, ຍິງ 27 ຄົນ ທີ່ມາຈາກ ນະຄອນຫຼວງວຽງຈັນ, ຫຼວງພະບາງ, ສະຫວັນນະເຂດ, ຈຳປາສັກ, ຄຳມ່ວນ, ຊຽງຂວາງ ແລະ ອຸດົມໄຊ ໂດຍມີການຊີງໄຊກັນ ທັງໝົດ 3 ປະເພດ ລວມ 7 ລາຍການ (7 ຫຼຽນຄຳ) ປະກອບມີ ປະເພດທີມຊາຍ-ຍິງ, ປະເພດດ່ຽວຍິງ-ຊາຍ, ຄູ່ຍິງ-ຊາຍ ແລະ ຄູ່ປະສົມ. ຜ່ານການແຂ່ງຂັນ ໃນໄລຍະເວລາ 2 ວັນ ຜົນປາກົດວ່າ ທັບນັກກິລາປິ່ງປ່ອງ ແຂວງອຸດົມໄຊ ສາມາດຍາດໄດ້ ເຖິງ 5 ຫຼຽນຄຳ, 4 ຫຼຽນເງິນ ແລະ 1 ຫຼຽນ ທອງ ໂດຍ 5 ຫຼຽນຄຳ ໄດ້ຈາກປະເພດທີມຍິງ, ດ່ຽວຊາຍ (ທ້າວ ພຸດສະດີ), ດ່ຽວຍິງ (ນາງ ຍຸພິນ), ຄູ່ຍິງ (ນາງ ສຸນີລັກ+ນາງ ມອນມະລີ) ແລະ ຄູ່ປະສົມ (ທ້າວ ໄຊຈະເລີນ+ນາງ ດາສະຫວັນ). ສ່ວນ 4 ຫຼຽນເງິນ ໄດ້ຈາກທີມຊາຍ, ຄູ່ຍິງ, ຄູ່ຊາຍ ແລະ ຄູ່ປະສົມ ແລະ 1 ຫຼຽນທອງ ຈາກປະເພດດ່ຽວຍິງ.

   ຂະນະທີ່, ທ່ານ ນາງ ແສງດາວັນ ດວງປັນຍາ (ຕິ່ງ) ຄູເຝິກກິລາປິ່ງປ່ອງ ແຂວງອຸດົມໄຊ ກ່າວໃຫ້ຮູ້ວ່າ: ຈາກຜົນສຳເລັດດັ່ງກ່າວ ກໍ່ຍ້ອນໄດ້ຮັບ ການຊີ້ນຳໆພາຈາກ ການນຳຂອງແຂວງ ກໍ່ຄື ພະແນກສຶກສາທິການ ແລະ ກິລາ ແຂວງອຸດົມໄຊ ທີ່ໄດ້ໃຫ້ການອຸ້ມຊູຊ່ວຍເຫຼຶອ ແລະ ດ້ວຍຄວາມອົດທົນພະຍາຍາມ ໝັ່ນເຝິກຊ້ອມຂອງ ຕົວນັກກິລາ ທີ່ສາມາດຍາດຫຼຽນຄຳມາໃຫ້ ຊາວແຂວງອຸດົມໄຊ ເວົ້າລວມ ເວົ້າສະເພາະ ກໍ່ແມ່ນທັບນັກກິລາປິ່ງປ່ອງ ທີ່ເດີນທາງເຂົ້າຮ່ວມງານ ນົກກົກຄຳ ເກມ ທີ່ບໍລິຄຳໄຊໃນຄັ້ງນີ້ ແລະ ຖືວ່າບັນລຸເປົ້າໝາຍເກີນຄາດ ຈາກທີ່ຕັ້ງຄວາມຫວັງໄວ້ພຽງ 1 ຫຼຽນຄຳ.

    ສ່ວນທັບນັກ ກິລາປິ່ງປ່ອງ ນະຄອນຫຼວງວຽງຈັນ ໄດ້ 2 ຫຼຽນຄຳ ຈາກປະເພດທີມຊາຍ ແລະ ຄູ່ຊາຍ, 3 ຫຼຽນເງິນ ຈາກທີມຍິງ, ດ່ຽວຍິງ ແລະ ດ່ຽວຊາຍ ແລະ 2 ຫຼຽນທອງ ໃນປະເພດຄູ່ປະສົມ; ແຂວງສະຫວັນນະເຂດ ໄດ້ 2 ຫຼຽນທອງ ໃນປະເພດທີມຊາຍ ແລະ ດ່ຽວຊາຍ; ແຂວງຈຳປາສັກ ໄດ້ 2 ຫຼຽນທອງ ຈາກປະເພດດ່່ຽວຊາຍ ແລະ ຄູ່ຊາຍ ແລະ ແຂວງຫຼວງພະບາງ ໄດ້ 2 ຫຼຽນທອງ ຈາກປະເພດຄູ່ຍິງ ແລະ ດ່ຽວຍິງ.

ໂດຍ: ຫຼ້າ ສາຍນ້ຳພຽງ ລາຍງານຈາກແຂວງບໍລິຄຳໄຊ
ເກາະຕິດ "ນົກກົກຄຳ ເກມ 2017"




ຂ່າວລ່າສຸດ