ລາຍລະອຽດຂ່າວ
ຕະວັນ ຄວ້າຫຼຽນຄຳ ທຳອິດໃຫ້ທັບນັກກິລາ ນ.ວ ໃນ ນົກກົກຄຳ ເກມ2017
ຂຽນເມື່ອ: 02/02/2017 23:02 | ໂດຍ: ແອັດມິນ | ອ່ານ: 1946 ຄັ້ງ

   ທ້າວ ຕະວັນ ພົມມະວົງ ນັກຮຽນ ຊັ້ນມັດທະຍົມສຶກສາຂັ້ນ ມ5 ຈາກໂຮງຮຽນ ກຽດຕິສັກ ນາໆຊາດ ນັກກິລາເທຄວັນໂດ ນະຄອນຫຼວງວຽງຈັນ (ນ.ວ) ໂຊລີລາທວງທ່າ ການຟ້ອນປຸ່ມເຊ ໄດ້ຢ່າງຊັດເຈນ ແລະ ສວຍງາມ ຖືກໃຈກຳມະການຕັດສິນ ຈົນໄດ້ຄະແນນໃຫ້ 791 ຄະແນນ ຊະນະນັກກິລາຈາກ 9 ແຂວງ ຄວ້າຫຼຽນຄຳ ທຳອິດໃຫ້ທັບນັກກິລາ ນ.ວ ໃນງານມະຫາກຳ ກິລານັກຮຽນ ມັດທະຍົມສຶກສາ ທົ່ວປະເທດ ຄັ້ງທີ 6 ຫຼື ນົກກົກຄຳ ເກມ 2017 ທີ່ແຂວງບໍລິຄຳໄຊ ລະຫວ່າງວັນທີ 1-9 ກຸມພາ 2017.

   ໃນຕອນເຊົ້າ ວັນທີ 2 ກຸມພາ ຜ່ານມາ ທີ່ສະໂມສອນເທຄວັນໂດ ໂຮງຮຽນມັດທະຍົມຕອນຕົ້ນ ໂພສີ ເມືອງປາກຊັນ ແຂວງບໍລິຄຳໄຊ ໄດ້ມີພິທີເປີດ ການແຂ່ງຂັນ ກິລາເທຄວັນໂດ ງານກິລາ ນົກກົກຄຳ ເກມ 2017, ເຊິ່ງມີນັກກິລາ ເຂົ້າຮ່ວມແຂ່ງຂັນ ທັງໝົດ 8 ແຂວງ ແລະ 1 ນະຄອນຫຼວງວຽງຈັນ ຄື: ຈຳປາສັກ, ອຸດົມໄຊ, ບໍ່ແກ້ວ, ຊຽງຂວາງ, ຫຼວງພະບາງ, ຄຳມ່ວນ, ສະຫວັນນະເຂດ, ບໍລິຄຳໄຊ ເຈົ້າພາບ ແລະ ນະຄອນຫຼວງວຽງຈັນ  ໂດຍມີການຊີງໄຊກັນທັງໝົດ 23 ຫຼຽນຄຳ. ໃນນັ້ນ, ປະເພດຕໍ່ສູ້ປ້ອງກັນຕົວ 16 ຫຼຽນຄຳ ແລະ ປະເພດຟ້ອນປຸ້ມເຊ ຊີງໄຊ 7 ຫຼຽນຄຳ.

 ການແຂ່ງຂັນກິລາດັ່ງກ່າວ, ກໍ່ໄດ້ມີການຊີງຫຼຽນຄຳ ປະເພດຟ້ອນປຸ່ມເຊ 5 ລາຍການ ຜ່ານການແຂ່ງຂັນ ຜົນປາກົດວ່າ: ປະເພດດ່ຽວຊາຍ ທ້າວ ຕະວັນ ພົມມະວົງ ນັກຮຽນຊັ້ນມັດທະຍົມສຶກສາ ມ5 ຈາກໂຮງຮຽນ ກຽດຕິສັກ ນາໆຊາດ ນັກກິລາຂອງ ນະຄອນຫຼວງວຽງຈັນ ສາມາດໂຊລີລາທວງທ່າ ໃນການຟ້ອນໄດ້ຢ່າງສວຍງາມ ຊະນະໃຈກຳມະການຕັດສິນ 5 ທ່ານ ສະສົມຄະແນນໄດ້ເຖິງ 791 ຄະແນນ ເໜືອນັກກິລາຈາກ 9 ແຂວງ ຄວ້າຫຼຽນຄຳທຳອິດໃຫ້ ນັກກິລາເທຄວັນໂດ ກໍ່ຄື ທັບນັກກິລາ ນະຄອນຫຼວງວຽງຈັນ ໃນການເຂົ້າຮ່ວມງານກິລາ ນົກກົກຄຳເກມ.

  ສຳລັບ ນະຄອນຫຼວງວຽງຈັນ ມາຮອດປັດຈຸບັນ ເວລາ 15:00 ໂມງ ວັນທີ 2 ກຸມພາ 2017 ສາມາດຄວ້າໄດ້ 1 ຫຼຽນຄຳ ຈາກກິລາເທຄວັນໂດ ປະເພດດ່ຽວຊາຍ, 1 ຫຼຽນເງິນ ຈາກກິລາກະຕໍ້ ປະເພດທີມດ່ຽວຊາຍ ແລະ 2 ຫຼຽນທອງ ຈາກກິລາເທຄວັນໂດ ປະເພດຟ້ອນປຸ່ມເຊ ທີມຊຸດຍິງ ແລະ ກະຕໍ້ທີມດ່ຽວຍິງ (ສະຫຼຸບຫຼຽນແບບບໍ່ເປັນທາງການ).

ໂດຍ ອ້ວນດຳ ລາຍງານຈາກ ແຂວງບໍລິຄຳໄຊ
ເກາະຕິດ "ນົກກົກຄຳ ເກມ 2017"




ຂ່າວລ່າສຸດ