ລາຍລະອຽດຂ່າວ
ຫຼາຍພາກສ່ວນໃຫ້ການອຸປະຖຳ ງານນົກກົກຄຳ ເກມ 2017 ລວມມູນຄ່າເກືອບ 800 ລ້ານກີບ
ຂຽນເມື່ອ: 02/02/2017 23:02 | ໂດຍ: ແອັດມິນ | ອ່ານ: 1835 ຄັ້ງ

 ອົງການຈັດຕັ້ງພາກລັດ, ບໍລິສັດ, ຫ້າງຮ້ານຕ່າງໆ ໄດ້ໃຫ້ການອຸປະຖຳ ງານມະຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ລະຫວ່າງວັນທີ 1-9 ກຸມພາ 2017 ລວມມູນຄ່າເກືອບ 800 ລ້ານກີບ. ຂະນະທີ່ ບໍລິສັດ ເບຍລາວ ຈຳກັດໃຫ້ການອຸປະຖຳຫຼັກ ລວມມູນຄ່າ 310 ລ້ານກີບ.

  ໃນຕອນແລງ ວັນທີ 31 ມັງກອນ ຜ່ານມາ ທີ່ໂຮງແຮມດອກຈຳປາ ເມືອງປາກຊັນ ແຂວງບໍລິຄຳໄຊ ໄດ້ມີງານລ້ຽງຕ້ອນຮັບ ຄະນະນຳນັກກິລາ ງານມະຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6, ໂດຍໃຫ້ກຽດເຂົ້າຮ່ວມຂອງທ່ານ ປອ. ກອງແກ້ວ ໄຊສົງຄາມ ກຳມະການສູນການພັກ, ເຈົ້າແຂວງບໍລິຄຳໄຊ, ທັງເປັນປະທານ ຈັດງານມະຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6, ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນຮອງປະທານ ຈັດງານດັ່ງກ່າວ, ມີເຈົ້າແຂວງ, ຮອງລັດຖະມົນຕີ, ຮອງເຈົ້າແຂວງ, ຜູ້ຊ່ວຍລັດຖະມົນຕີ, ຫົວໜ້າຫ້ອງການ, ກົມ, ສູນ, ສະຖາບັນ, ອະທິການບໍດີ, ຜູ້ອຳນວຍການວິທະຍາໄລ, ຜູ້ໃຫ້ການອຸປະຖຳ, ຄະນະນຳນັກກິລາ ແລະ ແຂກທີ່ຖືກເຊີນເຂົ້າຮ່ວມ.

  ພາຍໃນງານ ໄດ້ມີການມອບ-ຮັບ ການອຸປະຖຳ ງານມະຫະກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6, ເຊິ່ງບໍລິສັດ ເບຍລາວ ຈຳກັດ ໄດ້ໃຫ້ການອຸປະຖຳຫຼັກ ລວມມູນຄ່າ 310 ລ້ານກີບ. ໃນນັ້ນ, ເປັນເງິນສົດ 100 ລ້ານກີບ. ສ່ວນສູນກິລາ ສະເຕດ້ຽມ ສະປອດ ຕົວແທນຈຳໜ່າຍເຄື່ອງກິລາ ຍີ່ຫໍ້ ເອັຟບີທີ ອຸປະຖຳ 75 ລ້ານກີບ, ບໍລິສັດ ວັນນະແສງການຄ້າ 25 ລ້ານກີບ, ສະມາຄົມນັກທຸລະກິດໜຸ່ມ ແຂວງບໍລິຄຳໄຊ 30 ລ້ານກີບ, ບໍລິສັດ ບາຍດີ ມິເດຍ 25 ລ້ານກີບ, ບໍລິສັດ ວັດທະນາ ການຄ້າ 20 ລ້ານກີບ, ບໍລິສັດ ສະຕາໂທລະຄົມ 23,5 ລ້ານກີບ. ນອກນັ້ນ, ຍັງມີບັນດາບໍລິສັດ, ຫ້າງຮ້ານ, ອົງການຈັດຕັ້ງແຂວງ ແລະ ນິຕິບຸກຄົນໃຫ້ ການອຸປະຖຳຕື່ມອີກ ລວມມູນຄ່າທັງໝົດເກືອບ 800 ລ້ານກີບ. ໂດຍໃຫ້ກຽດຮັບການອຸປະຖຳດັ່ງກ່າວຂອງທ່ານ ປອ. ກອງແກ້ວ ໄຊສົງຄາມ ແລະ ທ່ານ ບົວລານ ສິລິປັນຍາ.

ໂດຍ: ຫຼ້າ ສາຍນໍ້າພຽງ
ເກາະຕິດ "ນົກກົກຄຳ ເກມ 2017"




ຂ່າວລ່າສຸດ