ລາຍລະອຽດຂ່າວ
ອັດຕະປື ອັນດັບທີ 1 ສາຍ ຄ ຜ່ານເຂົ້າຮອບ 8 ທີມສຸດທ້າຍ ບານເຕະຊາຍ ນົກກົກຄຳເກມ
ຂຽນເມື່ອ: 02/02/2017 23:02 | ໂດຍ: ແອັດມິນ | ອ່ານ: 2186 ຄັ້ງ

   ການແຂ່ງຂັນ ບານເຕະຊາຍ ນົກກົກຄຳເກມ 2017 ວັນທີ 02 ກຸມພາ 2017 ອັດຕະປື ພາຍຫຼັງທີ່ເສຍໃຫ້ເຈົ້າພາບ ບໍລິຄຳໄຊ ໄປກ່ອນ 1 ປະຕູຕໍ່ 4 ໃນນນັດທຳອິດ ທີ່ລົງສະໜາມ ຟື້ນຄືນຟອມ ເອົາຊະນະ 2 ນັດຕິດ ຜ່ານເຂົ້າໄປແຂ່ງຂັນໃນ ຮອບ 8 ທີມສູດທ້າຍ ໃນຖານະ ທີມອັນດັບທີ 1 ຂອງ ສາຍ ຄ.

   ການແຂ່ງຂັນ ໃນນັດສຸດທ້າຍ ຮອບແບ່ງສາຍ ຂອງ ສາຍ ຄ ມື້ນີ້ແຂ່ງກັນ 2 ຄູ່ ໂດຍທີ່ຄູ່ທີ 1 ເປັນການພົບກັນລະຫວ່າງ ຄຳມ່ວນ ພົບກັບ ເຈົ້າພາບ ບໍລິຄຳໄຊ ຜົນປະກົດວ່າ ສະເໝີກັນໄປ 1 ປະຕູໍ່ 1 ສົ່ງຜົນເຮັດໃຫ້ ບໍລິຄຳໄຊ ຜ່ານເຂົ້າຮອບ ສ່ວນ ຄຳມ່ວນ ແມ່ນຕ້ອງລຸ້ນ ຜົນການແຂ່ງຂັນໃນຄູ່ທີ 2. ຄູ່ທີ 2 ເປັນການລົງສະໜາມ ແຂ່ງຂັນລະຫວ່າງ ອັດຕະປື ພົບກັບ ເຊກອງ ໃນເກມນີ້ ຖ້າ ອັດຕະປື ເອົາຊະນະ ໄດ້ ພວກເຂົາຈະຂຶ້ນເປັນ ອັນດັບທີ 1 ຂອງສາຍ ແລະ ຜົນກໍ່ເປັນເຊັ່ນນັ້ນ ອັດຕະປື ເອົາຊະນະ ເຊກອງ ໄປໄດ້ 3 ປະຕູຕໍ່ 1.

    ພາຍຫຼັງຈົບການແຂ່ງຂັນ ທີມງານ laosportnews ໄດ້ມີໂອກາດສຳພາດ ທ່ານ ພູປະເສີດ ພົມມະຈັນ ຄູຝຶກຂອງທີມ ອັດຕະປຶ ໂດຍທ່ານໄດ້ກ່າວວ່າ" ຖ້າເວົ້າລວມ 3 ນັດ ທີ່ຜ່ານມາ ຄິດວ່ານັດທຳອິດ ຖືວ່າຍາກທີ່ສຸດ ເພາະວ່າບັນດານັກກິລາ ຍັງມີຄວາມຕື່ນເດີ່ນແນ່ ແລະ ຍັງຂາດປະສົບປະການ ໃນການເຕະບານເດີ່ນໃຫ່ຍ ແລະ ເປັນຄັ້ງທະອິດ ທີ່ໄດ້ເຂົ້າຮ່ວມງານກິລາໃຫ່ຍ ເຮັດໃຫ້ເຕະນັດທຳອິດ ນັກກິລາຫລາຍຄົນຫລີ້ນ ບໍ່ໄດ້ຕາມມາດຕະຖານ ທີ່ໄດ້ຊ້ອມມາ ຖ້າເອີ້ນແບບພາສາບ້ານເຮົາ ກະແມ່ນຕື່ນເດີ່ນ. ສ່ວນນັດທີ່ກົດດັນທີ່ສຸດ ກໍ່ຫນ້າຈະເປັນ ນັດທີ່ຶ 2 ກັບແຂວງຄຳມ່ວນ ເພາະໃນນັດດັ່ງກ່າວ ທາງແຂວງເຮົາ ຈະເສຍອີກບໍ່ໄດ້ ສຳຄົນສຸດແມ່ນ ການເກັບ 3 ຄະແນນ ເພື່ອເປີດໂອກາດ ໃນການເຂົ້າຮອບຂອງເຮົາ, ສ່ວນການແຂ່ງຂັນ ນັດສຸດທ້າຍ ກັບ ແຂວງເຊກອງ ບັນຍາກາດພາຍໃນທິມ ກະຖືວ່າດີກ່ວາເກົ່າ ພາຍຫລັງທີ່ຊະນະມາ ແລະ ພວກເຮົາມີໂອກາດ ໄດ້ເຕະຄູ່ສອງໄດ້ຮູ້ຜົນ ການແຂ່ງຂັນຂອງ ແຂວງບໍລິຄຳໄຊ ແລະ ແຂວງຄຳມ່ວນ ພຽງແຕ່ພວກເຮົາສະເຫມີ ກັບ ແຂວງເຊກອງ ກໍ່ຜ່ານເຂົ້າຮອບສຳເລັດ. ສ່ວນເກມໃນ ນັດທີ່ 3 ແມ່ນພວກເຮົາຫລີ້ນເກມ ແບບຮັດກຸມ ບໍ່ພາດງ່າຍ ຫລີ້ນໃຫ້ຫນ້ອຍຈັ່ງຫວະ ອາໄສການໂຕ້ກັບ ທີ່ໄວໃນການທຳປະຕູ.

   ສ່ວນໃນການແຂ່ງຂັນ ຮອບ 8 ທິມ ທາງແຂວງພວກເຮົາ ກະຊິພະຍາຍາມ ສ້າງປະຫວັດສາດ ຜ່ານເຂົ້າ ຮອບ 4 ທີມ ແລະ ສູ້ເພື່ອເອົາ ຫລຽນໃດຫລຽນໜຶ່ງ ໄປຝາກແຟນບານ ຊາວແຂວງອັດຕະປື ມາຮອດນີ້ແລ້ວພວກເຮົາ ກະມີຄວາມຫມັ້ນໃຈຢູ່ວ່າ ທາງນັກກິລາພວກເຮົາ ຕ້ອງເຮັດໄດ້".

   ເຮົາມາຕິດຕາມນຳກັນວ່າ ທີມບານເຕະຊາຍ ອັດຕະປື ຈະສາມາດໄປເຖິງຝັ່ງຝັນສຳເລັດ ຫຼື ບໍ່ ພວກເຂົາຈະສ້າງປະຫວັດສາດ ໃຫ້ກັບວົງການບານເຕະ ອັດຕະປື ກໍ່ຄືວົງການບານຕະລາວ ໄດ້ຕື່ມອີກຫຼືບໍ່ ເຮົາມາຕິດຕາມໄປນຳກັນ.

ຂອບໃຈຂໍ້ມູນ ແລະ ພາບຈາກ ທ່ານ ພູປະເສີດ ພົມມະຈັນ




ຂ່າວລ່າສຸດ